«قازفوسفاتتا» ەكى جاڭا تسەح اشىلدى

وتاندىق حيميا يندۋسترياسىنىڭ كوشباسشىسى «قازفوسفات» جشس الەمنىڭ 27 ەلىنە سارى فوسفور جىبەرىپ, ەلىمىزدىڭ حيميالىق ونىمدەردىڭ ۇشتەن ءبىرىن قامتاماسىز ەتەدى. كاسىپورىندا اشىلعان ەكى جاڭا تسەح ءونىمنىڭ وزىندىك قۇنىن تومەندەتىپ, تۇتىنۋشىلار سانىن ارتتىرۋعا سەپتىگىن تيگىزەدى, دەپ حابارلايدى قازاقپارات. «قازفوسفات» جشس-ءنىڭ باس ديرەكتورى, ەڭبەك ەرى مۇقاش ەسكەندىروۆتىڭ ايتۋىنشا, قۋاتتىلىعى جىلىنا 5 مىڭ توننا بولاتىن فوسفور-كالي تىڭايتقىشتارىن وندىرەتىن تسەح جانە قۋاتتىلىعى جىلىنا 70 ميلليون تەكشە مەتر ازوت بولاتىن اۋانى ءبولۋ تسەحى پايدالانۋعا بەرىلدى. «جاڭا تسەحتار ءوندىرىس كولەمىن جانە تاۋار نومەنكلاتۋراسىن ۇلعايتۋعا مۇمكىندىك بەرەدى. ءبىز بۇل تسەحتارعا 1,5 ملرد سالدىق جانە ءونىمنىڭ وزىندىك قۇنى تومەندەپ, تۇتىنۋشىلار سانى ارتادى دەپ بولجاپ وتىرمىز», - دەدى مۇقاش ەسكەندىروۆ. فوسفور-كالي تىڭايتقىشتار تسەحى سارى فوسفور ءوندىرىسىنىڭ ميلليون توننا قالدىعىن كادەگە جاراتۋ ماسەلەسىن شەشە الادى. بۇل ءوڭىردىڭ ەكولوگياسىنا وڭ اسەر ەتەدى. بۇل تەحنولوگيانى جامبىلدىق فوسفورشىلاردىڭ وزدەرى ويلاپ شىعارعان. فوسفور-كالي تىڭايتقىشتار تسەحىن تۇرعىزۋدان بۇرىن, زەرتتەۋ ينستيتۋتىمەن بىرىگىپ, ءداندى-داقىلدار, باقشالىق, ءزايتۇن, جوڭىشقا ارقىلى فوسفور-كالي تىڭايتقىشتارىنا سىناق جۇرگىزىلدى. جوڭىشقادان وزگە داقىلداردىڭ بارلىعى ەگىن شىعىمدىلىعىن 15-20% ارتتىرعان. «اۋا ءبولۋ تسەحىن جاڭارتۋعا توقتالساق, بۇل تسەح تولىعىمەن اۆتوماتتاندىرىلدى, وتكىزۋ ناتيجەسىندە سۇيىق ازوت پەن وتتەگى شىعادى, بۇل تىڭايتقىش وندىرىسىندە جانە تەحنيكالىق قاجەتتىلىكتە كادەگە جارايدى», - دەدى ەسكەندىروۆ. ءىرى وتاندىق حيميا ونەركاسىبىنىڭ باسشىلىعى حابارلاعانداي, كومپانيا نەگىزىن قالاعان 16 جىل ىشىندە سارى فوسفور, ناتري تريپوليفوسفاتى, مينەرالدى تىڭايتقىشتار سەكىلدى 20-دان استام ءونىم تۇرلەرىن شىعارىپ, قازاقستاندا حيميا يندۋسترياسىنىڭ كوشباسشىسى اتاندى. ونىمگە 50 ملرد تەڭگە ينۆەستيتسيالانعان. ەكسپورت جالپى ساتۋ كولەمىنىڭ 94% قۇرايدى.