Global كومپانياسى ۋنيۆەرسيادا ويىندارىنىڭ سەرىكتەسى بولدى

الماتىدا 2017 جىلعى 28-ءشى دۇنيەجۇزىلىك قىسقى ۋنيۆەرسياداعا دايىندالۋ جانە وتكىزۋ جونىندەگى ديرەكتسيا جانە Global قۇرىلىس كومپانياسى اراسىندا ىنتىماقتاستىق تۋرالى مەموراندۋمعا قول قويىلدى, دەپ حابارلايدى اتالعان ديرەكتسيانىڭ ءباسپاسوز قىزمەتى. 2006 جىلى قۇرىلعان شاڭعى جارىستارى جونىندەگى ۇلتتىق فەدەراتسيادا تۇڭعىش رەت ءوزىنىڭ جەكە دەمەۋشىسى پايدا بولدى. وڭتۇستىك استاناداعى ەڭ ءىرى قۇرىلىس كومپانيالارىنىڭ ءبىرى بولىپ تابىلاتىن Global شاڭعى جارىستارى بويىنشا ايەلدەر قۇراماسىن قولداۋ جونىندە شەشىم قابىلدادى. مەموراندۋم بارىسىندا 2017 جىلى الماتىدا وتەتىن 28-ءشى دۇنيەجۇزىلىك قىسقى ۋنيۆەرسياداعا دايىندالۋ جانە وتكىزۋ جونىندەگى ديرەكتسيا ديرەكتورىنىڭ ورىنباسارى نۇرجان ابىلقايىر: «بيزنەستىڭ ءوزى پايدا كورۋ ءۇشىن ەمەس, شىن نيەتپەن ءىس-شاراعا دەۋمەۋشىلىك كورسەتىپ وتىرعانى قۋانتادى. ءبىزدىڭ سپورتشىلارىمىزعا ناقتى ىستەرمەن كومەكتەسكىمىز كەلەدى دەگەن نيەتپەن بىزگە ءبىرىنشى رەت كەلىپ وتىر. سپورتشىلارىمىز بارىنشا جايلى ورتادا ويىندارعا دايىندالىپ, جاقسى ونەر كورسەتۋدى قالايدى. قارجىلىق جاعىنان بولسىن, جىگەرلەندىرۋ تۇرعىسىنان بولسىن, ءبىزدىڭ كورسەتكەن قولداۋىمىز ولار ءۇشىن اسا ماڭىزدى», – دەدى. Global قۇرىلىس كومپانياسى باقىلاۋ كەڭەسىنىڭ توراعاسى مۇحيت ازىرباەۆ: «ءبىز جىلجىمايتىن تۇرعىن ۇيلەردى سالاتىن قۇرىلىس كومپانياسى رەتىندە اسا ماڭىزدى مىندەتتى ۇنەمى شەشىپ وتىرامىز, ياعني كوپپاتەرلى ۇيلەردىڭ تۇرعىندارى ءۇشىن سپورتتى قولجەتىمدى ەتەمىز. ويتكەنى ءاربىر سپورتشى ءوز مانسابىن سول اۋلادان باستايدى. ۋنيۆەرسيادا سەكىلدى ايتۋلى وقيعاعا قولداۋ كورسەتۋگە قۋانىشتىمىز. سونداي-اق, ءبىز ەندى-ەندى مانسابىن باستاعان جاس سپورتشىلارعا تىكەلەي قولداۋ كورسەتۋ تۋرالى شەشىم قابىلدادىق. جاڭا بيىكتىكتەردى باعىندىرسىن دەپ, ءبىز ولاردى قولايلى جاعدايلارمەن قامتاماسىز ەتكىمىز كەلەدى», – دەدى. دەمەۋشىلىككە بولىنگەن قارجىنىڭ ءبىر بولىگى قاجەتتى سپورتتىق كيىم-كەشەكتى (جارىستا كيەتىن كومبينەزوندار, جاتتىعۋ كيىمدەرى), قۇرال-سايمانداردى (شاڭعى مەن بەكىتكىشتىڭ ەكى ءتۇرى) ساتىپ الۋعا, سونداي-اق, جيىندارعا جانە ءتۇرلى جارىستارعا, سونىڭ ىشىندە رەسپۋبليكالىق جانە حالىقارالىق سايىستارعا قاتىسۋ كەزىندەگى دايىندىققا باعىتتالدى. قازىر ايەلدەر قۇراماسىندا 8 كوماندا مۇشەسى بار, ولار كەشە عانا قر-نىڭ شاڭعى جارىستارى بويىنشا كۋبوگىن لايىقتى دەڭگەيدە اياقتادى. «شاڭعى جارىستارى جونىندەگى ۇلتتىق فەدەراتسيا» قب باس حاتشىسى اندرەي نەۆزوروۆ «سپورتشىلاردىڭ ويىندارعا دايىندىعى قاشاندا وراسان زور كۇش جۇمساۋدى قاجەت ەتەدى. سونداي-اق, بۇعان ايتارلىقتاي شىعىندار كەتەدى. ماسەلەن, ءبىر كاسىپقوي شاڭعىشىنىڭ سايماندارى شامامەن 1,7 ملن. تەڭگە تۇرادى. ءسوزسىز, بىزگە مەملەكەت تاراپىنان كوپ كومەك كورسەتىلۋدە, الايدا وسىنداي ۇلكەن كومپانيانىڭ سەنىم ارتىپ, شىنايى نيەت ءبىلدىرۋى ءبىز ءۇشىن ۇلكەن قۇرمەت. ونىڭ ۇستىنە سپورتشىلاردىڭ رۋحى كوتەرىلەدى. بىزگە سەنەدى, دەمەك جەڭەمىز دەگەن ءسوز», – دەدى. سونداي-اق, ەلىمىزدىڭ ەڭبەك سىڭىرگەن باپكەرى الەكساندر باتيايكين: «ءبىزدىڭ قىز-جىگىتتەرىمىز شامامەن 8 وقۋ-جاتتىعۋ جيىنىندا بولىپ قايتتى. ۇلتتىق كوماندانىڭ قاتارى جاتتىعۋ كەزىندە تاماشا ناتيجەلەردى كورسەتىپ وتىرعان, كەلەشەگىنەن مول ءۇمىت كۇتۋگە بولاتىن جاس سپورتشىلارمەن تولىعۋدا. الەم كۋبوگىندا ءبىز جۇلدەلى ورىنداردى الىپ كەلدىك. سپورتشىلار ۋنيۆەرسياداعا دايىندالۋدا, ەڭ كەم دەگەندە ءۇش مەدالدى جەڭۋدى ءۇمىت ەتىپ وتىرمىز», - دەپ اتاپ ءوتتى.