قازاق تىلىندەگى تەرمين سانى 27 مىڭعا جەتەدى

«نۇر وتان» پارتياسىنىڭ ورتالىق اپپاراتىندا پارتيا جانىنداعى «ميراس» رەسپۋبليكالىق كەڭەسىنىڭ كەزەكتى وتىرىسى ءوتتى, دەپ حابارلايدى پارتيانىڭ ءباسپاسوز قىزمەتى. پارلامەنت ءماجىلىسىنىڭ دەپۋتاتى, پارتيانىڭ سايلاۋالدى باعدارلاماسىنىڭ «بىرلىك پەن كەلىسىم» باعىتى بويىنشا پارتيالىق كۋراتورى ماۋلەن اشىمباەۆتىڭ توراعالىق ەتۋىمەن وتكەن ءىس-شاراعا پارلامەنتى سەناتىنىڭ جانە ءماجىلىسىنىڭ دەپۋتاتتارى, قازاقستان حالقى اسسامبلەياسىنىڭ وكىلدەرى, عىلىمي جانە شىعارماشىلىق زيالى قاۋىم, ۋاكىلەتتى ورتالىق مەملەكەتتىك ورگانداردىڭ وكىلدەرى جانە «ميراس» رەسپۋبليكالىق كەڭەسىنىڭ مۇشەلەرى قاتىستى. وتىرىستىڭ كۇن تارتىبىندە قازاقستان رەسپۋبليكاسىنىڭ ۇكىمەتى جانىنان قۇرىلعان رەسپۋبليكالىق ونوماستيكالىق جانە تەرمينولوگيالىق كوميسسيالاردىڭ ارالىق قورىتىندى جۇمىستارىن تالقىلاۋ, سونىمەن بىرگە «ميراس» كەڭەسىنىڭ 2016 جىلعى جۇمىستارىن قورىتىندىلاۋ, سونداي-اق كەلەر جىلعى جۇمىس جوسپارىن بەكىتۋ ماسەلەسى قارالدى. ونوماستيكا جانە تەرمينولوگيا سالاسىنداعى اتقارىلعان ءىس-شارالار تۋرالى مادەنيەت جانە سپورت ۆيتسە-ءمينيسترى اقتوتى رايىمقۇلوۆا بايانداما جاساپ: «تاۋەلسىزدىك جىلدارى قول جەتكىزگەن جەتىستىكتەردىڭ ءبىرى - جەر-سۋ, وبەكتىلەرنىڭ اتاۋلارىنا بىرىڭعاي كوزقاراستى قالىپتاستىرۋ, ولاردىڭ ەسەبىن جۇرگىزۋ تاريحي اتاۋلاردى قالپىنا كەلتىرۋ ماقساتىندا ونوماستيكا كوميسسياسىنىڭ جۇمىسى جولعا قويىلىپ, وسى جىلدار ىشىندە رەسپۋبليكا بويىنشا 1348 ەلدى مەكەننىڭ, 6 قالا, 1305 ءبىلىم, مادەنيەت جانە سپورت مەكەمەسىنىڭ, 7958 كوشە مەن داڭعىل اتاۋى وزگەرتىلدى», - دەپ حابارلادى. سونداي-اق, ۆيتسە-مينيستر تەرمينولوگيا سالاسى بويىنشا 2011 جىلعا دەيىن بەكىتىلگەن تەرميندەردىڭ سانى 10 مىڭعا جۋىق بولسا, 2015 جىلى 3 مىڭ تەرمين, ال بيىل 5 مىڭنان اسا تەرمين بەكىتىلگەنىن جەتكىزدى. كوميسسيا بەكىتكەن تەرميندەردىڭ جالپى سانى 18 مىڭدى قۇرايدى ەكەن. الداعى ۋاقىتتا مەملەكەتتىك باعدارلاما اياسىندا بەكىتىلگەن تەرميندەردىڭ سانىن 27 مىڭعا جەتكىزۋ كوزدەلۋدە. ءوز كەزەگىندە مادەنيەتتانۋشى, پۋبليتسيست سەرىك ەرعالي تەرمينولوگيا سالاسىن عىلىم رەتىندە قالىپتاستىرىپ, دامىتۋ ءۇشىن لينگۆيستيكالىق ورتالىقتار مەن كافەدرالار جانىنا تەرمينولوگيا ينستيتۋتىن قۇرۋ كەرەكتىگىن ايتتى. ايتا كەتەيىك, پارتيانىڭ ساياسي كەڭەس بيۋروسىنىڭ شەشىمىنە سايكەس ورتالىق جانە وڭىرلىك دەڭگەيدەگى «ميراس» كەڭەسىنە پارتيانىڭ سايلاۋالدى باعدارلاماسىنىڭ «بىرلىك پەن كەلىسىم» باعىتىنىڭ ورىندالۋىن مونيتورينگىلەۋ, سونىمەن قاتار, قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسىنىڭ جۇزەگە اسىرىلۋىن پارتيالىق باقىلاۋ جاساۋ قىزمەتتەرى جۇكتەلدى. وسىعان وراي, «ميراس» رەسپۋبليكالىق كەڭەسىنىڭ قۇرامى ءتىل ساياساتى سالاسىنىڭ كاسىبي ساراپشىلارىمەن, سونداي-اق, بىرلىك پەن كەلىسىمدى قامتاماسىز ەتۋ, قحا وكىلدەرىمەن جاڭارتىلدى.