وتارىن قاسقىردان قورعاعان شوپان

تاڭ بوزىنان قاس قارايعانعا دەيىن تىنىم تاپپايتىن شوپاننىڭ جاۋاپكەرشىلىگىنە وتاردى يت-قۇسقا جەم قىلماۋ دا جاتادى. ويتكەنى, كۇنى-ءتۇنى ازىق ىزدەپ, دالانى جورتاتىن ءتۇز تاعىسىنىڭ قايدان, قاشان تاپ بولارى بەلگىسىز. قۇرمانعازى اۋدانىنداعى «ماقاش» وندىرىستىك كووپەراتيۆىنىڭ اعا شوپانى ءانۋار قۇباەۆ باعىمىنداعى وتارىن شاشاۋ شىعارمايتىن قىراعىلىق تانىتسا دا, ءتۇز تاعىسىمەن بەتپە-بەت كەزدەسەرىن ەش ويلاماپتى. – شوپاندار قۇس ۇيقىلى بولادى عوي. ءتۇن ورتاسىندا دا ءيتتىڭ ۇرگەنىن ەستىسەم, اۋلاداعى وتاردى ءبىر شولىپ كەلەمىن. سول ءتۇن تىنىش ءوتتى. بىراق, تاڭعى 6-دا ءيتتىڭ ءۇرۋى وزگەشەلەۋ ەستىلدى. ايەلىم مەن ۇلىمدى وياتىپ, دەرەۋ دالاعا شىقتىم. اينالا ءالى قاراڭعى ەدى, – دەيدى ءانۋار قۇباەۆ. – جاقىنداعاندا ءتۇز تاعىسىنىڭ اۋلاعا سەكىرىپ تۇسكەنىن انىق بايقادىم. اۋلانىڭ جانىنداعى ايىردى قولىما الىپ, جۇگىرە جونەلدىم. بۇل كەزدە توسىن «قوناقتان» ۇرىككەن وتار ءۇيىرىلىپ تۇرعان ەدى. سان ايلالى ءتۇز تاعىسى شوپانعا قاراي سەكىرگەن. وزىنە قاراي ۇم­تىلعان ءتۇز تاعىسىنىڭ شالت ارە­كەتىنەن قورعانۋ ءۇشىن ءانۋار ءبىر قولىمەن باسىن قالقالايدى. سول ساتتە قاسقىردىڭ ازۋ ءتىسى جالاڭ قولىنا باتقان شوپان ونى كەرى يتەرىپ ۇلگەرەدى. ەكىنشى قولىنداعى ايىردى قاسقىردىڭ كەۋدەسىنە تۇيرەيدى. كوزدى اشىپ-جۇمعانداي قاس-قاعىم ساتكە سوزىلعان بۇل ايقاس ادامنىڭ جەڭىسىمەن اياقتالدى. ەڭ باستىسى, ءانۋار قۇباەۆتىڭ ومىرىنە قاۋىپ تونگەن جوق. ءسويتىپ, ءوزى ەڭبەك ەتەتىن «ساردار بابا» فەرماسىنىڭ 715 ساۋلىق قويىن ءتۇز تاعىسىنان قورعاپ قالدى. جولداسبەك شوپەعۇل, «ەگەمەن قازاقستان» اتىراۋ وبلىسى