گەولوگيا سالاسىنىڭ ينۆەستيتسيالىق تارتىمدىلىعى ارتادى

ورتالىق كوممۋنيكاتسيالار قىزمەتىنىڭ الاڭىندا «25 جىل ىشىندە گەولوگيالىق سالانىڭ دامۋى تۋرالى. 2016 جىل ءۇشىن قورىتىندىلار» دەگەن تاقىرىپتا ءباسپاسوز كونفەرەنتسياسى ءوتتى. ينۆەستيتسيالار جانە دامۋ مينيسترلىگى گەولوگيا جانە جەر قويناۋىن پايدالانۋ كوميتەتىنىڭ توراعاسى بازارباي نۇراباەۆ 2016 جىلى اتقارىلعان جۇمىستاردىڭ نەگىزگى قورىتىندىلارى, سونداي-اق قازاقستان تاۋەلسىزدىگىنىڭ 25 جىلى ىشىندە قول جەتكىزىلگەن ناتيجەلەر جونىندە باياندادى. ول 2015 جىلدان باستاپ «100 ناقتى قادام» ۇلت جوسپارى شەڭبەرىندە گەولوگيا جانە جەر قويناۋىن پايدالانۋ كوميتەتى 74-ءشى قادام – قپق جانە كسش بويىنشا ەسەپتىلىك ستاندارتتارىنىڭ حالىقارالىق جۇيەسىن (CRIRSCO) ەنگىزۋ بويىنشا جۇمىس جۇرگىزىپ جاتقانىن اتاپ ءوتتى. «2016 جىلدىڭ ماۋسىم ايىندا قازاقستان CRIRSCO كوميتەتىنىڭ 10-شى مۇشەسى بولدى. پايدالى قازبالار قورىنىڭ ەسەبى حالىقارالىق ستاندارتتارىنا كوشۋ مينەرالدىق-شيكىزات كەشەننىڭ ينۆەستيتسيالىق تارتىمدىلىعىن ارتتىرىپ, حالىقارالىق بيرجالارعا شىعۋ ءۇشىن ۇسىنىلاتىن اقپاراتتىڭ اشىقتىعى مەن انىقتىعىن قامتاماسىز ەتەتىنىن ايتا كەتكەن ءجون», – دەدى ب.نۇراباەۆ. ونىڭ ايتۋىنشا, قازاقستاننىڭ گەولوگيالىق بارلاۋىنا ينۆەستيتسيالار تارتۋدى ىنتالاندىرۋ, ينۆەستورلار ءۇشىن قولايلى جاعدايلار تۋدىرۋ ماقساتىندا, ينۆەستيتسيالار جانە دامۋ مينيسترلىگى ەنەرگەتيكا مينيسترلىگىمەن بىرلەسە وتىرىپ, «جەر قويناۋى جانە جەر قويناۋىن پايدالانۋ تۋرالى» كودەكس ازىرلەۋدە. «جالپى, ازىرلەنىپ جاتقان «جەر قويناۋى جانە جەر قويناۋىن پايدالانۋ تۋرالى» كودەكستە قاراستىرىلعان جاڭا تاسىلدەمەلەردى ىسكە اسىرۋ گەولوگيالىق بارلاۋعا ينۆەستيتسيالاردىڭ اعىلىپ كەلۋىنە سەبەپشى بولادى. ناتيجەسىندە, بۇل قازاقستان رەسپۋبليكاسى اۋماعىنىڭ گەولوگيالىق زەردەلەنۋىن ەداۋىر كوتەرۋگە, سونداي-اق ەلىمىزدىڭ گەولوگيالىق-شيكىزات بازاسىن تولىقتىرۋعا مۇمكىندىك تۋدىراتىن بولادى», – دەپ ءمالىم ەتتى كوميتەت توراعاسى.