بۇگىن ابايدىڭ «جيدەباي-ءبورىلى» مەملەكەتتىك تاريحي-مادەني جانە ادەبي-مەموريالدىق قورىق-مۋزەيىندە 16 جەلتوقسان – قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعىنا ارنالعان « ۇلى دالا ەلىنىڭ ۇلىق مەرەكەسى!» اتتى سالتاناتتى جيىن ۇيىمداستىرىلدى.
مەرەكەلىك شارادا اباي مۋزەيىنىڭ ديرەكتورى ب.جۇنىسبەكوۆ «تاۋەلسىزدىك شەجىرەسى – ەرلىك پەن ەلدىكتىڭ شەجىرەسى» تاقىرىبىندا بايانداما جاساپ, ءوز سوزىندە: «تاۋەلسىزدىك – ەڭ باستى قۇندىلىعىمىز. بۇل كۇن قازاقستان تاريحىندا ماڭگى وشپەس التىن ارىپتەرمەن جازىلدى. ارتىنا وشپەس ءىز قالدىرعان, حالقىمىزدىڭ بولاشاعىن ارمان ەتكەن اتا-بابالارىمىزدىڭ ۇلى ابايدىڭ ماقسات-مۇراتىنا ءبىز بۇگىن قول جەتكىزدىك. بۇگىنگى كۇندە ەلباسى نۇرسۇلتان نازارباەۆتىڭ سىندارلى ساياساتى مەن ەلىمىزدىڭ ستراتەگيالىق دامۋ جوسپارىنىڭ ناتيجەسىندە وركەنيەت كوشىنە قازاقستان دەگەن مەملەكەت قوسىلدى. تاۋەلسىز ەلىمىزدە ۇلتارالىق دوستىق پەن بەيبىتشىلىك نىعايىپ, وركەنيەتتى مەملەكەتتەردىڭ قاتارىنان ورىن الدى», - دەپ ايرىقشا اتاپ ءوتتى.
تاۋەلسىزدىگىمىزدىڭ 25 جىلدىعىنا وراي ابايدىڭ مەملەكەتتىك قورىق-مۋزەيىنىڭ ديرەكتورى ب.جۇنىسبەكوۆ «قۇرمەت» وردەنىمەن ماراپاتتالدى.
سونىمەن قاتار, شارا بارىسىندا قالانىڭ زيالى قاۋىم وكىلدەرى, ارداگەرلەر مەن مۋزەي قىزمەتكەرلەرىنە «قازاقستان رەسپۋبليكاسىنىڭ تاۋەلسىزدىگىنە 25 جىل» مەرەكەلىك مەدالى تاپسىرىلدى.
