ەلباسى ەردوعانعا ىستانبۇلداعى تەراكتىگە بايلانىستى كوڭىل ايتتى

قازاقستان پرەزيدەنتى نۇرسۇلتان نازارباەۆ تۇركيا پرەزيدەنتى رەدجەپ ەردوعانعا ىستامبۇلداعى تەراكتىگە بايلانىستى كوڭىل ايتۋ جەدەلحاتىن جولدادى, - دەپ حابارلايدى اقوردانىڭ ءباسپاسوز قىزمەتى. جەدەلحاتتا مەملەكەت باسشىسىنىڭ قايعىلى وقيعانى زور كۇيزەلىسپەن قابىلداعانى اتاپ وتىلگەن. نۇرسۇلتان نازارباەۆ بۇكىل قازاقستاندىقتاردىڭ جانە جەكە ءوزىنىڭ اتىنان قازا بولعانداردىڭ تۋعان-تۋىستارى مەن جاقىندارىنا, سونداي-اق بارشا تۇركيا حالقىنا كوڭىل ايتىپ, جارالانعانداردىڭ تەز ساۋىعىپ كەتۋىنە تىلەكتەستىك ءبىلدىردى. ەسكە سالا كەتەيىك, بۇگىن تۇندە ىستامبۇلدا بىردەن ەكى تەراكت بولىپ, قازا تاپقانداردىڭ سانى 29 ادامعا جەتكەن بولاتىن. وقيعا ورنىنداعى جەرگىلىكتى تەلەارنا مالىمەتىنشە, پوليتسەيلەر وتىرعان اۆتوبۋستىڭ ماڭىندا مينالانعان كولىك جارىلىپ كەتكەن. جارىلىستان زارداپ شەككەندەردىڭ بارلىعى - پوليتسەيلەر. ال كەيىنىرەك تۇركيا پرەزيدەنتى ىستامبۇلدا بولعان تەراكتىگە بايلانىستى مالىمدەمە جاسادى. اگەنتتىكتىڭ مالىمەتىنشە, ەردوعان تەرروريستىك اكت قاۋىپسىزدىك قىزمەتىندەگىلەر مەن بەيبىت تۇرعىندارعا قارسى ۇيىمداستىرىلعانىن ايتتى. سونىمەن قاتار, پرەزيدەنت تۇركيانىڭ تەرروريستىك ۇيىمدارمەن ءالى دە كۇرەسىپ جاتقانىن ايتتى. ەردوعان تۇركيانىڭ بۇل لاڭكەستەردى جاۋاپكەرشىلىككە تارتاتىنىن ايتىپ ءوتتى.