جالپى, «قازمۇنايگاز» كومپانيالار توبىنا قارايتىن مۇناي وڭدەيتىن پاۆلودارلىق الىپ كاسىپورىننىڭ جاڭعىرتۋ جۇمىستارى 2016 جىلى اياقتالۋى كەرەك-ءتى. بىراق, پمحز-نىڭ جاڭعىرتۋ جۇمىستارىن اياقتاۋ شىلدە ايىنان قاراشا ايىنا اۋىستىرىلىپتى.
– كاسىپورىندا بىلتىر تامىز ايىندا بولدىم, − دەدى ق.بوزىمباەۆ. – قازىر ناتيجە بايقالادى. بيىل دا جاڭادان ەكى قۇرىلعى نىسانى سالىنىپتى. شىلدە ايىندا ىسكە قوسىلادى دەگەن ويدامىن. قۇرىلىس الاڭىنا كەيبىر قۇرىلعىلاردىڭ كەش كەلۋىنە وراي ۇشەۋى كەشىرەك قوسىلادى. قازان ايىنىڭ باسىندا زاۋىتقا كۇردەلى جوندەۋ جۇمىستارىن جۇرگىزۋگە رۇقسات بەرەمىز. ءسويتىپ, 3-4 ايدىڭ ىشىندە زاۋىت جيناقتالىپ قالۋى كەرەك. ەلىمىزگە اسا قاجەت اۋە وتىنى شىعارىلاتىنى وتە ماڭىزدى. جاڭعىرتۋدان كەيىن ءونىم ەلىمىزدە 2018 جىلدان باستاپ قولدانىلۋى ءتيىس ك-4 جانە ك-5 تالاپتارىنا ساي بولادى.
ەگەر تاعى دا ءبىر وزگەرىس جاسالىپ, جاڭعىرتۋ جۇمىستارىنىڭ اياقتالۋىن كەشىكتىرگەن جاعدايدا باسشىلىق جاۋاپكەرشىلىككە تارتىلۋى مۇمكىن ەكەندىگى دە ەسكەرتىلدى. ويتكەنى, كاسىپورىننىڭ جاڭعىرتۋ جوباسىنىڭ بارىسىندا 2011-2017 جىلدار ارالىعىندا كەدەن وداعىنىڭ تەحنيكالىق باعدارلارىنىڭ تالاپتارىنا ساي ك4 ەكولوگيالىق دارەجەدەگى موتور وتىنىن شىعارۋى كوزدەلگەن. جاڭعىرتۋ جۇمىستارى اياقتالعان سوڭ, زاۋىتتا ەكولوگيالىق تالاپتارعا ساي كەلمەيتىن اي-80 ماركالى بەنزين وڭدەلمەيدى. زاۋىت جاقىن ارادا اۆياوتىن ءوندىرۋدى باستايدى. ورناتىلعان جاڭا قۇرىلعىلار قۇرىلىسى Jet A حالىقارالىق ستاندارتتاعى اۋە تاسىمالىنا قاجەتتى وتىن شىعارۋعا مۇمكىندىك بەرەدى. كاسىپورىندا 6 ميل-
ليون تونناداي مۇناي وڭدەلەدى. زاۋىتقا ەلىمىزدەگى مۇناي وڭدەيتىن 3 زاۋىتتىڭ مۇناي ونىمدەرىنىڭ جالپى جىلدىق كولەمىنىڭ 30 پايىزى تيەسىلى. جاڭعىرتۋ جۇمىستارىنان سوڭ مۇناي وڭدەۋ قۋاتتىلىعى 6,5 ميلليون تونناعا كوبەيمەك.
«پمحز» جشس باس ديرەكتورى شۋحرات دانباي مينيسترگە كاسىپورىنداعى جاڭا تەحنولوگيالىق كەشەندەردەگى جوعارى وكتاندى سۇيىق بەنزيندى ساقتاۋ قويماسىن جانە اۆتوماتتاندىرىلعان بەنزين ارالاستىرۋ ستانساسىن, كۇكىرت ءوندىرۋ سياقتى باسقا دا قوندىرعىلارداعى قۇرىلىس-مونتاجداۋ جۇمىستارىنىڭ اياقتالعانى جايىندا باياندادى. بۇل نىساندارداعى كۇكىرت ءوندىرۋ قوندىرعىسى شىلدە ايىندا, ال يزومەرلەۋ جانە نافتا سپليتتەرى قوندىرعىسى قىركۇيەكتە اياقتالادى دەپ جوسپارلانعان. قازىر نىسانداردى ىسكە قوسۋعا ارنايى دايىنداۋ, ازىرلىك جۇمىستارى جۇرگىزىلۋدە. زاۋىت ماماندارى جاڭعىرتۋ جۇمىستارى اياقتالعاننان كەيىن جوعارى وكتاندى ك4 كولىك جانار-جاعارمايىن ءوندىرۋ كولەمى 297 مىڭ تونناعا دەيىن ارتادى دەپ وتىر.
مينيستر زاۋىت جۇمىسشىلارىن, مۇناي وڭدەۋشىلەردى وندىرىستەگى ەنەرگيانىڭ جۇمسالۋى مەن تەحنولوگيالىق شىعىنداردى ازايتۋعا شاقىردى. ەڭ باستىسى, رەسەيدەن كەلەتىن مۇنايدىڭ ساپاسىنا ءمان بەرۋدى تاپسىردى.
جالپى ينۆەستيتسيالىق جاڭعىرتۋ جوباسىنىڭ قۇنى 212,3 ملرد تەڭگەنى قۇرايدى. جوبالاۋ, قۇرال-جابدىقتاردى جەتكىزۋ جانە قۇرىلىس جۇمىستارى «قازمۇنايگاز» ۇك» اق پەن «قازاقستان دامۋ بانكى» اق-تىڭ قارىز قاراجاتى ەسەبىنەن, سونداي-اق, «پمحز» جشس-ءنىڭ ءوز قاراجاتى ەسەبىنەن قارجىلاندىرىلادى. جوبا بويىنشا مەردىگەرلەر – Rominserv S.R.L. كومپانياسى – «قمگ» ۇك» اق قۇرامىنا كىرەتىن KMG International N.V. رۋمىن مۇناي كومپانياسىنىڭ ەنشىلەس بولىمشەسى, سونداي-اق, قىتايلىق NFC كومپانياسى.
فاريدا بىقاي,
«ەگەمەن قازاقستان»
پاۆلودار
سۋرەتتى تۇسىرگەن
ۆالەري بۋگاەۆ
