شىمكەنت قالاسىندا «قازترانسگاز ايماق» اق «نۇر وتان» پارتياسىنىڭ وبلىستىق فيليالىمەن بىرلەسىپ, جىلجىمالى قوعامدىق قابىلداۋ ۇيىمداستىردى. بۇل شارا ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىن ناسيحاتتاۋ, وڭىردەگى گازداندىرۋدىڭ وزەكتى ماسەلەلەرى جانە ازاماتتاردىڭ گازبەن جابدىقتاۋ جونىندەگى ءوتىنىش-تىلەكتەرىن قاراستىرۋ ماقساتىمەن ۇيىمداستىرىلىپ وتىر.
بۇل جولعى وتىرىس كوگىلدىر وتىننىڭ كۇرمەۋلى ماسەلەلەرىنە ارنالدى.
ازاماتتاردى ارىز-شاعىمدارى بويىنشا «نۇر وتان» پارتياسى وڭتۇستىك قازاقستان وبلىستىق فيليالى توراعاسىنىڭ ورىنباسارى ەركەبۇلان داۋىلباەۆ, رەسپۋبليكالىق گاز سالاسى ارداگەرلەرى كەڭەسىنىڭ توراعاسى پاۆەل كليموۆ, «قازترانسگاز ايماق» اق وقوف ديرەكتورىنىڭ ءبىرىنشى ورىنباسارى اسقار ماۋكەنوۆ, «ومەگا-ءححى» جشس ديرەكتورىنىڭ گاز ماسەلەسى بويىنشا ورىنباسارى اسحات جايلاۋبەك قابىلدادى.
العاشقى قوعامدىق قابىلداۋعا كىرگەن شىمكەنت قالاسىنىڭ تۇرعىنى نۇركەن ابدۋللاەۆتى مازالاپ جۇرگەن ساۋال ۇيىندە ەسەپتە تۇراتىن ادامداردىڭ سانىن وزگەرتۋ قاجەتتىگىنە قاتىستى ەكەن. ويتكەنى, ەسەپتەگىش قۇرال بۇزىلعان جاعدايدا تولەم ۇيدەگى تۇراتىن بارلىق ازاماتتار سانىنا شاعىلادى ەكەن. تىركەۋدە تۇرعانى بولماسا باسقا جەردە تۇراتىن
تۋىسقاندارى ءۇشىن بەكەرگە اقشا تولەگىسى جوق.
بۇل سۇراققا «ومەگا-ءححى» جشس-ءنىڭ قىزمەتكەرى اسحات جايلاۋبەك تولىققاندى جاۋاپ بەردى. ەسەپتەگىش قۇرال بۇزىلعان جاعدايدا كوگىلدىر وتىننىڭ سول ۇيدە تۇراتىن ادامداردىڭ سانىنا قاراي نورماتيۆ بويىنشا تولەنەتىندىگى راس. ەسەپتەگىش قۇرالدارى مۇلدە ورناتىلماعان ۇيلەر ءالى دە بار. ونداي ۇيلەرگە كوپ ادام تىركەلگەنىمەن, شىن مانىندە ءبىر عانا ادام تۇرۋى مۇمكىن. سوندىقتان, حالىققا قىزمەت كورسەتۋ ورتالىعىنان انىقتاما اكەلىپ, «ومەگا-ءححى» سەرىكتەستىگىنە قۇجاتتارىن وتكىزۋى كەرەك.
قابىلداۋعا ەكىنشى كىرگەن ەلميرا ەسەنقۇلوۆانىڭ سۇراعى «نەگە ەسەپتەگىش قۇرال بۇزىلعان جاعدايدا ايىپپۇل سالىنادى؟» دەگەن سىڭايدا بولدى.
گاز سالاسى ماماندارىنىڭ ءتۇسىندىرۋى بويىنشا, ءار بەس جىلدا ەسەپتەگىش قۇرالدار اۋىستىرىلۋعا ءتيىس. كەيدە ول مەرزىمگە جەتپەي ىستەن شىعۋى مۇمكىن. ال ونى تۇرعىندار گاز مەكەمەسىنە ايتپاي جۇرە بەرەدى. باقىلاۋشى بارعان زاماتتا عانا انىق بولادى. ايىپپۇل سالىنۋىنىڭ ءمانىسى وسى.
قامىتبەك ساۋقىمبەكوۆ اقساقال جاڭا جەر ءۇي ساتىپ العان ەكەن. ەندى ونى ءوز اتىنا رەسىمدەۋ ءۇشىن قانداي قۇجات كەرەك. ونىڭ ۇستىنە, ءۇي ساتىپ الىنعاننان كە-
ءيىن بۇرىنعى قوجايىننىڭ كوگىلدىر وتىنعا بەرەشەگى بارى انىقتالعان. وسىنداي جاعدايدا نە ىستەۋى كەرەك؟ سالا ماماندارى قايتا رەسىمدەۋدە ەش قيىندىق جوعىن ايتقان. قۇجاتتاردى تولىق تاپسىرعان جاعدايدا تۇبىرتەك تىكەلەي جاڭا يەسىنىڭ اتىنا جولدانادى. ال بۇرىنعى بەرەشەككە كەلسەك, ء ۇيدى ساتىپ الۋ كەزىندەگى قۇجاتتار نەگىزگە الىنباق.
قامىتبەك اقساقال گاز باعاسى نەگە ءار وڭىردە ارقيلى دەگەن سا-
ۋال تاستادى. رەسپۋبليكالىق گاز سالاسى ارداگەرلەرىنىڭ كەڭەسى قوعامدىق ۇيىمىنىڭ توراعاسى پاۆەل كليموۆتىڭ پىكىرىنشە, گاز جانە گازبەن جابدىقتاۋ سالاسىنداعى باعا ساياساتىن قازترانسگاز ءوز ەركىمەن جۇرگىزە المايدى. ىشكى نارىقتاعى تاۋارلى گازدى وتكىزۋدىڭ شەكتى كوتەرمە باعاسىن بەلگىلەنگەن ءتارتىپ بويىنشا ءار ءوڭىر ءۇشىن جەكە-جەكە ەنەرگەتيكا مينيسترلىگى بەكىتەدى. ال تۇتىنۋشى پايدالاناتىن گازدىڭ شەكتى باعاسىن ۇلتتىق ەكونوميكا مينيسترلىگىنە قاراستى تابيعي مونوپوليالاردى رەتتەۋ, باسەكەلەستىكتى جانە تۇتىنۋشى قۇقىعىن قورعاۋ كوميتەتى بەكىتىپ, باقىلايدى.
شىنتۋايتىندا, «قازترانسگاز» كومپانياسى گاز سالاسىنداعى ۇلتتىق وپەراتور بولا تۇرا, ىشكى نارىقتا گاز وتكىزۋدەن ميللياردتاعان شىعىن كورىپ وتىر. سەبەبى, گاز تۇتىنۋشىلارعا ساتىپ الىنعان ءوز قۇنىنان تومەن باعاعا ساتىلىپ وتىر. شىعىندى قازترانسگاز ءوز ەسەبىنەن جاۋىپ كەلەدى.
جاۋاپ دايەكتى بولعاندا ارتىق سۇراقتىڭ تۋىنداماۋى دا زاڭدى. كەزەكتى قابىلدانۋشى ابۋسادىق مومبەكوۆ ۇيىندە گازعا تولەمنىڭ قوردالانىپ قالعانىن, سوندىقتان دەبيتورلىق قارىزدى ءبولىپ تولەۋ جايىن ءوتىندى.
قوعامدىق قابىلداۋدا ۇلكەن-كىشى دەگەن ماسەلە جوق. تۇر-
عىنداردىڭ ساۋالى قاناعاتتاندىرىلۋى كەرەك. تۇرعىندار شەشىمىن تاپپاعان ماسەلەلەر بويىنشا جاۋاپتارىن الدى.
ەنەرگەتيكا مينيسترلىگىنىڭ مالىمەتى بويىنشا, بۇگىنگى كۇنگە دەيىن ەل تۇرعىندارىنىڭ جارتىسى «كوگىلدىر وتىنمەن» قامتاماسىز ەتىلگەن. اۋقىمدى شارالاردى جۇزەگە اسىرۋ كەزىندە تۇرعىندار اراسىندا داۋلى سۇراقتاردىڭ تۋىنداماۋى مۇمكىن ەمەس. «ەلدى مەكەندەردى گازداندىرۋ كەزىندە قازاقستاندىقتاردى مازالاعان ماسەلەلەردى شەشىپ, ءتۇسىندىرۋ جۇمىستارىن جۇرگىزۋ ءۇشىن «نۇر وتان» پارتياسىنىڭ قوعامدىق قابىلداۋى اياسىندا وسىنداي كەزدەسۋ ۇيىمداستىرۋ تۋرالى شەشىم قابىلداندى», دەدى پاۆەل كليموۆ.
سونىمەن قاتار, جوسپارلانعان شارالار اياسىندا قوعام بەلسەندىلەرىن, «اقساقالدار القاسى» وكىلدەرىن شىمكەنت قالاسىن گازداندىرۋ بارىسىمەن, ەسكىرگەن گاز تاراتۋ جەلىلەرىن جاڭعىرتۋ باعدارلاماسى بويىنشا جاڭارتىلعان نىساندارمەن تانىستىردى. گازداندىرۋمەن اينالىساتىن مەردىگەر كومپانيالارمەن باسقوسۋ ۇيىمداستىرىلىپ, گاز كومپانياسىنىڭ جاس ماماندارىمەن شەبەرلىك-ساباقتارى وتكىزىلدى. ولاردىڭ بارىسىندا تاجىريبە الماسۋ, ەلىمىزدى رۋحاني تۇرعىدا جاڭعىرتۋ جونىندەگى ەلباسى باستاماسىنىڭ وزەكتى تۇستارى تالقىعا ءتۇستى.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
