كەزدەسۋدە تاراپتار قازاقستان مەن قىتاي حالىق رەسپۋبليكاسى اراسىنداعى ەكىجاقتى ىنتىماقتاستىقتىڭ احۋالى جانە ونى دامىتۋ پەرسپەكتيۆالارى جونىندە پىكىر الماستى.
- ءبىزدىڭ قارىم-قاتىناسىمىز باسقا مەملەكەتتەر ءۇشىن ۇلگى بولارلىقتاي. 2014 جىلعى كەزدەسۋدە ءبىز ءوندىرىس اشۋ, كولىك جۇيەلەرىن ءبىر-بىرىمەن جالعاستىرۋ جونىندەگى جوبالاردى ىسكە اسىرۋ ماسەلەسىن كوتەردىك. سونداي-اق, تاعى بىرقاتار ماڭىزدى جوبالاردى جۇزەگە اسىرۋىمىز كەرەك, - دەدى قازاقستان پرەزيدەنتى.
نۇرسۇلتان نازارباەۆ ينتەگراتسيالىق پروتسەستەردىڭ ماڭىزدىلىعىنا توقتالىپ, ء«بىر بەلدەۋ, ءبىر جول» باستاماسىنىڭ قازىرگى جاعدايداعى ەرەكشە ءرولىن اتاپ ءوتتى. مەملەكەت باسشىسى «نۇرلى جول» مەن جىبەك جولى باعدارلامالارىن ءبىر-بىرىمەن ۇشتاستىرۋدىڭ وڭ ناتيجەلەرىنە نازار اۋداردى. سونىمەن قاتار, تاراپتار مەملەكەتتەر اراسىندا تاۋار اينالىمى كولەمىن ۇلعايتۋ ماسەلەلەرىن, قازاقستاننىڭ ترانزيتتىك الەۋەتىن پايدالانۋ پەرسپەكتيۆالارىن, تەحنولوگيالاردى جانە ەكولوگيالىق تۇرعىدان تازا زاماناۋي ءوندىرىستى دامىتۋ اسپەكتىلەرىن, سونداي-اق ەنەرگەتيكا مەن اۋىل شارۋاشىلىعى سالالارىندا ءوزارا ءىس-قيمىل ورناتۋ جايىن تالقىلادى.
قازاقستان پرەزيدەنتى كەزدەسۋ سوڭىندا لي كەتسياندى ەلىمىزگە ساپارمەن كەلۋگە شاقىردى.
