قول قويىلعان مەموراندۋم استانادا 2018 جىلعى قاڭتاردىڭ 10-ىنان 14-ىنە دەيىن حوككەي جۇلدىزدارىنىڭ اپتاسىن وتكىزۋدى قاراستىرادى جانە وعان ءبىر فورماتتا ايەلدەردىڭ حوككەي ليگاسى جۇلدىزدارىنىڭ ماتچى, ەرلەر حوككەي ليگاسىنىڭ ۇندەۋ كۋبوگى, قحل جۇلدىزدارىنىڭ ماتچى, سونىڭ ىشىندە شەبەرلىك-شوۋ كىرەدى.
«اتالعان مەموراندۋمنىڭ ماڭىزى زور. استانادا حوككەي جۇلدىزدارىنىڭ اپتاسىن وتكىزۋ بارلىعىمىز ءۇشىن قۋانىشتى ءارى قۇرمەتتى وقيعا. ليگانىڭ ۇزدىك ويىنشىلارىنىڭ ونەرى «بارىس» جانكۇيەرلەرى ءۇشىن عانا ەمەس, استانانىڭ بارلىق تۇرعىندارى ءۇشىن ۇمىتىلماس وقيعا بولاتىنى انىق. ەلوردا بىرنەشە كۇنگە ەۋرازيانىڭ حوككەي استاناسىنا اينالادى», دەپ ءمالىم ەتتى قالا باسشىسى.
سونداي-اق, اكىم ليگا باسشىلىعىمەن بىرگە ەلوردا اكىمدىگى جارىستاردىڭ جوعارى ۇيىمداستىرۋشىلىق دەڭگەيدە ءوتۋى ءۇشىن شارالار قابىلداناتىنىن جەتكىزدى.
«جالپى, ءبىزدىڭ قالامىزدا سپورت جاقسى دامىعان. استانانى دەنساۋلىعى مىقتى ادامداردىڭ قالاسىنا اينالدىرماقپىز. بۇل جۇمىستاعى باستى باعىتتاردىڭ ءبىرى - ساۋ ۇلت پەن بولاشاق ۇرپاقتىڭ كەپىلى رەتىندە بۇقارالىق سپورتتى دامىتۋ. بۇگىندە ەلوردا حالقىنىڭ تورتتەن ءبىرى دەنە شىنىقتىرۋمەن جانە سپورتپەن اينالىسادى. مەملەكەت باسشىسى 2020 جىلعا دەيىن قالانى دامىتۋ باعدارلاماسىندا جۇيەلى تۇردە سپورتپەن شۇعىلداناتىن ەلوردا تۇرعىندارىنىڭ سانىن 30 پايىزعا جەتكىزۋ تۋرالى تاپسىرما قويدى», دەدى اكىم.
«استانا حوككەي جۇلدىزدارىنىڭ اپتاسىن وتكىزۋ ورنى رەتىندە كەزدەيسوق تاڭدالىپ وتىرعان جوق. قازاقستان استاناسى ينفراقۇرىلىمى دامىعان, قحل-داعى ەڭ زاماناۋي جانە جايلى ارەنالارى بار قالا. قازاقستان تۇرعىندارىنىڭ حوككەيدى سۇيەتىندەرى بارشاعا بەلىلى, جەرگىلىكتى ازاماتتار ويىندى جاقسى تۇسىنەدى, سول سەبەپتى حوككەي جۇلدىزدارىنىڭ اپتاسىن قۋانىشپەن قابىلدايتىنىنا سەنىمدىمىز. وسىدان ءبىر جىل بۇرىن ۋفادا وتكەندەي, ءبىز شاراعا دايىندىق جانە ونى ۇيىمداستىرۋدىڭ جوعارى دەڭگەيىن قامتاماسىز ەتەتىن ايرىقشا كەلىسىمگە وتىردىق. استانا-2018 شاراسى جۇلدىزدى شوۋ تاريحىنداعى جارقىن بەتتەردىڭ ءبىرى بولاتىنىنا سەنىم مول», دەپ ءمالىم ەتتى قحل پرەزيدەنتى دميتري چەرنىشەنكو.
استاناعا حوككەي جۇلدىزدارىنىڭ اپتاسى 2018 شاراسىن وتكىزۋ قۇقىعىن بەرۋ تۋرالى شەشىم ليگاعا ءتورت ۇمىتكەر قالادان تۇسكەن وتىنىشتەردى زەرتتەگەن سوڭ قابىلدانعان. ۇمىتكەرلەر اراسىندا استانامەن بىرگە ۆلاديۆوستوك, قازان جانە حەلسينكي قالالارى بولعان. قحل ارنايى كوميسسياسى ءار ءوتىنىشتى مۇقيات قاراپ, تالاپتارعا سايكەستىگىن تەكسەرىپ, جۇمىس قورىتىندىسى بويىنشا استانانى تاڭدادى. قازاقستان ەلورداسى حوككەي ماۋسىمىنىڭ باس شوۋىن وتكىزۋ قۇقىعىنا يە بولعان توعىزىنشى قالا.
