جيىننىڭ اشىلۋ سالتاناتىنا قاتىسقان ايماق باسشىسى جانسەيىت تۇيمەباەۆ تۇركى ەلدەرىنە ورتاق تەلەارنا قۇرۋ مەن اقپارات الماسۋ ماسەلەسىن كوتەردى.
«اقپاراتتىق كەڭىستىك قۇرۋداعى باستى ماقساتىمىز – قازاقستان, تۇركيا, ءازىربايجان, تۇركىمەنستان, قىرعىزستان, وزبەكستان, تاتارستان سياقتى تۇركى ەلدەرىمەن قاتار, جەر شارىنداعى تۇركى قاۋىمداستىقتارىمەن اقپارات سالاسىندا ىنتىماقتاستىق ورناتا وتىرىپ, جەدەل اقپارات الماسۋ, باسپاسوزدە سەرىكەستىك قۇرۋ, ءتۇبى ءبىر تۇركىگە ورتاق تاريح, مادەنيەت, ءبىلىم, ونەر, رۋحاني قۇندىلىقتاردى بىرگە ناسيحاتتاۋ بولماق. ياعني, ول ءبىزدىڭ بىرلىگىمىزگە, رۋحاني, ساياسي جانە ەكونوميكالىق بايلانىستارىمىزدىڭ نىعايۋىنا جۇمىس ىستەيتىن ۇلكەن دۇنيە بولادى دەگەن سەنىمدەمىن. ورتاق تاريحتى زەرتتەپ, ۇعىنۋعا, ءبىر-ءبىرىمىزدى تانىپ, مادەنيەتىمىزدىڭ جاقىنداسۋىنا ورتاق تەلەارنانىڭ اشىلۋى ۇلكەن ۇلەس قوسادى», – دەدى وبلىس اكىمى.
سونىمەن قاتار, فورۋمدا ءسوز العان تۇركسوي حالىقارالىق ۇيىمىنىڭ باس حاتشىسى دۇيسەن قاسەيىنوۆ تۇركى حالىقتارىنىڭ مادەني, رۋحاني ينتەگراتسياسىنداعى اقپارات قۇرالدارىنىڭ ماڭىزىنا توقتالدى.
بۇدان بولەك, حالىقارالىق تۇركى اكادەمياسىنىڭ باسشىسى دارحان قىدىرالى قاتىسۋشىلارعا تۇركى جۇرتىنىڭ قارىمدى جۋرناليستەرى باس قوسقان مەديا فورۋمعا ۇلكەن قولداۋ بىلدىرگەن قر اقپارات جانە كوممۋنيكاتسيالار ءمينيسترى داۋرەن اباەۆتىڭ ارنايى قۇتتىقتاۋ حاتىن وقىپ بەردى.
فورۋم جۇمىسىنا قاتىسقان تۇركى تىلدەس جۋرناليستەر مەملەكەتتەر اراسىندا اقپارات الماسۋدىڭ تيىمدىلىگىن ارتتىرۋ جايىن ءسوز ەتىپ, الداعى ۋاقىتتا تىعىز قارىم-قاتىنىستا جۇمىس جاساسۋ تۋرالى كەلىسىمگە كەلدى.
