كەزدەسۋدە سەرگەي تيموفەەۆ قۇرىلىس جۇمىستارىنا قويىلاتىن نورماتيۆتىك تالاپتار ەلىمىز بويىنشا بىردەي ەكەنىن, بۇل ورايدا كليماتتىق ەرەكشەلىكتەر ەسكەرىلە بەرمەيتىنىن جەتكىزدى.
ايماق باسشىسى ماسەلەنى زاڭنامالىق نەگىزدە شەشۋ مۇمكىندىگىن ايتا كەلىپ, كەز كەلگەن بوس ورىندارعا قالاي بولسا سولاي سالىناتىن قۇرىلىستاردى قاتتى سىنعا الدى. قۇرىلىس جۇيەسىن جەتىلدىرۋ قاجەتتىگىن اتاپ كورسەتتى.
«كوپ قاباتتى ۇيلەردىڭ رەتسىز بوي كوتەرۋى سالدارىنان شاحاردىڭ سۇرقى قاشىپ تۇر. بىرىزدەندىرىلگەن ارحيتەكتۋرالىق شەشىم جوق. ءۇي, كوممۋنيكاتسيا, جارىقتاندىرۋ كەشەندى بولۋى ءتيىس», دەدى قۇمار ىرگەباي ۇلى.
جەكە كاسىپكەر الەكساندر ەششانوۆ گيپەرپرەستى كىرپىشتى دايىنداپ, ساتۋ جايىندا اڭگىمە قوزعادى. اكىم ءونىمنىڭ ساپاسى تەكسەرىلگەننەن كەيىن «نۇرلى جەر» باعدارلاماسى بويىنشا جەكە تۇرعىن ءۇي قۇرىلىسى جوبالارىن ىسكە اسىرۋ شارالارى جۇزەگە اسىرىلاتىنىن ايتتى.
ءتيىستى ورىندارعا «سولنەچنىي» شاعىن اۋدانىنىندا سالىناتىن ۇيلەردىڭ ارحيتەكتۋرالىق تالاپتارعا ساي بولۋىن تاپسىردى.
ءومىر ەسقالي,
«ەگەمەن قازاقستان»
