بوكس
«استانا ارلانس» بوكس كلۋبى بۇكىلالەمدىك بوكس سەرياسى (WSB) اياسىنداعى شيرەك فينالدىق كەزدەسۋلەرىن قاراعاندى قالاسىنداعى سەرىك ساپيەۆ اتىنداعى بوكس ورتالىعىندا وتكىزەتىن بولدى.
اۋەلدە بۇل جەكپە-جەكتەر وڭتۇستىك استاناداعى «الماتى ارەنا» سپورت سارايىندا وتەدى دەپ جوسپارلانعان ەدى.
ەسكە سالار بولساق, «ارلانداردىڭ» شيرەك فينالداعى قارسىلاسى رەسەيدىڭ «پاتريوت بوكسينگ تيم» بوكس كلۋبى. العاشقى كەزدەسۋ بۇگىن رەسەيدىڭ كەمەروۆو قالاسىندا وتسە, قارىمتا جەكپە-جەكتەر 20 مامىر كۇنى قاراعاندىدا ۇيىمداستىرىلادى.
تەننيس
قازاقستاندىق تەننيسشى زارينا دياس ايەلدەر تەننيسى قاۋىمداستىعىنىڭ (WTA) جاڭارتىلعان رەيتينگىسىندە 151-ءشى ورىنعا كوتەرىلدى. بۇعان دەيىن تەننيسشى قىزىمىز 187-ورىندا تۇرعان بولاتىن.
ال قازاقستاننىڭ ءبىرىنشى راكەتكاسى يۋليا پۋتينتسەۆا ءبىر ساتى تومەن سىرعىپ, 32-ءشى ورىنعا ءتۇستى.
جالپى, ايەلدەر اراسىنداعى تەننيسشىلەردىڭ ۇزدىك ۇشتىگى وزگەرىسسىز قالدى. توپتى امەريكالىق تەننيسشى سەرەنا ۋيليامس باستاپ كەلەدى. ەكىنشى ورىندا نەمىس تەننيسشىسى – انجەليك كەربەر. ال ۇشتىكتى چەحتىڭ تەننيسشى قىزى كارولينا پليشكوۆا تۇيىندەپ تۇر.
ەركىن كۇرەس
ورىنبوردا قىزدار اراسىندا ەركىن كۇرەستەن وتكەن حالىقارالىق تۋرنيرگە رەسەي مەن قازاقستاننان 205-گە تارتا بالۋان قاتىستى.
جارىستان ەلىمىزدىڭ نامىسىن قورعاعان ماڭعىستاۋ وبلىسىنىڭ بالعىن بالۋاندارى ولجالى ورالدى. ولار ءبىر التىن, ءبىر كۇمىس جانە ەكى قولا مەدال الىپ, جانكۇيەرلەرىن قۋانىشقا بولەدى.
التىن جۇلدەنى 38 كيلودا ونەر كورسەتكەن مارال تاڭىربەرگەنوۆا جەڭىپ السا, اسەم قايبۋللاەۆا (43 كگ) كۇمىس مەدالدى قاناعات تۇتتى. ال الەنا ەلەسەەۆا (32 كگ) مەن سابينا قايبۋللاەۆا (38 كگ) قولا جۇلدەگە قول جەتكىزدى.
ازىرلەگەن
قايرات جۇنىس ۇلى
