تاۋەلسىز ەلدىڭ تۇعىرى بيىك, ىرگەسى بەكەم بولۋى جولىندا ەڭبەكتەنىپ كەلە جاتقان سونداي ەرلەر بار. ولار ەلگە ەرەن ەڭبەك سىڭىرۋمەن جانە ەلدىڭ تۇراقتىلىعىن قامتاماسىز ەتۋمەن قاتار, مەملەكەتتىك تۇراقتىلىقتى دا ناسيحاتتايدى. ەلباسى نۇرسۇلتان نازارباەۆ «قاستەرلى وتانىمىزعا قالتقىسىز قىزمەت ەتۋ جانە ونى قورعاۋ – ءاربىر ازاماتتىڭ قاسيەتتى بورىشى», دەگەن بولاتىن. حالىقتىڭ قاھارمان ۇلدارى دا, قول باستاعان پەرزەنتتەرى دە وتان دەگەن ۇلى ۇعىمنىڭ الاسارماۋىن, تىنىشتىق پەن تاتۋلىقتىڭ تۇعىرعا كوتەرىلۋىن كوزدەدى.
الاش ارداقتىسى ءاليحان بوكەيحانوۆ «ۇلتقا قىزمەت ەتۋ بىلىمنەن ەمەس, مىنەزدەن» دەگەندە دە وسىنداي باتىل مىنەزدى مەڭزەگەن بولار. بۇگىنگى تاڭدا قورداي اۋدانى, وتار قالاسى, گۆاردەيسك قالاشىعى №40 اسكەري بازاسى 75263 اسكەري ءبولىمىنىڭ كومانديرى قىزمەتىن اتقارىپ جۇرگەن نۇرلان ابدىقادىروۆ تا الدىڭعى تولقىننىڭ ەرلىك جولىن جالعاستىرىپ كەلە جاتقان ازامات. ەڭبەك جولىن 1999 جىلى ۆزۆود كومانديرى بولىپ باستاعان ول وسى ۋاقىتقا دەيىن اسكەري سالانىڭ ءتۇرلى ساتىلارىنان ءوتتى. ءتۇرلى سىناقتارعا توتەپ بەرگەن ول وتان قورعاۋ جولىنداعى ويىنان اينىعان ەمەس. قايتا كۇن سايىن شىڭدالىپ, تاجىريبە جيناپ كەلەدى. قالىپتاستىرعان تاجىريبەسىن ۇلت تۇراقتىلىعى جولىندا جۇمساۋدى كوزدەيدى.
يراك مەملەكەتىنە 2003 جىلى ەلىمىزدەن ينجەنەرلىك-ساپەرلىك جاساعى جىبەرىلگەنى بەلگىلى. سول كەزدە يراكقا جاساق كومانديرىنىڭ ورىنباسارى بولىپ نۇرلان ابدىقادىروۆ تا اتتانادى. ادام ءومىرى سىنعا ءتۇسىپ, ەل تاعدىرى تالقىعا سالىنعان تۇستا التى اي بويى سول جەردە بەرىلگەن مىندەتتەردى مۇلتىكسىز ورىندايدى. اسكەري سالانىڭ قىر-سىرىن مەڭگەرگەن سول كەزدەگى كاپيتان شەنىندەگى ازامات ءاربىر سىندا ءوز ىسىنە ادال بەرىلگەن مامان ەكەنىن دالەلدەيدى. 2007-2008 جىلدارى الماتى قالاسى 61993 اسكەري بولىمىندە قىزمەت اتقارىپ جۇرگەندە دە قازاقستاندىق بىتىمگەرشىلىك توبىنىڭ قۇرامىنا كىرەدى. بۇل كەزدە مايور شەنىن العان نۇرلان ابدىقادىروۆ مەملەكەتتىڭ مارتەبەسى, ۇلتتىڭ ابىرويى جولىندا ەڭبەك ەتەدى.
– 2008 جىلى ينجەنەرلىك-ساپەرلىك جاساعىنىڭ كومانديرى رەتىندە يراك مەملەكەتىنە ەكىنشى رەت جىبەرىلدىم. يراكتىڭ باعداد, ءال-كۋد قالالارىندا بولىپ, بىتىمگەرشىلىك وپەراتسياسىنا قاتىستىق. ارينە, كۇن سايىن ەمەس, ءسات سايىن ومىرىمىزگە قاۋىپ تونگەن كەزدەر بولدى. ماسەلەن, ول جەردە جارىلعىش زاتتار كوپ. ال ونى تابۋ, تاۋىپ كوزىن جويۋ ءبىزدىڭ مىندەت بولىپ سانالادى. سوندىقتان دا قاتەلەسۋگە ەشقانداي جول جوق ەدى, – دەيدى نۇرلان الپىس ۇلى.
نۇرلان ابدىقادىروۆ 1996-1999 جىلدارى قازاقستان رەسپۋبليكاسى قارۋلى كۇشتەرىنىڭ اسكەري اكادەمياسىن بىتىرگەن. 2012 جىلى رەسەي فەدەراتسياسىنىڭ قارۋلى كۇشتەرىنىڭ قۇرلىق اسكەرلەرى جالپىاسكەري اكادەمياسىنىڭ اسكەري-وقۋ ورتالىعىن اياقتاعان. «جاۋىنگەرلىك ەرلىگى ءۇشىن», ءىى دارەجەلى «ايبىن» مەملەكەتتىك ناگرادالارىمەن ماراپاتتالعان ازامات بۇگىندە ءتورت پەرزەنت تاربيەلەپ وتىر.
نۇرلان الپىس ۇلى اۋەلى اتاق ءۇشىن ەمەس, ابىروي ءۇشىن قىزمەت اتقارىپ جۇرگەنىن ايتتى. بەيبىتشىلىك ءۇشىن باسىن بايگەگە تىگۋگە دايىن ول تاۋەلسىز ەلىمىزدىڭ تۇعىرلانۋىنا اسكەري مامان رەتىندە ۇلەس قوسىپ كەلەدى.
– ەلباسىمىزدىڭ قولداۋى ءبىزدى ءاردايىم جىگەرلەندىرىپ, العا جەتەلەيدى. ەلباسى نۇرسۇلتان نازارباەۆ ءار سوزىندە اسكەري سالاعا ەرەكشە كوڭىل ءبولىپ كەلەدى. بۇل سالادا قىزمەت ەتۋدىڭ اسقان ابىروي ەكەنىن, زور ماقتانىش ەكەنىن ايتادى. باتىر بابامىز باۋىرجان مومىش ۇلى «تارتىپكە باس يگەن قۇل بولمايدى, ءتارتىپسىز ەل بولمايدى» دەگەن ءسوزدى بەكەر ايتپاعان. ءتارتىپ پەن تاربيە – تۇراقتىلىق پەن تاتۋلىقتىڭ كەپىلى, – دەيدى ول ءوز سوزىندە. تالاپ پەن ءتارتىپتى تۋ ەتكەن ازاماتتىڭ وزىنەن كەيىنگى بۋىنعا بەرەرى دە مول. قىرىققا تولماي قامال العان ونىڭ بەيبىت كۇندەگى باتىرلاردىڭ قاتارىندا بولاتىندىعى زاڭدىلىق.
نۇرلان ابدىقادىروۆ بۇل كۇندە پودپولكوۆنيك شەنىندەگى اسكەري قىزمەتكەر. تالاي جىلعى تابان اقى, ماڭداي تەردىڭ اقتالعانىن كوزبەن كورگەن ازامات. ەل مەن جەردىڭ كيەسىن ۇعىنىپ, قاسيەتىن جەتە تۇسىنگەن ادامنىڭ قاشاندا جولى اشىق, جۇلدىزى جوعارى بولماق.
حاميت ەسامان,
«ەگەمەن قازاقستان»
جامبىل وبلىسى
