اتاۋلى سىيلىققا پالاتانىڭ زاڭ شىعارۋشىلىق قىزمەتى جايىندا 2016 جىلدىڭ 1 قىركۇيەگى مەن 2017 جىلدىڭ 14 ماۋسىمى ارالىعىندا جارىق كورگەن ماتەريالدار قابىلدانادى. ال جەڭىمپازدار التى اتالىم − ءماجىلىستىڭ قىزمەتى تۋرالى ۇزدىك تەلەۆيزيالىق, مەرزىمدىك ءباسپاسوز, عالامتور مەن راديوماتەريالدار, سونىمەن بىرگە, فوتو جانە بەينە-ماتەريالدار بويىنشا انىقتالادى. سونداي-اق, قازاقستان پارلامەنتتىك جۋرناليستيكاسىنىڭ دامۋى مەن وركەندەۋىنە ۇلەس قوسقاندار دا ەسكەرىلەتىن بولادى.
سىيلىققا ۇمىتكەر كانديداتتاردى بۇقارالىق اقپارات قۇرالدارىنىڭ باسشىلارى, شىعارماشىلىق وداقتار, قوعامدىق بىرلەستىكتەر ۇسىنادى. سونىمەن قاتار, بۇل بايگەگە ءوزىن ءوزى ۇسىنۋ ارقىلى جەكە جۋرناليستەر دە قاتىسا الادى. ءوتىنىم بۇقارالىق اقپارات قۇرالىنىڭ, شىعارماشىلىق وداقتىڭ, قوعامدىق بىرلەستىكتىڭ رەسمي بلانكىسىندەگى, باسشى نەمەسە ونى الماستىراتىن ادام قول قويعان حات, ءوزىن ءوزى ۇسىنعان جاعدايدا – سىيلىققا ۇمىتكەردىڭ ءوزى قول قويعان حاتىمەن قابىلدانادى.
وسىلارعا قوسىمشا, سىيلىقتان ۇمىتكەر تۋرالى قىسقاشا اقپارات (لاۋازىمى, بايلانىس تەلەفوندارى, پوشتالىق مەكەنجايى, ەلەكتروندىق پوشتاسى) كورسەتىلەدى. جاريالانعان نەمەسە ەفيرگە شىققان ماتەريالداردىڭ ماتىندەرى, اۋديو, بەينە-فوتوماتەريالدار, نە عالامتوردا شىعارىلعان ماتەريالدار ءتيىستى سىلتەمەلەرىمەن بىرگە ۇسىنىلۋى ءتيىس.
وتىنىمدەر 2017 جىلدىڭ 15 ماۋسىمىنا دەيىن پارلامەنت ءماجىلىسىنىڭ سىيلىعىن بەرۋ جونىندەگى كوميسسيا جۇمىس ورگانىنا – ءماجىلىستىڭ ءباسپاسوز قىزمەتىنە – 000001, استانا قالاسى, ماڭگىلىك ەل داڭعىلى, 4, قازاقستان رەسپۋبليكاسى پارلامەنتى ماجىلىسىنە نەمەسە smimazh@parlam.kz ەلەكتروندى مەكەنجايىنا جولدانۋى قاجەت.
ءباسپاسوز باسىلىمدارى مەن عالامتور-باسىلىمداردا جاريالانباعان, سونداي-اق تەلە جانە رادوەفيرگە شىعارىلماعان, پارلامەنت تاقىرىبىنا ساي كەلمەيتىن ماتەريالدار مەن كوميسسيا جۇمىس ورگانىنا قۇجات قابىلداۋ مەرزىمىنەن ءوتىپ كەتكەن ماتەريالدار قاراستىرىلمايدى. كوميسسيا سىيلىققا نوميناتسيالاناتىن جۇمىستاردى باعالاۋ كەزىندە تاقىرىپتىڭ جازىلىپ-كورسەتىلۋ تەرەڭدىگىن, ماتەريالدى بەرۋدەگى كاسىبي شەبەرلىك پەن وبەكتيۆتىلىكتى, ونىڭ كوركەمدىك ەرەكشەلىكتەرىن باعالايدى. ال سىيلىق يەلەرى بايلانىس جانە اقپارات قىزمەتكەرلەرىنىڭ كۇنى قارساڭىندا جاريالانادى.
ايتا كەتەيىك, پارلامەنت ءماجىلىسىنىڭ توراعاسى نۇرلان نىعماتۋلين وتكەن سەسسيانىڭ سوڭىندا جۋرناليستەرگە ارنالعان سىيلىق بەلگىلەۋ بويىنشا ءماجىلىس بيۋروسىنىڭ شەشىمىن جاريالاعان بولاتىن. بيىلعى جىلى «پارلامەنت ءسوزى» سىيلىعى العاش رەت تاپسىرىلعالى وتىر.
