«ەلباسى رۋحاني جاڭعىرۋ جونىندەگى جالپىۇلتتىق يدەيانى جاريالاعاندا جاڭعىرۋ ۇدەرىسى مىندەتتى تۇردە ەلدىڭ رۋحاني تامىرىنان ء نار الۋى ءتيىس ەكەنىن اتاپ ايتقانىن جاقسى بىلەسىزدەر. ءبىزدىڭ رۋحاني تامىرىمىز بابادان ميراس بولعان سالتىمىز, ءتىلىمىز بەن مۋزىكامىز, ادەبيەتىمىز دەسەك, ونىڭ ىشىندە ءداستۇرلى انشىلىك, كۇيشىلىك جانە تەرمەشىلىك ونەردىڭ ورنى ەرەكشە. حالقىمىزدىڭ شەجىرەمەن بىرگە كەلە جاتقان وسى بىرەگەي ونەردى لايىقتى دارىپتەۋ − ەلدىڭ بىرلىك يدەياسىن ىسكە اسىرۋدىڭ اسا ۇتىمدى قۇرالى. وسىنى ەسكەرە وتىرىپ, اقپارات جانە كوممۋنيكاتسيالار مينيسترلىگى «قازاقستان» رترك» اق ارقىلى «مەن قازاقپىن» اتتى تەلەۆيزيالىق مەگاجوبانى ۇسىنىپ وتىر. جوبانىڭ ماقساتى – ءداستۇرلى ءانشى, كۇيشى, تەرمەشىلەرىمىزدى ەلىمىزدىڭ ءار ايماعىندا قالىپتاسقان ونەر مەكتەبىنىڭ وكىلدەرىن كەڭىنەن دارىپتەۋ. تاڭداۋلى تۋىندىلاردى وسكەلەڭ ۇرپاققا زاماناۋي فورماتتا ناسيحاتتاۋ. ونەر بايگەسىنە حالىق كومپوزيتورلارىنىڭ شىعارمالارىن, حالىق اندەرىن ورىندايتىن ونەرپازدار قاتىسادى. ولاردىڭ ىشىنەن ەڭ ۇزدىگى تەلەۆيزيالىق بايقاۋعا جولداما الادى», دەدى مينيستر.
سونىمەن قاتار, «قازاقستان» رترك» اق باسقارما توراعاسى ەرلان قارين جوبانىڭ وڭىرلەردەگى العاشقى بايقاۋلارى 5 ماۋسىمدا باستالاتىنىن تىلگە تيەك ەتىپ, وعان ەلىمىزدەن بولەك, رەسەي فەدەراتسياسى, قىتاي حالىق رەسپۋبليكاسى, موڭعوليا مەن التايدا تۇراتىن قانداستارىمىز دا قاتىسا الاتىنىن جەتكىزدى.
«وڭىرلەردەگى ىرىكتەۋ جارىستارى ماۋسىم ايىنىڭ سوڭىندا اياقتالادى دەپ جوسپارلانۋدا. ال شىلدە ايىندا رەسەي, قىتاي, موڭعوليا مەن التايدا وتكىزەمىز. جوبانىڭ ىرىكتەۋ كەزەڭىنەن تۇسىرىلگەن كۇندەلىكتەر «قازاقستان» ۇلتتىق تەلەارناسىنىڭ ەفيرىنەن 9-27 تامىز ارالىعىندا كورسەتىلە باستايدى. ال جوبا ەفيرگە تولىق كۇيىندە وسى جىلدىڭ 3 قىركۇيەگىنەن ەنەدى دەپ كۇتىلۋدە. كۇندەلىكتەردى شىعارۋعا ارنايى شىعارماشىلىق ەكى توپ قۇرىپ وتىرمىز. ءبىر توپتى تانىمال كۇيشى, سازگەر, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اعا مامانى, حالىقارالىق «شابىت» فەستيۆالىنىڭ لاۋرەاتى, حالىقارالىق قۇرمانعازى اتىنداعى بايقاۋدىڭ لاۋرەاتى, رەسپۋبليكالىق «اسىل مۇرا» بايقاۋىنىڭ لاۋرەاتى, مادەنيەت سالاسىنىڭ ۇزدىگى ايبەك بەكبوسىن جۇرگىزەتىن بولادى. ەكىنشى توپتى ءداستۇرلى ءانشى, مەملەكەتتىك كۇزەت قىزمەتى پرەزيدەنت وركەستىرىنىڭ ءانشىسى, حالىقارالىق «شابىت» فەستيۆالىنىڭ لاۋرەاتى, امىرە قاشاۋباەۆ, ەستاي بەركىمباەۆ اتىنداعى رەسپۋبليكالىق بايقاۋلاردىڭ لاۋرەاتى اللاجار قايبار جۇرگىزەدى. ايتا كەتەتىن تاعى ءبىر جايت, جوباعا 18 بەن 40 جاس ارالىعىنداعى ونەرپازدار قاتىسا الادى», دەدى ول.
راۋان قايدار,
«ەگەمەن قازاقستان»
