جاستار تەاترى كاسىپقوي تەاتر ەمەس, كاسپي ءوڭىرى بولاشاق كوللەدجىنىڭ ونەرگە بەيىمى بار دارىندى ستۋدەنتتەرىنەن قۇرالعان قوعامدىق نەگىزدەگى ونەر ۇجىمى. جازۋشى وتەن احمەتتىڭ «ازاپپەن وتكەن ءومىر-اي!» دراماسىن ءاليا يساەۆانىڭ رەجيسسەرلىعىمەن ساحنالاندى. شىعارماعا الاش كوسەمدەرىنىڭ ءبىرى, ۇلت ۇستازى احمەت بايتۇرسىنوۆتىڭ كۇرەسكەرلىك جولدا كورگەن ازابى, جارى ءبادريسافا ەكەۋىنىڭ شىنايى ماحابباتى, ادالدىق پەن ادامگەرشىلىك بيىگىنەن كورىنگەنى وزەك بولادى.
كاسىبي اكتەرلەر بولماسا دا ءبادريسافانىڭ جاس كەزىن نۇرگۇل بەكتۇرسىنوۆا, قارتايعان شاعىن ءاليا يساەۆا ادەمى الىپ شىقتى. سونىمەن قاتار, احمەتتىڭ ءرولىن عازيز ىزتۇرعانوۆ, اتسىزدىڭ ءرولىن رامازان تاڭسىقباەۆ, قاپيزانى گۇلمايسا شاڭباەۆا شىنايى بەرۋگە تالپىنعان. جاستار تەاترىنا قوستاناي وبلىستىق مادەنيەت باسقارماسى باسشىسىنىڭ ورىنباسارى روزا تولەشەۆا كورەرمەندەر اتىنان راحمەت ايتتى.
سپەكتاكل سوڭىندا پەسا اۆتورى وتەن احمەت پەن «اق جول» دەموكراتيالىق پارتياسى ماڭعىستاۋ وبلىستىق فيليالىنىڭ توراعاسى جاڭبىرباي ماتاەۆ كورەرمەندەرگە جاستار تەاترى تۋرالى ايتىپ بەردى.
«احمەت اتامىز بەن ءبادريسافا شەشەمىزدىڭ اۋىر تاعدىرى تۋرالى سپەكتاكلدى قوستاناي جۇرتشىلىعىنا كورسەتۋدى ارمانداپ ەدىك, سول ماقساتىمىزعا جەتتىك. سپەكتاكلدە 15 پەن 17 جاس ارالىعىنداعى ستۋدەنت بالالار وينادى. تاۋەلسىزدىك ءۇشىن كۇرەسكەن اتالار تاريحىن جاستارىمىز ءبىلۋى ءتيىس. ەلباسى ايتقان رۋحاني سىلكىنىس, جاڭارۋ ونسىز بولمايدى. پارتيا فيليالىنىڭ جاستار قاناتى جاستارمەن 22 باعىتتا جۇمىس ىستەيدى. جاستار تەاترىنىڭ قويعان شىعارماسى ءبىر بۇل ەمەس, رەپەرتۋاردا جاستار ومىرىنە ارنالعان بىرنەشە شىعارما بار», دەدى جاڭبىرباي ماتاەۆ.
ماڭعىستاۋلىق جاستار تەاترى قوستانايلىقتارعا ناشاقورلىق دەرت تۋرالى «ج ۇلىنقۇرت» سپەكتاكلىن دە كورسەتتى.
ءنازيرا جارىمبەتوۆا,
«ەگەمەن قازاقستان»
