باس كەلىسىمنىڭ ماقساتى يىۇ-عا مۇشە ەلدەردىڭ اراسىنداعى ساۋدا-ەكونوميكالىق جانە عىلىمي ىنتىماقتاستىقتى جۇزەگە اسىرۋ قاعيداتتارىن قۇقىقتىق بەكىتۋ بولىپ تابىلادى. «يسلام كونفەرەنتسياسى ۇيىمىنا مۇشە ەلدەر اراسىنداعى ەكونوميكالىق, تەحنيكالىق جانە ساۋدا ىنتىماقتاستىعى تۋرالى باس كەلىسىمدى راتيفيكاتسيالاۋ تۋرالى» زاڭ جوباسى جونىندە ارنايى بايانداما جاساعان ۇلتتىق ەكونوميكا ءمينيسترى تيمۋر سۇلەيمەنوۆ قۇجات اياسىندا يسلام ەلدەرىندە كاپيتالدىق قارىم-قاتىناستان بولەك, عىلىمي ىنتىماقتاستىققا دا باسىمدىق بەرۋ كوزدەلەتىندىگىن اتاپ ءوتتى.
«قازىرگى كەزدە مۇناي ەكسپورتتاۋشى ەلدەر اتالعان شيكىزاتتىڭ ەكسپورتىنا نەگىزدەلگەن دامۋ ۇلگىسىن بارىنشا وزگەرتۋگە تىرىسۋدا. اسىرەسە, ولار اقپاراتتىق-كوممۋنيكاتسيالىق تەحنولوگيالارعا سۇيەنەتىن ەكونوميكانىڭ وزىق سەكتورلارىن قارجىلاندىرۋ ارقىلى ەكونوميكالىق جاڭعىرتۋ ساياساتىن جۇرگىزۋدە. سونداي-اق, ءبىز ەلىمىزگە بىلىكتى ساراپشىلار تارتۋ ارقىلى بىرلەسكەن زەرتتەۋلەر جۇرگىزۋ مەن ءبىلىم بەرۋ ستيپەنديالارىمەن تاجىريبە الماسۋدى ماقسات ەتۋدەمىز. ماسەلەن, 2017 جىلعى 10-11 قىركۇيەكتە استانا قالاسىندا ەكسپو-2017 حالىقارالىق كورمەسىنىڭ جابىلۋى كۇندەرى يسلام ىنتىماقتاستىعى ۇيىمىنا مۇشە مەملەكەتتەر باسشىلارىنىڭ قاتىسۋىمەن ۇيىمنىڭ عىلىم جانە تەحنولوگيالار جونىندەگى ءبىرىنشى ءسامميتىن وتكىزۋ جوسپارلانىپ وتىرعانىن اتاپ كورسەتكەنىمىز ءجون», دەدى ت.سۇلەيمەنوۆ.
جيىندا اتالعان تاقىرىپقا قاتىستى قوسىمشا بايانداما جاساعان سەناتور اسقار بەيسەنباەۆ ءبىزدىڭ ەلىمىزدىڭ قولدانىستاعى زاڭناماسىنىڭ ەرەجەلەرىنە جانە تاۋەلسىز مەملەكەتتەر دوستاستىعىنىڭ, كەدەن وداعىنىڭ جانە ەۋرازيالىق ەكونوميكالىق وداقتىڭ ەركىن ساۋدا اۋماعى شەڭبەرىندەگى قازاقستاننىڭ حالىقارالىق مىندەتتەمەلەرىنە قايشى كەلمەۋى ءۇشىن جانە ىقتيمال كولليزيالارىنا جول بەرمەۋ ماقساتىندا قازاقستان باس كەلىسىمگە مالىمدەمەمەن جانە ەسكەرتپەلەرمەن قول قويعانىن العا تارتتى.
ايتا كەتەيىك, باس كەلىسىم حالىقتاردىڭ يگىلىگى مەن وركەندەۋىن قامتاماسىز ەتۋگە باعىتتالعان ورتاق مۇددەلەرگە قول جەتكىزۋ ءۇشىن قازاقستان مەن يىۇ-عا مۇشە ەلدەردىڭ بىرلەسكەن كۇش-جىگەرىن شوعىرلاندىرۋعا مۇمكىندىك بەرەدى.
سەناتور اسحات كۇزەكوۆ ءبىزدىڭ ەلىمىز ءۇشىن يىۇ-عا مۇشە ەلدەر اۋىل شارۋاشىلىعى ونىمدەرىن وتكىزەتىن نارىق رەتىندە ىقىلاس تۋعىزاتىنىن اتاپ ءوتتى. ول, سونداي-اق, قازاقستان باس كەلىسىم ارقىلى ساۋدا, ينۆەستيتسيا, عىلىم مەن تەحنولوگيا سالالارىنداعى ىنتىماقتاستىقتى نىعايتۋعا نيەتتەنىپ وتىرعانىن جەتكىزدى.
سەناتورلار, سونداي-اق «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (الەۋمەتتىك مەديتسينالىق ساقتاندىرۋ جوباسى) راتيفيكاتسيالاۋ تۋرالى» زاڭ جوباسىنا قاتىستى دا شەشىم قابىلدادى. دەنساۋلىق ساقتاۋ ءمينيسترى ەلجان ءبىرتانوۆ تانىستىرعان قۇجات بويىنشا حالىقارالىق قايتا قۇرۋ جانە دامۋ بانكىنەن 80 ميلليون اقش دوللارى كولەمىندە قارىز الۋ قاراستىرىلادى. ال ءمينيستردىڭ مالىمدەۋىنشە, بۇل قاراجات الەۋمەتتىك مەديتسينالىق ساقتاندىرۋدىڭ ۇلتتىق جۇيەسىن ەنگىزۋدى قولداۋ مەن مەديتسينالىق كومەك كورسەتۋ جۇيەسىن نىعايتۋعا جانە الەۋمەتتىك مەديتسينالىق ساقتاندىرۋ ستراتەگياسىنىڭ جوباسىنا مونيتورينگ جۇرگىزۋ ءارى باعالاۋ جۇمىستارىن جۇرگىزۋگە جۇمسالاتىن بولادى.
جيىندا زاڭ جوباسىن قولداپ ءسوز سويلەگەن سەناتور سەرىك بەكتۇرعانوۆ ۋاكىلەتتى ورگان – دەنساۋلىق ساقتاۋ مينيسترلىگىنىڭ الدىندا ازاماتتاردىڭ دەنساۋلىعىن قورعاۋ ىسىنە العاشقى دارىگەرلىك كومەك پەن مينيسترلىككە دەيىن بارلىق دەڭگەيدە قاتىسۋشىلاردىڭ تۇتاس جۇيەسىن جاڭادان قالىپتاستىرۋ مىندەتى تۇرعانىنا توقتالدى.
«ونى تۇرعىندار ءۇشىن قوسىمشا ماسەلە تۋىندامايتىنداي ەتىپ جاساۋ ماڭىزدى», دەگەن سەناتور جوبا ماقساتىنا قول جەتكىزۋ ءۇشىن ۋاكىلەتتى ورگان نەبارى ءتورت كورسەتكىشتى بەلگىلەگەن بولسا, وندا كەلىسىمنىڭ بارلىق باعىتى بويىنشا 19 مىندەتتى شەشۋ جوسپارلانعانىن كوپشىلىكتىڭ قاپەرىنە سالدى.
وسىلايشا, زاڭ جوباسىنا قاتىستى قاۋلىنى داۋىسقا سالۋ ناتيجەسىندە سەناتورلار تاراپىنان ءبىراۋىزدان ەكى قۇجات تا تولىق قولداۋعا يە بولدى.
نۇرلىبەك دوسىباي,
«ەگەمەن قازاقستان»
