ە.ءبىرتانوۆ مينيسترلىكتىڭ وسى ماقساتتا بىرنەشە باعىتتا جۇمىس ىستەپ جاتقانىن, سونىڭ ءبىرى الدىمەن ساپالى قۇقىقتىق-نورماتيۆتىك بازا قۇرۋ بولىپ وتىرعانىن جەتكىزدى. ماجىلىستە العاش رەت تالقىلانعان بۇل زاڭنامادا بىرنەشە ماڭىزدى وزگەرتۋلەر كوزدەلگەن. بىرىنشىدەن, الەۋمەتتىك ساقتاندىرۋ قورىن تۇراقتاندىرۋ شەڭبەرىندە قوردىڭ اكتيۆتەرى مەن قارجىسى ۇلتتىق بانك ەسەپشوتىندا ساقتالادى. ەكىنشىدەن, كەيبىر اۋدارىمدار مولشەرى ازايتىلدى. ماسەلەن, جۇمىس بەرۋشىلەر ءۇشىن ءار ادامعا اۋدارىلاتىن جارنا كولەمى 2-دەن 1 پايىزعا تومەندەتىلدى. مەملەكەت تولەيتىن جارنا كولەمى 4-تەن 3,75 پايىزعا ازايعان. سونداي-اق جاڭا ساناتتار ەنگىزىلدى. ماسەلەن, مۇگەدەك بالا قاراپ وتىرعان اتا-انانىڭ بىرەۋىنە, شەت ەلدەن كەلگەن قانداستارعا 1 جىل كولەمىندە, ەلىمىزدەگى شەت ەلدىك ازاماتتاردىڭ بالالارى مەن زەينەتكەرلەرىنە مەملەكەت تاراپىنان جارنا تولەنەدى. سونىمەن بىرگە كەلەسى جىلى 1 قاڭتاردان باستاپ ءوزىن-ءوزى جۇمىسپەن قامتىپ وتىرعان ازاماتتار ەڭ تومەنگى جالاقى كولەمىنەن 5 پايىز تولەسە (اي سايىن 1400 تەڭگە) بارلىق مەديتسينالىق ساقتاندىرۋعا قول جەتكىزە الادى. الداعى ۋاقىتتا دۇنيەجۇزىلىك بانكتەن 80 ميلليون اقش دوللارى كولەمىندە قارىز الىنباق. بۇل قارجى نەگىزىنەن ءمامس جۇيەسىن قولداۋعا, ءتۇرلى مەديتسينالىق قۇرال-جابدىقتار الۋعا جۇمسالادى.
– 5 ساۋىردەن باستاپ ەلىمىزدەگى ەمحانالارعا تىركەلۋ ناۋقانى باستالدى. بۇگىندە 120 مىڭنان استام ادام ەمحانادا تىركەۋدەن ءوتتى. ەلىمىزدىڭ بارشا ازاماتى ەلەكتروندى ۇكىمەت نەمەسە ەمحانا ارقىلى ءمامس جۇيەسىندەگى مارتەبەسىن بىلە الادى. بۇل ناۋقان بيىلعى 1 شىلدەگە دەيىن جالعاسادى, دەدى مينيستر.
سونداي-اق ەلىمىزدەگى تاعى ءبىر ماڭىزدى ماسەلە ءدارى-دارمەك باعاسىن رەتتەۋ ەكەنىن ايتتى. اتالعان ۆەدومستۆانىڭ وسى ۋاقىتقا دەيىن جەكە مەنشىك دارىحانالارداعى ءدارى-دارمەك باعاسىن رەتتەۋگە قۇقى بولعان جوق. وسى ورايدا ارنايى ازىرلەنگەن زاڭ جوباسى جاقىندا قوعامدىق دەڭگەيدە تالقىلاناتىن بولادى. بۇل وتاندىق كاسىپكەرلەردىڭ بيزنەسىنە دە اسەر ەتەتىندىكتەن, ۇلتتىق كاسىپكەرلەر پالاتاسى جانە باسقا دا ۇيىمدارمەن بىرگە ەلەكتەن وتكىزىپ, الداعى كۇزدە پارلامەنتتىڭ قاراۋىنا ۇسىنىلادى. ءۇشىنشى باعىت – جەكە مەديتسينالىق ۇيىمدارعا جالپى مەديتسينالىق قىزمەتتەردى كورسەتۋ ءۇشىن تەڭ جاعداي جاساۋ. مۇنداي مەنشىك نىسانىنداعى ۇيىمدار كورسەتكىشى 34 پايىزعا تەڭ. كوبىنىڭ تەگىن مەديتسينالىق كومەك كورسەتۋگە قولجەتىمدىلىگى شەشىلمەگەن. ولاردىڭ قىزمەتىنە ازاماتتار تىكەلەي ءوزى تولەيدى. ياعني, ەرتەڭ مەديتسينالىق ساقتاندىرۋ جۇيەسى ەنگىزىلگەندە ءبىز جەكە مەنشىك ەمحانالارعا ساقتاندىرۋ پاكەتى اياسىنداعى مەديتسينالىق قىزمەتتى كورسەتۋلەرىنە مۇمكىندىك بەرۋىمىز كەرەك. وسى باعىتتا اكىمشىلىك كەدەرگىلەردى, قاعازباستىلىقتى ازايتۋ بويىنشا جۇمىستار جۇرگىزىلۋدە, دەدى ە.ءبىرتانوۆ.
سونىمەن بىرگە مەديتسينالىق تۋريزم ەلىمىز ءۇشىن جاڭا باعىت ەكەنىن ايتقان دەنساۋلىق ساقتاۋ ءمينيسترى: ەلىمىزدە 8 مىڭداي شەت ەلدىك ازامات ستاتسيونارلىق ەم قابىلدايدى. ولار نەگىزىنەن قازاقستاندا تۇراتىندار. سونداي-اق 300-دەن استام شەت ەلدىك ازامات استانا مەن الماتى قالالارىنداعى جوعارى تەحنولوگيالى مەديتسينالىق نىساندارعا جاتقىزىلادى. قازىرگى ۋاقىتتا كارديوحيرۋرگيا, ورتوپەديا, رەپرودۋكتيۆتى سالا بويىنشا جوعارى تەحنولوگياعا سۇيەنەتىن مەديتسينالىق ءتۋريزمدى دامىتۋ باعدارلاماسىن ازىرلەپ جاتىرمىز. بۇل تاراپتا وتاندىق مەديتسينانىڭ الەۋەتى ۇلكەن, دەدى.
مينيستر امبۋلاتورلىق دارىلەرمەن قامتۋ باعدارلاماسىنا 50 اۋرۋ ءتۇرى تىركەلگەنىن, وعان تەگىن دارىلەر بوساتۋعا جىل سايىن 90 ميلليارد تەڭگە بولىنەتىنىن جەتكىزدى. ونىڭ 50 ميللياردى رەسپۋبليكالىق, قالعانى جەرگىلىكتى بيۋدجەتتەن بولىنەدى. ە.ءبىرتانوۆ دارىلەردى ساتىپ الۋ مەن جەتكىزۋ پروبلەماسى بار ەكەنىن, ونىڭ ءبىر سەبەبى وڭىرلەردە ساتىپ الۋ پروتسەسىن جىل باسىندا باستايتىندىعىنان تۋاتىنىن جەتكىزدى. ويتكەنى, وڭىرلەردە «سك-فارماتسيا» اق سياقتى ەرتەرەك بىرىڭعاي ديستريبيۋتەرلىك ساتىپ الۋ قۇقىعى جوق. سوندىقتان پارلامەنتكە ۇسىنىلعان زاڭ جوباسىندا ءدارى-دارمەكپەن قامتاماسىز ەتۋ مەن ساتىپ الۋدى ورتالىقتاندىرۋ جۇيەسى جانە باعاسىن تومەندەتۋدى لوگيستيكا قىزمەتى ارقىلى شەشۋ ماسەلەلەرى قامتىلىپ وتىر.
دۋمان اناش,
«ەگەمەن قازاقستان»
