الداعى ۋاقىتتا الا شاپاندى اعايىندارمەن دوستىق قارىم-قاتىناس كۇشەيىپ, ءوندىرىس, اۋىل شارۋاشىلىعى, ساۋدا-ساتتىق سالالارىندا دا كوپتەگەن ناتيجەلەرگە قول جەتكىزىلەتىن بولادى. وسى ماقساتتا وزبەكستان رەسپۋبليكاسى جيزاق وبلىسىنىڭ اكىمى ۇلىقبەك ۇزاقوۆ باستاعان توپ اۋليەاتا وڭىرىنە كەلدى. قۇرمەتتى قوناقتاردى وڭتۇستىك قازاقستان وبلىسى مەن جامبىل وبلىسىنىڭ جۋالى اۋدانىنىڭ شەكتەسەر تۇسىنان وبلىس اكىمىنىڭ ورىنباسارى ەرقانات مانجۋوۆ باستاعان جامبىلدىقتار كۇتىپ الدى.
ۇلىقبەك يۋلداش ۇلى باستاعان ارنايى توپ اۋەلى جۋالى اۋدانىنىڭ ىرگەسىندە ورنالاسقان «بۋرنوە سولار-1» كەشەنىندە بولدى. يندۋستريالاندىرۋ كارتاسىنا ەنگەن ءىرى جوبامەن تانىسقان سوڭ, دەلەگاتسيا مۇشەلەرى جامبىل اۋدانىنداعى «ايشا ءبيبى» كەسەنەسىنە كەلدى. جيزاقتىقتار ورتاعاسىرلىق كونە جادىگەرمەن تانىسىپ, كەسەنەنىڭ ساۋلەتتىك ەرەكشەلىكتەرىنە قىزىعۋشىلىق تانىتتى. سونداي-اق, ايشا ءبيبى مەن بابادجا حاتۋن رۋحتارىنا تاعزىم ەتتى.
جامبىل مەن جيزاق دوستىعىنىڭ نەگىزگى ماقساتى – ءوزارا كاسىپكەرلىكتى دامىتۋ. بۇدان كەيىن وبلىس اكىمى كارىم كوكىرەكباەۆ قۇرمەتتى قوناقتاردى تاراز قالاسىنداعى «اراي پلازا» كەشەنىنەن كۇتىپ الىپ, اتالعان نىساندا ەكى تاراپ كاسىپكەرلەرى كەزدەسۋ وتكىزدى. مۇندا دا ەكى وبلىسقا ورتاق ماسەلەلەر تالقىلانىپ, كاسىپكەرلىكتىڭ كەڭ قانات جايۋىنا مۇمكىندىكتەر قاراستىرىلدى.
سونىمەن قاتار, جيزاقتىق وكىلدەر «قازاق حاندىعىنا – 550 جىل», «تاۋەلسىز قازاقستان» مونۋمەنتتەرىنە, «تاراز-ارەنا» سپورت كەشەنىنە, نازارباەۆ زياتكەرلىك مەكتەبىنە جانە باسقا دا نىساندارعا بارىپ, ءوڭىر الەۋەتىمەن تانىستى. وزبەكستاندىق ازاماتتاردىڭ ارنايى ءىسساپارى ەكى كۇنگە جالعاستى. ەكىنشى كۇنى تاراز قالاسىنداعى «دوستىق ءۇيى» كەشەنىندە جامبىل جانە جيزاق وبلىستارى اكىمدەرىنىڭ قاتىسۋىمەن وڭىرارالىق ەكونوميكالىق ىنتىماقتاستىق تۋرالى جيىن ءوتتى. جيىندا كارىم كوكىرەكباەۆ ءسوز الىپ, ەكى وبلىستىڭ ىنتىماقتاستىعىن دامىتۋ جونىندە ءوز ويىن ورتاعا سالدى.
«ەجەلگى تاراز جەرىنە قوش كەلدىڭىزدەر! ەكى ەلدىڭ ەجەلدەن تاريحى – ورتاق, تامىرى – ءبىر. ءبىز – مادەنيەتى مەن ادەبيەتى, ونەرى مەن سالت-ءداستۇرى قاتار دامىعان, ىنتىماعى مەن بىرلىگى جاراسقان حالىقتارمىز. بۇرىننان اۋىلى – ارالاس, قويى – قورالاس جاتقان, توسكەيدە مالى, توسەكتە باسى قوسىلعان ەلمىز. ەلباسىمىز نۇرسۇلتان ءابىش ۇلى نازارباەۆ مەملەكەتتەر اراسىنداعى ىنتىماقتاستىققا ءاردايىم ەرەكشە كوڭىل بولەدى. ەكى ەل اراسىندا ورنىققان ءوزارا ارىپتەستىك بۇگىندە وبلىستار اراسىندا ءوز جالعاسىن تابۋدا», دەدى اكىم. ءوز كەزەگىندە ۇلىقبەك ۇزاقوۆ تا جامبىلدىقتارعا ءوز ريزاشىلىعىن ءبىلدىرىپ, الداعى ۋاقىتتا دا ەكى وبلىستىڭ بايلانىسى بەكي تۇسەتىنىن جەتكىزدى.
بۇدان كەيىن جامبىل مەن جيزاق باسشىلارى وڭىرلەر اراسىندا ەكونوميكالىق بايلانىس بويىنشا مەموراندۋمدارعا قول قويدى.
حاميت ەسامان,
«ەگەمەن قازاقستان»
