39 جاسار ماكروننىڭ ۇلكەن ساياساتتا تاجىريبەسى از. ءتىپتى, جوق دەسە دە بولادى. ول باسقاراتىن جۇيەگە كۇمانمەن قاراۋشىلاردىڭ العا تارتاتىنى دا سول. بىرنەشە جىل بانك سالاسىندا جۇمىس ىستەپ, كەيىن ەلدىڭ ەكونوميكا, قارجى جانە ونەركاسىپ مينيسترلىگىن باسقارعان ماكرون ءوزىنىڭ «العا!» اتتى پارتياسىن دا وتكەن جىلى عانا قۇرعان. وڭشىلدار مەن سولشىلدار اراسىندا ورتا جول ۇسىنعان جاس پارتيا اتىنان قازىرگى پارلامەنتتە بىردە-ءبىر دەپۋتاتتىڭ بولماۋى دا جاڭا پرەزيدەنتتىڭ جۇمىسىنا اۋىرتپالىق بەرەدى, دەيدى ساراپشىلار. ەندى ماۋسىمنىڭ 11-ءى مەن 18-ىنە جوسپارلانعان پارلامەنتتىك سايلاۋدا «العا!» پارتياسى العاش رەت ءوز وكىلدەرىن قوسپاق.
ەكىنشىدەن, قازىر, ەۋرووداقتىڭ شاڭىراعى شايقالا باستاعان كەزدە, فرانتسۋزداردىڭ دا ساياسي كوزقاراستارى ەكىگە جارىلدى. الەۋمەتتىك ىشكى ساياسي تالاستاردى ساناماعاندا, وداقتان شىعۋدى قولداۋشىلار قاراسىنىڭ كوبەيۋى ەلدىڭ ەكىگە جارىلۋىنا اكەلىپ سوقتى. دەگەنمەن, بيلىكتىڭ بەدەلى تومەندەي باستاعان وسى تۇستا پرەزيدەنتتىككە ورتا جولدى ۇستانعان قايراتكەردىڭ كەلۋى ەلدىڭ ساياسي ومىرىنە جاڭاشا قارقىن بەرەدى دەگەن دە جورامال بار.
باستىسى, ماكروندى ەلدىڭ ساياسي ەليتاسى قولداپ وتىر. اسىرەسە, مارين لە پەننىڭ ەۋرووداقتان شىعۋ تۋرالى سايلاۋالدى باعدارلاماسىنان سەسكەنگەن ساياساتكەرلەر ماكروننىڭ اينالاسىنا بىرىككەن. ساراپشىلار بۇل تۇرعىدا ماكروندى برەكسيتتىڭ «ەستەن تاندىرۋىنان» ەمدەگەن قايراتكەر رەتىندە باعالاۋدا. سونىمەن قاتار, ماكروننىڭ ەڭبەك نارىعىنان باستاپ ەكونوميكانىڭ بىرقاتار سەكتورلارىندا رەفورما جاساۋ تۋرالى بەرگەن ۋادەسىنەن قاراپايىم حالىق ءۇمىت كۇتىپ وتىر.
ماكروننىڭ جەڭىسىنەن كەيىن ەۋرونىڭ دوللارعا شاققانداعى باعامى 0,3% ءتۇسىپ كەتتى. ال وسىدان شامالى ۋاقىت بۇرىن وتكەن سايلاۋدىڭ ءبىرىنشى تۋرىندا ەۋرو التى ايلىق ماكسيمۋمعا كوتەرىلگەن ەدى جانە ەۋرونىڭ قايتا قۇنسىزدانۋىن ينۆەستورلار نارىقتىڭ بۇل جاڭالىققا دايىن بولۋىمەن تۇسىندىرەدى. ەكىنشىدەن, ماكروننىڭ الەۋمەتتىك رەفورمالارى ەل ەكونوميكاسىنا ايتارلىقتاي وزگەرىس اكەلەتىندىكتەن, باستاپقى كەزدەگى قيىنشىلىقتار اياسىندا ۆاليۋتانىڭ السىرەۋى دە زاڭدى قۇبىلىس بولماق.
باۋىرجان مۇقانوۆ,
«ەگەمەن قازاقستان»
