سيريا اسكەريلەرى لاتاكيا پورتتى قالاسىن قورشاۋعا الدى. سولداتتار شاھاردان قاشۋعا ارەكەتتەنگەن تۇرعىندارعا وق جاۋدىرۋدا. وتكەن سەنبى كۇننەن بەرگى قازا تاپقان بەيبىت تۇرعىندار سانى 30-دان اسقان كورىنەدى.
تۇركيا سىرتقى ىستەر مينيسترلىگى باشار اسادتىڭ ۇكىمەتى وسىنداي قادامدارىن جالعاستىرا بەرەتىن بولسا, قارسى شارا قولداناتىنىن مالىمدەپ, ەسكەرتۋ جاسادى. ونىڭ قانداي شارا ەكەنى ناقتىلانبايدى. اقش-تىڭ مەملەكەتتىك دەپارتامەنتى ءۇندىستان مەن قىتايدى سيريانىڭ مۇنايى مەن گازىن ساتىپ الۋدان باس تارتۋعا شاقىردى. جالپى, سيرياداعى تەكەتىرەس ۇستىمىزدەگى جىلدىڭ ناۋرىز ايىنان بەرى جالعاسىپ كەلەدى.
سوت پروتسەسىن كورسەتۋگە تىيىم سالدى
كاير سوتى مىسىردىڭ بۇرىنعى پرەزيدەنتى حوسني مۇباراكتىڭ سوت پروتسەسىن تەلەۆيزيادان ترانسلياتسيالاۋعا تىيىم سالدى. ونىڭ وسى جىلدىڭ باسىندا ورىن العان حالىقتىڭ جاپپاي نارازىلىعى سالدارىنان بيلىكتەن الاستاتىلعانى بەلگىلى.
سونىمەن قاتار, سوت مۇباراكتىڭ ءىسىن بۇرىنعى ىشكى ىستەر ءمينيسترى حابيب ءال-ءادليدىڭ ىسىمەن بىرىكتىرۋ تۋرالى شەشىم قابىلدادى. ءادليدىڭ شەرۋگە شىققان مىسىرلىقتاردىڭ ولىمىنە كىنالى دەپ تانىلعانى ءمالىم. ال كەلەسى سوت ءماجىلىسى 5 قىركۇيەككە بەلگىلەنگەن. وندا ايىپ تاعۋشىلاردىڭ وكىلدەرى تىڭدالاتىن بولادى.
يزرايل ۇشاقتارى بەس سوققى جاسادى
يزرايل اسكەري-اۋە كۇشتەرىنىڭ ۇشاقتارى كەشە ەرتەڭگىسىن گازا سەكتورىنىڭ اۋماعىنا بەس مارتە سوققى بەردى. پالەستينا تارابىنىڭ دەرەكتەرىنە قاراعاندا, سەكتوردىڭ شىعىس بولىگىندەگى زەيتۋن اۋدانىنا جاسالعان شابۋىلدان ءۇش ادام اۋىر جاراقاتتانعان كورىنەدى.
باسقا اۋدانداردا دا زارداپ شەككەندەر بار دەلىنىپ وتىر. يزرايل اسكەري-اۋە كۇشتەرىنىڭ وپەراتسيالارى گازا سەكتورىنان يزرايل اۋماعىنا زىمىران جىبەرىلگەننەن كەيىن باستالعان. زىمىران اشىق جەرگە تۇسكەندىكتەن, ەشكىم زارداپ شەكپەگەن. شىلدە ايىنىڭ باسىنان بەرى گازا سەكتورىنان يزرايل جاعىنا شامامەن 30 زىمىران اتتاندىرىلىپتى. ال اۋە سوققىلارىنان 19 پالەستينالىق وپات بولسا كەرەك.
پرەزيدەنتتىكتەن ۇمىتكەرلەر كوپ-اق
قىرعىزستاندا 15 تامىزدا الداعى پرەزيدەنت سايلاۋىنا قاتىساتىن ۇمىتكەرلەردى ۇسىنۋ اياقتالدى. ورتالىق سايلاۋ كوميسسياسىنا تاپسىرىس بەرگەن كانديداتتاردىڭ جالپى سانى ءتىپتى 83 ادامعا جەتكەن. ولاردىڭ كوپشىلىگى ءوزىن ءوزى ۇسىنعاندار ەكەن.
ۇمىتكەرلەردىڭ اراسىندا ساياساتكەرلەر, كاسىپكەرلەر, بىرنەشە جۋرناليست, سونداي-اق 20-عا جۋىق جۇمىسسىز بار كورىنەدى. تەك 16 ادامدى عانا ساياسي پارتيالار ۇسىنىپتى. ءۇمىتكەرلەردىڭ بارلىعى دەرلىك ەتنوستىق قىرعىزدار, دەپ حابارلادى ورتالىق سايلاۋ كوميسسياسىنداعىلار. ولاردىڭ 77-ءسى ەر ادام بولسا, 6-ۋى ايەل. سايلاۋ 30 قازانعا بەلگىلەنگەن.
قىتايمەن شەكاراسىن قىمتاي ءتۇستى
كورەيا حالىق دەموكراتيالىق رەسپۋبليكاسى قىتايمەن شەكاراسىنا بەينەباقىلاۋ كامەرالارىن ورناتىپ, تىكەنەك سىمداردان قوسىمشا قورشاۋ تۇرعىزدى. وسىلايشا سولتۇستىك كورەيا شەكارانى كەسىپ وتەتىندەرگە باقىلاۋ ورناتىپ, ءوز ازاماتتارىنا شەتەلدىكتەردىڭ ىقپالىن شەكتەمەك.
مۇنداي شارالارعا سولتۇستىك كورەيا باسشىلىعى كحدر باسشىسى كيم چەن ءيردىڭ سينىيدجۋ قالاسىنا ساپارىنان كەيىن بارىپ وتىر. ويتكەنى, كيم چەن ءيردىڭ ايتۋىنشا, شەكارا ماڭىنداعى ەلدى مەكەندەر تۇرعىندارىنا باقىلاۋدى كۇشەيتۋ قاجەت. سەبەبى, ولارعا كاپيتاليزمنىڭ جامان ىقپالى كەڭىنەن اسەر ەتە باستاعان. مۇنى جەرگىلىكتى حالىقتىڭ قالاي بولسا سولاي كيىنە باستاعانىنان دا كورۋگە بولادى, دەيدى ول.
تۇرىك مەكتەپتەرىن جابا باستادى
تۇركىمەنستاندا 1990-شى جىلداردىڭ باسىنان اشىلعان تۇركىمەن-تۇرىك مەكتەپتەرى جابىلا باستادى. بۇعان اتالعان وقۋ ورىندارىنا پانتۇركىلىك «نۋردجۋلار» قوزعالىسىنىڭ ىقپالى كەرى اسەر ەتىپ وتىر دەگەن بيلىك باسىنداعىلاردىڭ الاڭداۋشىلىعى سەبەپ بولعان كورىنەدى.
مەكتەپتەردى جابۋ ۇدەرىسى 1 تامىزدا باستالعان. قازىرگى كەزگە قاراي اشعابادتا وسىنداي ءبىر عانا وقۋ ورنى (اتاتۇرىك اتىنداعى №57 مەكتەپ) قالعان. ال وعان وقۋشىلاردى قابىلداۋ توقتاتىلىپتى. بىراق قازىرگى وقۋشىلارعا مەكتەپتى بىتىرۋگە مۇمكىندىك بەرىلەدى ەكەن. مۇنداي وقۋ ورىندارى اشىلعان 20 جىلعا جۋىق ۋاقىتتان بەرى ولاردى مىڭداعان تۇلەكتەر ءبىتىرىپ شىققان كورىنەدى.
قىسقا قايىرىپ ايتقاندا:
ۇستىمىزدەگى جىلدىڭ 10 شىلدەسىندە تاتارستاننىڭ كۋيبىشەۆ سۋ قويماسىندا «بۋلگاريا» تەپلوحودى سۋعا باتىپ, كوپتەگەن ادام قۇربان بولعانى بەلگىلى. قايعىلى وقيعاعا وراي روسترانسنادزوردىڭ ەكى قىزمەتكەرى تۇتقىندالعان. ۋكراينانىڭ بۇرىنعى پرەزيدەنتى ۆيكتور يۋششەنكو بۇرىنعى ۇكىمەت باسشىسى يۋليا تيموشەنكونىڭ ءىسىن قاراعان سوت وتىرىسىنا كەلۋدەن باس تارتتى. ەكەۋى بيلىك قۇرعان كەزدە اۋەلى اۋىز جالاسقانىمەن, كەيىننەن ارالارىنان قارا مىسىق جۇگىرىپ ءوتىپ, ارازداسقاندارى بەلگىلى. قىتاي ارمياسى ەلدىڭ وڭتۇستىك-باتىسىنداعى سىچۋان پروۆينتسياسىندا ورنالاسقان ءموناستىردى قورشاۋعا الدى. وعان تيبەت موناحىنىڭ ءوزىن ءوزى ورتەپ جىبەرگەنى سەبەپ بولدى. تيبەتتىڭ تاۋەلسىزدىككە ۇمتىلىپ كەلە جاتقانى ءمالىم بولسا, جەرگىلىكتى بۋدديستەر كوسەمى دالاي-لاما 1959 جىلدان بەرى قۋعىندا ءجۇر. وزبەكستاندا فەرعانا قالاسىنىڭ حوكيمى (اكىمى) ەركين نۋراليەۆ ورنىنان الىنىپ, ارتىنشا تۇتقىندالدى. ءفورمالدى تۇردە ول قىزمەتىنەن ءوز ءوتىنىشى بويىنشا كەتكەن. قازىر ول تاشكەنت قالاسىندا بىرەۋلەرگە جەر ساتقانى, كوممەرتسيالىق نەگىزدە اعاش وتاعانى ءۇشىن جاۋاپ بەرۋدە كورىنەدى.حالىق بوستاندىعى پارتياسىنىڭ تەڭ توراعاسى بوريس نەمتسوۆ ەكى كۇندە ەكىنشى رەت سانكت-پەتەربۋرگ پوليتسياسىنىڭ قاماۋىنا الىنعان. ول سانكت-پەتەربۋرگ گۋبەرناتورى ۆالەنتينا ماتۆيەنكونىڭ مۋنيتسيپالدى دەپۋتات بولۋىنا قارسى داۋىس بەرۋگە ۇندەگەنى ءۇشىن تۇتقىندالىپ وتىرعانعا ۇقسايدى.
ينتەرنەت ماتەريالدارى نەگىزىندە ازىرلەندى.
