ءتيىمدى جوبالارعا جول اشىق

قازىرگى تاڭدا الەۋمەتتىك-كاسىپكەرلىك كورپوراتسيالار مەملەكەت-جەكەمەنشىك ارىپتەستىگى پرينتسيپتەرىنىڭ نەگىزىندە ايماقتاردى دامىتۋ مەن بيزنەستى قولداۋدىڭ ىقپالدى قۇرالىنا اينالىپ وتىر. «اقتوبە» اكك ءوز قىزمەتىن باستاعاننان بەرگى ارالىقتا وبلىستا 20 ينۆەستيتسيالىق جوبا قارجىلاندىرىلدى. ولاردى جۇزەگە اسىرۋعا الەۋمەتتىك-كاسىپكەرلىك كورپوراتسيا تاراپىنان 2,1 ملرد. تەڭگە ءبولىنىپ, ءوندىرىستى دامى­تۋعا جالپى كولەمى 3,1 ملرد. تەڭگە ينۆەستيتسيا سالىن­دى. بۇل تۋرالى وبلىس اكىمى ارحيمەد مۇحامبەتوۆتىڭ توراعالىق ەتۋىمەن وتكەن «اقتوبە» اكك» اكتسيونەرلىك قوعامىن دامىتۋ ماسەلەلەرىنە بايلانىستى كەڭەستە كەڭىنەن ءسوز بولدى. وبلىس اكىمى ءباسپاسوز قىزمەتىنىڭ مالىمدەۋىنشە, كەڭەستە «قازحروم» كومپانياسى» اق, «باتىس كالي», «اي ەر دجي قازاقستان», «يۋبيلەينوە», «كەڭدالا باتىس» باسشىلارى وبلىس اۋماعىندا پايدالى قازبا­لار­دى ىزدەستىرۋ مەن ءوندىرۋ جوبالارىنىڭ جۇزەگە اسىرىلۋى تۋرالى حابارلاما جاساعان. «باتىس-گەولوگيا» جشس باس گەولوگى يۋري تيموفەەۆ قازبا باي­لىعىن پايدالانۋ قىزمەتىندەگى بىرلەسكەن جوبا­لارعا توقتالا كەلىپ, وبلىس اۋماعىنداعى گەولوگيالىق بارلاۋ, جاڭا كەن كوزدەرىن ىزدەستىرۋدە وزەكتى ماسەلەلەردىڭ بار ەكەنىن جاسىرمادى. سونداي-اق, كەڭەستە ۇدەمەلى يندۋستريالىق-يننو­ۆا­تسيالىق دامۋدىڭ مەملەكەتتىك باعدارلاماسى اياسىن­دا جۇزەگە اسىرىلىپ, «اقتوبە» اكك تۇساۋىن كەسكەن جەتى جوبا جايى دا ايتىلدى. ونىڭ تورتەۋى ۇستىمىزدەگى جىلدىڭ العاشقى جارتىسىندا ىسكە قوسىلدى. «نەفتەگازسترويزولياتسيا» جاق باسقارماسىنىڭ توراعاسى الەكساندر يتكين مەتالل قۇرىلىمدارى, ليفتىلىك شارۋاشىلىق وندىرىستەرىنە بايلانىستى جوبالار­دى جۇزەگە اسىرۋدىڭ تيىمدىلىگى تۋرالى اڭگىمەلەدى, ما­گيسترالدى قۇبىرلاردىڭ قۇرىلىستا­رىن كۇردەلى ءجون­دەۋگە بايلانىستى كاسىپ­ورىن قۇرۋ جوسپار­لارىمەن وي ءبولىستى. «اقتوبە» اكك» اق-تىڭ توراعاسى سەرعازى ەسەمباەۆ بۇرىنعى ءجۇن جۋ فابريكاسى اۋماعىندا قۇرىلعان ءىرى ساۋدا-لوگيستيكالىق جانە وندىرىستىك ورتا­لىقتىڭ جوباسى تۋرالى باياندادى. ەۋروپا دامۋ بان­كىنىڭ وكىلى ساكالاۋسكاس داينيۋس اقتوبەلىك كاسىپكەر­لەر­دىڭ بەلسەندىلىگىن جانە جۇزەگە اسىرىلاتىن جوبالاردىڭ اۋقىمدى­لىعىن ايرىقشا اتاپ ءوتتى. ول اتالعان بانكتىڭ قوقىس وڭدەيتىن زاۋىتتىڭ قۇرىلىسىنا, «اقبۇلاق» جانە «ترانسەنەرگو» اق-تىڭ قۇبىر جەلىلەرىن قايتا جا­راقتاندىرۋعا ۇزاق مەرزىمگە ينۆەستيتسيا­لىق باعدارلا­ما­عا قاتىسۋعا ءازىر ەكەندىكتەرىن جەتكىزدى. ءوڭىر باسشىسى قالا جانە اكك باسشىلارىنا اتال­عان جوبالاردى, ونىڭ ىشىندە قوقىستاردى وڭدەۋگە بايلانىستى قازىرگى زامانعى زاۋىت قۇرىلىسىن جۇزەگە اسىرۋ ءۇشىن وزگە ەلدەردەگى زاۋىتتاردى زەرتتەۋگە تاپ­سىرما بەردى. ول بارلىق جوبالاردى زەردەلەپ, قازاق­ستاننىڭ يندۋستريالىق كارتاسىنا ەڭ تاڭداۋلىلارىن ەنگىزۋگە ۇسىنىس جاساۋدى سۇرادى. ساتىبالدى ءساۋىرباي,    اقتوبە وبلىسى.