پاتريوتيزم – تاۋەلسىزدىكتى تۇلعالاندىراتىن قاسيەت

ەل تاۋەلسىزدىگىنىڭ 20 جىلدىعىنا وراي اقتاۋدا اسكەري-پاتريوتتىق كلۋبتاردىڭ رەسپۋبليكالىق سلەتى ويداعىداي ءوتتى. ءبىلىم جانە عىلىم مينيسترلىگى مەن رەسپۋبليكالىق قوسىمشا ءبىلىم بەرۋ وقۋ-ادىستەمەلىك ورتالىعى ۇيىمداستىرۋىمەن داستۇرگە اينالعان اسكەري-پاتريوتتىق كلۋبتاردىڭ رەسپۋبليكالىق سلەتى مەرەكەلى جىلى اسەم اقتاۋدا ءوتتى. تاۋەلسىز قازاقستاننىڭ بولاشاق يەلەرىنىڭ ءبىلىمدى, باتىل دا شيراق, دەنساۋلىقتارى مىقتى بولۋىنىڭ ماڭىزى زور. ونداي ازاماتتاردىڭ وتانعا, تۋعان جەرگە دەگەن پاتريوتتىق سەزىمدەرى دە ەرەكشە بولادى. سودان بولار, اقتاۋعا ەلىمىزدىڭ 13 وبلىسى مەن 2 قالاسىنان 14-15 جاستاعى 200-گە تارتا ءجاسوسپىرىم كەلدى. ولار اسەم قالامەن تانىستىقتان سوڭ سلەتتىڭ جۇمىسىن «ماڭگى الاۋ» جانىندا ۇلى وتان سوعىسىندا قازا تاپقان, قاھارمان جاۋىنگەر بولا بىلگەن اتالارىن ۇنسىزدىكپەن ەسكە الۋدان باستادى. التى كۇنگە سوزىلعان سلەتتە جاسوسپىرىمدەر اسكەري ونەر بايقاۋىنان سوڭ سۋعا جۇزۋدەن جارىسىپ, «مەرگەن», «قورعانۋ» وپەراتسيالارىندا وزدەرىنىڭ مەرگەندىكتەرىن, جىلدامدىقتارى مەن شەبەرلىكتەرىن كورسەتتى. اسكەري اعالارىنىڭ ءتاۋىر باعالارىنا يە بولدى. سلەت قورىتىندىسىندا جالپىكوماندالىق ەسەپ بويىنشا قىزىلوردا وبلىسى ءبىرىنشى ورىنعا شىقتى. ەكىنشى ورىنعا اتىراۋ, ءۇشىنشى ورىنعا سولتۇستىك قازاقستان تۇلەكتەرى يە بولسا, ال ماڭعىستاۋلىقتار ءتورتىنشى ورىنعا تۇراقتادى. جەڭىمپاز جاسوسپىرىمدەردىڭ بارلىعىنا دا ارنايى سىيلىقتار تاپسىرىلىپ, ماقتاۋ قاعازدارىمەن ماراپاتتالدى. سونداي-اق ماڭعىستاۋدىڭ تۇپقازىعى – تۇپقاراعان اۋدانىنا ساياحاتقا شىعىپ, اسكەري كەمەلەردى تاماشالادى. جولامان بوشالاق, ماڭعىستاۋ وبلىسى.