اقتوبەدەگى اتىس

تەمىر اۋدانىنىڭ شۇبارشى اۋىلىندا ورىن العان قاندى وقي­عا وبلىس حالقىنا اشىق كۇن­دە نايزاعاي ويناعانداي اسەر ەتتى. بەلگىسىز بىرەۋلەردىڭ قولىنان وققا ۇشقان پوليتسيا قىزمەت­كەر­لەرىنىڭ قازاسى ەستىگەن ادامنىڭ جانىن تۇرشىكتىردى. بۇل وقيعانى اركىم ءار ساققا جورىدى. وسىعان وراي كەشە بۇعان ناقتى تۇسىنىك بەرۋ ماقساتىندا ەلىمىزدىڭ ءىىم شۇعىل تۇردە بريفينگ وتكىزدى. ىشكى ىستەر ءمينيسترىنىڭ ءبىرىنشى ورىنباسارى م.دەمەۋوۆتىڭ اي­تۋىنشا, ءدىني نانىمداردى بەت­پەردە تۇتقان ۇيىمداسقان قىل­مىستىق توپ اقتوبە وبلىسىنىڭ تەمىر اۋدانىنىڭ ايماعىندا بىرنەشە جىلدان بەرى ارەكەت ەتكەن كورىنەدى. ولار ءتىپتى شۇبارشى مەن كەڭقياق اۋىلدارىنىڭ جا­نى­نان وتەتىن قۇبىرلاردان مۇ­ناي ۇرلاۋمەن اينالىسقان ەكەن. ۇستىمىزدەگى جىلدىڭ 26 ماۋ­سى­مىندا ءىىد قىزمەتكەرلەرى وبلىس­تا ارنايى ىزدەستىرۋ شارالارىن جۇرگىزگەندە «مەرسەدەس-بەنتس» اۆ­تو­كولىگىن ۇستاعان. كولىكتى قا­راۋ كەزىندە ونىڭ ىشىنەن «پم» تاپانشاسى, ەكى شولاق مىلتىق, وق-دارىلەر جانە ءدىني اعىمداعى كىتاپتار, جارىلعىشتاردى داي­ىندايتىن زاتتار تابىلعان. پوليتسيا قىزمەتكەرلەرى ۇس­تال­عان كولىكتىڭ جۇرگىزۋشىسى مەن جولاۋشىسىنىڭ كىم ەكەنىن تەكسەرۋ بارىسىندا ولاردىڭ بۇدان بۇرىن دا ۇرلىق پەن قاراق­شى­لىق شابۋىل جاساپ جۇرگەن ۇي­ىم­داس­قان قىلمىستىق توپتىڭ ءمۇ­شەسى ەكەنىن جانە ولاردان باس­قا دا سىبايلاستارى بار ەكەنىن انىق­تاپ­تى. سودان قىلمىس جاسا­عان دەپ تابىلعان كۇدىكتى ازا­مات­تاردى ۇستاۋ ءۇشىن 30 ماۋسىم كۇ­نى پوليتسيا قىزمەتكەرلەرى ارنا­يى شارا وتكىزەدى. الايدا كۇدىك­تىلەر ايلا­سىن اسىرىپ, قاشىپ قۇتىلادى. مىنە, ءدال وسى كۇنى شۇبارشى اۋىلىندا پاترۋلدىك قىزمەتىنە كىرىسكەن پوليتسيا جاساعىنا بەلگىسىز بىرەۋلەر قارۋلى شابۋىل جاسايدى. قىزمەتتىك كولىكتى ات­قى­لاۋ ناتيجەسىندە پاترۋلدىك پوليتسەيلەر الپىسباەۆ پەن بورانباەۆ العان جاراقاتتان وقيعا ورنىندا كوز جۇمدى. دەرەۋ قىل­مىستىق ءىس قوزعالدى. پاترۋلدىك پوليتسەيلەردى ءول­تىر­گەن ادامداردى تابۋ ءۇشىن وب­لىستىق ءىىد «ارلان» ارنايى جا­ساعىنىڭ بولىمشە قىزمەتكەرلەرى قۇمساي اۋىلىنىڭ ماڭى مەن شۇ­بارشى اۋىلىنان 6-7 شا­قى­رىم جەردەگى قالىڭ وسكەن بىرنەشە شاقىرىمدىق قامىستى تىنتۋگە كىرىسەدى. وسى كەزدە ولارعا قارسى بەلگىسىز بىرەۋلەر وق جاۋ­دىرادى. سونىڭ سالدارىنان «ار­لان» قىزمەتكەرى جولدىباەۆ جانە ءۇش پوليتسيا قىزمەت­كەرى جارالاندى. بۇدان كەيىن كۇدىك­تىلەردى ۇستاۋ ماقساتىندا اتالعان جەرگە ءىىم «سۇڭقار», ءىىم ىشكى اسكەرىنىڭ «بۇركىت» ارنايى ءبو­لىم­شەلەرى جانە ءىىم ىشكى ءاس­كە­رىنىڭ جەدەل باتالونى جىبەرىلدى. جەدەل ىزدەستىرۋ شارالارى­نىڭ ارقاسىندا 8 شىلدە كۇنى پو­لي­تسەي­لەردىڭ ولىمىنە قاتىستى كۇ­د­ىكتى­لەردىڭ كەڭقياق اۋىلىنداعى ءبىر ۇيدە جاسىرىنىپ جاتقانى ءمالىم بولادى. ءىىم «سۇڭقار» جانە ىشكى اسكەردىڭ «بۇركىت» ار­نايى ءبولىم­شەلەرى توبىمەن اتال­عان جەرگە شو­لۋ جاسالادى. ءوز ەرىك­تە­رىڭمەن بە­رىلىڭدەر دەگەنگە مۇ­ناي­شىلار كو­شەسىندەگى №2 ءۇي­دەن پوليتسەيلەرگە قارسى وق اتى­لادى. سول جەردە اتال­عان وقتان ارنايى جاساق قىزمەتكەرى ا.يمانباەۆ قايتىس بولدى. بۇدان سوڭ جەدەل تۇردە پوليتسيا قىزمەتكەرلەرى جاقىن ماڭاي­داعى ۇيلەر تۇرعىندارىن قاۋىپ­سىز جەرگە كوشىرەدى. ءوز ەرىكتە­رىڭمەن بەرىلىڭدەر دەگەنگە تاعى دا قارسى وق اتىلدى دەيدى گەنەرال. سودان امال جوق, ەكى جاق اتىسقا كوشەدى. 9 شىلدەنىڭ تاڭى اتادى. سودان كەيىن عانا كۇ­دىك­تىلەر جا­سىرىنعان ءۇيدى باسىپ الۋ جۇزەگە اسادى. ناتيجەسىندە قاقتىعىس ور­نىنان قارۋلى قار­سىلىق كو­ر­سەت­كەن 9 كۇدىكتىنىڭ دەنەسى تا­بىل­دى. ونىڭ جەتەۋى تا­نىلدى, ال ەكەۋىنىڭ كىم ەكەنى ان­ىقتالۋدا دەي­دى م. دەمەۋوۆ. ءۇي­دىڭ ءىشىن قاراۋ كەزىندە ىشكى اسكەر قىز­مەت­كەرى س. قالجانوۆ جاراقات الدى. سودان بارلىعى 11 ادامنان تۇ­راتىن قىلمىستىق توپتىڭ قال­عان ەكى مۇشەسى دە كوپ ۇزاماي قول­عا تۇسكەن. الەكساندر تاسبولات. *** ەندى اتالمىش جايعا وراي ءبىزدىڭ وسى ايماقتاعى مەنشىكتى ءتىلشىمىز ساتىبالدى ءساۋىرباي جوعارىداعى قاندى وقي­عانىڭ جەرگىلىكتى جەردە ناقتى قالاي ورىن العانىن ءبىلۋ ءۇشىن وبلىستىق ىشكى ىستەر دەپارتامەنتى ءباسپاسوز قىزمەتىنىڭ باس­تىعى المات يمانعا­لي­ەۆ­كە جو­لىعىپ, ونىڭ جاي-جاپ­سا­رىن ەگجەي-تەگجەيلى سۇراعان ەدى. – المات ەلەۋسىز ۇلى, حا­لىق­تىڭ جانىن تۇرشىكتىرگەن بۇل وقيعا نەدەن باستالىپ, قالاي ءوربىدى ءوزى؟ – قۇقىق قورعاۋ ورگاندارىنا بىرنەشە جىلدار بويى تەمىر اۋ­دانىنىڭ شۇبارشى جانە كەڭ­قياق اۋىلدارى تۇسىنداعى مۇناي قۇبىرىنان ءدىني يدەيانى جامى­لىپ, جانارماي ۇرلاۋمەن اينا­لىس­قان قىلمىستىق توپتىڭ بار ەكەنى ايان بولدى. ولاردىڭ باسقا دا قىلمىستار جاساعانى انىق­تالدى. قىلمىسكەرلەردى قۇ­رىق­تاۋ­مەن وبلىستىق ىشكى ىستەر دە­پارتامەنتىنىڭ قىزمەتكەرلەرى اي­نالىستى. ۇستىمىزدەگى جىلدىڭ 26 ماۋسىمىندا ۇقكب قىزمەتكەر­لە­رى شۇعىل حابار بويىنشا اق­توبە قالاسىندا «مەرسەدەس» اۆ­توكولىگىن ۇستاپ, ونى تەكسەرۋ كەزىندە «ماكاروۆ» ماركالى پيستولەتى, ەكى شولاق مىلتىق, كوپ­تەگەن پاتروندار تاركىلەدى. ءجۇر­گىزۋشى مەن جولاۋشىنى تەرگەۋ كەزىندە ولاردىڭ سەگىز ۇرلىققا, ءبىر ادام توناۋشىلىققا قاتىس­تى­لىعى ان­ىقتالدى. ولاردىڭ ەكى قىلمىس­تىق توپپەن بايلانىس­تىلىعى دا ءمالىم بولدى. 30 ماۋسىم كۇنى ۇقكب-نىڭ قىزمەت­كەر­لە­رى قىل­مىس جاساعان ەكى كۇدىكتىنى ۇستاۋ شارالارىن جۇرگىزدى. الايدا, ولار ىزدەرىن جاسىرىپ, بوي تاسالاپ ۇلگەردى. 30 ماۋسىمنان 1 شىلدەگە قاراعان تۇندە شۇبارشى اۋىلىندا تەمىر اۋداندىق ىشكى ىستەر ءبولىمىنىڭ قىزمەتكەرلەرى پو­ليتسيا سەرجانتتارى نۇرلان ال­پىسباەۆ پەن ايدوس بوران­باەۆقا بەلگىسىز بىرەۋلەر قاراق­شى­لىق شابۋىل جاساپ, اتىپ كەتكەن. ولار وق جاراقاتىنان كوز جۇمدى. كەيىن قىلمىسكەرلەر ءمىن­­گەن «ميتسۋبيسي دەليكا» اۆ­تو­كولىگى اۋىلدىڭ سىرتىنان تا­بىلدى. وسى دەرەككە قاتىستى قك 96-بابى, 2-ءبولىمى بويىنشا قىل­مىستىق ءىس قوزعالدى. پوليتسيا قىز­مەتكەرلەرىنىڭ ولىمىنە قاتى­سى بار شۇبارشىلىقتارعا ىزدەۋ جاريالاندى. ولار تۋرالى ناقتى اقپارات بەرگەندەرگە 100 مىڭ دول­لار كولەمىندە سىيلىق تاعاي­ىن­دالدى. كەڭقياق پوليتسيا ءبولى­مى­نە تۇسكەن اقپارات بويىنشا №18 ءۇيدىڭ جانىنداعى اعاشتار ارا­سى­نان جەردى قازىپ جاتقان كۇدىكتىلەردى ۇستاۋ كەزىندە الگى ادام قارسىلىق كورسەتكەن. پوليتسيا قىزمەتكەرلەرىنە قاراي پو­لي­ەتيلەن پاكەتىن لاقتىرىپ قا­شا جونەلگەن ەر ادام جاقىن ماڭداعى «بمۆ» اۆتوما­شينا­سى­نا قاراي ءجۇ­گىرگەن. سوبر قىز­مەت­كەرى قا­شىپ بارا جاتقانعا قا­رۋ قول­دان­عان. قاشقىن وڭ جام­باسىنان جا­را­لانىپ, اۆتوماشينا بەلگىسىز جاق­قا عايىپ بو­لىپ ۇلگەرگەن. جا­رالى پوسەلكەلىك اۋرۋحانادا قاي­تىس بولدى. وقيعا بولعان جەردەن «يج» ماركالى 16-كاليبرلى مىل­تىق, 16-بەت بروشيۋرا, اقشا سا­لىن­عان ەر ادامنىڭ اياق كيىمى تا­بىل­دى. اۆتوماشينا تۇرعان جەردەن دە 16-كاليبرلى اڭشى مىلتى­عى الىندى. تاپ سول كۇنى 3 شىلدەدە شۇ­بارشىدان 6-7 شاقىرىم بولا­تىن قۇمساي اۋىلىنا جاقىن جەر­دەگى قالىڭ قامىستى ءسۇزىپ شى­عۋ كەزىندە بەلگىسىز بىرەۋلەر جا­قىن­داپ قالعان «ارلان» ار­ناۋ­لى ماقسات­تاعى بولىمشەسىنىڭ قىزمەتكەر­لەرىنە وق اتىپ, ارناۋ­لى وپەراتسيا كەزىندە 35 جاسار رۋسلان جولدى­باەۆ سول جەردە قازا تاپتى. سون­داي-اق, «ارلان­نىڭ» ءۇش قىزمەت­كەرى ءارتۇرلى جا­راقات الدى. – قارۋلى قاراقشىلاردى ۇس­تاۋعا قانداي كۇش قۇرى­لىم­دارى جۇمىلدىرىلدى؟ – كۇدىكتىلەردى ۇستاۋ ءۇشىن «ار­لان», ءىىم-ءنىڭ «سۇڭقار», ءىىم ىشكى ىستەر اسكەري كوميتەتىنىڭ «ءبۇر­كىت» ارناۋلى ماقساتتاعى ءبو­لىمشەلەرى مەن وبلىس ورتالى­عىن­داعى №6655 اسكەري ءبولىمىنىڭ شۇعىل باتالو­نى جىبەرىلدى. 8 شىلدەدە پوليتسيا قىزمەتكەرلەرىن ولتىرگەن كۇدىك­تى­لەردىڭ جۇرگەن جەرلەرىن انىقتاۋعا بايلانىستى شۇعىل شارالاردى جۇرگىزۋ ءۇشىن وسى كۇش قۇرى­لىم­دارىنىڭ قىز­مەت­كەرلەرى قەڭقياق پوسەلكەسىندەگى ۇيلەردى ارالاپ ءجۇ­رىپ, تەكسەرۋگە كىرىستى. قىلمىسكەر­لەر جا­سى­رىنعان تۇرعىن ءۇي ان­ىق­تالدى. كەشكى 20 ساعات 45 مينۋتتا «نەفتيانيك» كوشەسى №2 ۇيدەن پوليتسيا قىزمەتكەرلەرىنە قارسى وق اتىلدى. سونىڭ سالدارىنان «سۇڭ­قار» ارناۋلى ماقساتتاعى ءبولىم­شەسىنىڭ قىزمەتكەرى, پوليتسيا ما­يو­رى ايبولات يمانباەۆقا وق ءتيىپ, سول جەردە مەرت بولدى. سون­داي-اق, كەڭقياق پوليتسيا ءبولى­مىنىڭ اۆتوپاترۋل قىزمەتكەرلەرى دە 50 مەتر جەردەن بوراعان وقتىڭ اس­تىندا قالدى. قارۋلى قاق­تى­عىس بارىسىندا پوليتسيا سەر­جان­تى تۇراربەك ەشپاعامبەتوۆ جا­را­قات­تانىپ, ول دەرەۋ جەرگىلىكتى اۋرۋ­حا­ناعا جەتكىزىلدى, قازىر وعان مەدي­تسينالىق كومەك كورسەتىلۋدە. كۇ­دىكتىلەر كۇش قۇرىلىمدارى قىز­مەتكەرلەرىنىڭ بەرىلۋ تۋرالى تالا­بىنا وق جاۋدىرۋمەن جاۋاپ بەردى. ۇرىس ءتۇن ورتاسىنا دەيىن جال­عاستى. سودان كەيىن قىلمىس­كەر­لەر ورنالاسقان ءۇيدى ارناۋلى ماقسات­تاعى بولىمشەلەر قىزمەت­كەرلەرى وقشاۋلاندىرىپ, قور­شاۋ­عا الدى. جاقىن ماڭداعى ءۇي­لەر­دىڭ تۇرعىن­دارى قاۋىپسىز جەرلەرگە كوشىرىلدى. ەرتەمەن قىل­مىس­كەرلەر بوي تاسا­لاعان ۇيگە شا­بۋىل جاسالدى. ول كۇندىزگى ساعات 12-دە اياقتالدى. وپەراتسيا بارى­سىندا پوليتسيا قىز­مەتكەرلەرىنە قارسى­لىق كور­سەتكەن 9 قىل­مىس­كەردىڭ كو­زى جوي­ىلدى. ونىڭ 6-ۋى بۇرىن ءىز­دەس­تىرۋدە جۇرگەن كۇدىك­تى­لەر بو­لىپ شىقتى. ءۇيدى قىل­مىس­كەر­لەردەن تازارتۋ كەزىندە ءىش­كى ىستەر اسكە­رىنىڭ قاتارداعى جاۋ­ىنگەرى سەرجان قالجانوۆ جاراقات الدى. – قىلمىسكەرلەر وزىق ۇلگى­دەگى قارۋلارمەن قارۋلانعان دەگەن نە ءسوز؟ – بۇل قاتە پىكىر, قۇر قاۋەسەت. ولار كادىمگى «ماكاروۆ» پيستولەتتەرىمەن, «سايگا» جانە باسقا اڭشى مىلتىقتارىمەن قارۋلانعان. – رەسەيدەن كومەك كەلدى مە؟ – جوق. بۇل باعىتتاعى بارلىق ءىس-قيمىل ءوزىمىزدىڭ كۇشىمىزبەن اتقارىلدى. – قەڭقياق, شۇبارشى جانە سوركول اۋىلدارىندا كومەن­دانت­­تىق ساعات ورناتىلدى دەگەنگە نە ايتاسىز؟ – كومەندانتتىق ساعات ورنا­تىلعان جوق. تۇرعىندارعا وزدە­رى­نىڭ قاۋىپسىزدىگى ءۇشىن جاسالىپ جات­­قان شارالارعا تۇسىنىستىكپەن قاراۋ جەتكىزىلدى. سونداي-اق, بار­لىق بەكەتتەردە ادامداردىڭ كىم ەكەنى انىقتالىپ, اۆتوكولىكتەر تەك­سەرىلدى. تۇرعىنداردىڭ ەركىن ءجۇ­رىپ تۇرۋىنا كەدەرگى بولعان جوق. – ەندى وسىمەن وقيعا ورىن العان جەردەگى وپەراتسيا اياق­تال­دى ما؟ – پوليتسيا قىزمەتكەرلەرىن ولتىرگەن قىلمىسكەرلەردى قۇرىق­تاۋ­عا بايلانىستى وپەراتسيا تو­لىق اياقتالدى. الايدا, شۇعىل تەر­گەۋ توبى جۇمىسىن جالعاس­تى­رۋدا. جال­پى, باسىندا قىلمىس­كەر­لەر سا­نى 11 ادام دەگەن بولجام بولدى. سوڭعى وپەراتسيا كەزىندە 9 قانىشەردىڭ كوزى جوي­ىل­دى. ونىڭ 6-ۋى ىزدەۋدە جۇرگەن­دەر. ولارمەن كىمدەردىڭ بايلا­نى­سى بار ەكەنىن انىقتاۋ جۇ­مىس­تارى جۇرگىزىلۋدە. شىنى كەرەك, بۇلار «قوي تەرىسىن جامىلعان قاسقىرلار» سياقتى ءدىندى بەتپەردە ەتىپ, قىلمىستىق توپ قۇرىپ, ۇرلىقپەن, قاراقشىلىقپەن اينا­لىسقان قىلمىسكەرلەر. اڭگىمەلەسكەن ساتىبالدى ءساۋىرباي. اقتوبە وبلىسى.