ۇلى اكتەرگە ارنالعان البوم-كىتاپ

بيىل قازاق تەاتر ونەرىنىڭ نەگىزىن قالاۋشىلاردىڭ ءبىرى, سوتسياليستىك ەڭبەك ەرى, كسرو ءھام قازاق كسر مەملەكەتتىك سىيلىق­تارىنىڭ لاۋرەاتى, حالىق ءارتىسى سەرالى قوجامقۇلوۆتىڭ تۋعانىنا 115 جىل تولىپ وتىر. ەل مادە­نيەتى­نىڭ وسىناۋ مەرەيلى وقيعاسى اياسىندا الماتىداعى ورتالىق مەملەكەتتىك مۇراعاتتا ۇلى اكتەرگە ارنالعان «شەبەرلىك شى­ڭى» اتتى البوم-كىتاپتىڭ تۇساۋ­كەسەر تانىستىرىلىمى بولىپ ءوتتى. بۇل ءراسىمنىڭ مۇراعات مەكەمەسىندە وتەتىن ءجونى دە بار ەكەن. الدا 90 جىلدىعىن اتاپ وتكەلى وتىر­عان ورتالىق مەملەكەتتىك مۇ­راعات باسشىسى ءلاززات اق­تاەۆا­نىڭ ايتۋىنشا, 1979 جىلى سەراعاڭ مۇراعاتقا ءوز قولىنان 192 ءىس قۇجاتىن اكەلىپ تاپسىرعان كورىنەدى. سودان بەرى س.قوجام­قۇلوۆ­تىڭ عىلىمي-ساراپتامالىق وڭدەۋدەن وتكەن جەكە قورى مۇ­راعات بولىمىندە مۇقيات ساقتالىپ كەلەدى. مۇندا ساڭلاق اكتەر وي­ناعان رولدەردىڭ ماتىندەرى, قول­جاز­بالار, جازىسقان حاتتار, فوتوسۋرەتتەر, ماراپاتتار, باسقا دا قۇجاتتار جەتەرلىك. مىنە, اتال­مىش البوم-كىتاپتى قۇراس­تى­رىپ دايىنداۋ بارىسىندا وسى جەكە قورداعى باي ماتەريالداردى پايدالانعاندارىن اكتەردىڭ قىزى مەن كۇيەۋ بالاسى – رەناتا سەرالىقىزى جانە پروفەسسور احمەت مۇسا ايتىپ ءوتتى. البوم-كىتاپ «كيىزكىتاپ» باسپاسىنان باي­لانىس جانە اقپارات ءمينيسترلى­گىنىڭ قولداۋىمەن شىعارىلىپتى. ءتورت بولىمنەن تۇراتىن البوم-كىتاپتا ساحنا ساڭلاعىنىڭ ءومىربايانى مەن شىعارماشىلىق جولى كەڭىنەن قامتىلعان دەۋگە بولادى. البوم-كىتاپتىڭ كورىكتى ءارى مازمۇندى بولىپ شىعۋىنا مۇرا­عات قىزمەتكەرلەرىمەن بىرگە م.اۋەزوۆ تەاترىنىڭ ۇجىمى دا اتسالىسقان. كوپتەگەن ساحنا كورىنىستەرى مەن كينو رولدەرىنىڭ سۋرەتتەرى, جوعا­رى مەم­لەكەتتىك ماراپاتتاردىڭ تاپسى­رىلۋ ساتتەرى, قانشاما گراموتالار مەن ديپلومدار, قۇت­تىقتاۋلاردىڭ ناق وسى قارا شا­ڭىراقتان الىنىپ بەرىلۋى ال­بوم-كىتاپتىڭ قۇندىلى­عىن ارت­تىرا تۇسكەن. س.قوجامقۇلوۆقا ارنالعان «شە­­بەرلىك شىڭى» البوم-كىتا­بى­مەن بىرگە وسى ارادا ۇلى اكتەر تۋرالى ماتەريالداردى ءومىر بو­يى جيناستىرىپ, بۇعان دەيىن «اكتەر جانە ازامات», «شەبەرلىك مەكتەبى» جيناقتارىنىڭ شىعۋى­نا مۇ­رىن­دىق بولعان پروفەسسور احمەت مۇسانىڭ دا «اتامۇرا» باسپا­سى­نان شىققان ەكى كىتابى تانىس­تى­رىلدى. باسپا ديرەكتورى راقىم­عالي قۇل-مۇحاممەد «قا­زاق-قىر­عىز جىرلارىنداعى بىرلەستىك» جانە «نەگىزگى ماقسات – مەملەكەتتىك ءتىلدى مەڭگەرۋ» دەپ اتالاتىن بۇل كىتاپتاردى جوعارى باعالادى. اكادەميكتەر سەيىت قاس­قا­باسوۆ, ومىرزاق ايتباي ۇلى, جا­زۋ­شى احات جاقسىباەۆ, ءماريام سەرالىقىزى, سەراعاڭنىڭ نەمەرەسى, بىرىككەن اراب امىرلىكتەرىن­دەگى قازاقستان ەلشىسى اسقار مۋسينوۆ جانە باس­قالار ۇلى اكتەر­دىڭ ونەگەلى ءومىرى جايىن­دا ەستەلىك اي­تىپ, كوپتەگەن عيبرات­تى جاي­لاردى العا تارتتى, كوزايىم البوم-كىتاپ حاقىندا وڭ پىكىرلەرىن ءبىلدىردى. ال, «كيىزكىتاپ» باسپا­سى­نىڭ ديرەكتورى, كوركەم جوبا اۆتورى ءشايزادا بايكەنوۆا «شەبەرلىك شىڭى» البوم-كى­تابى­نىڭ ماسكەۋدە وتكەن حا­لىقارالىق كونكۋرستا «ءما­دە­نيەت, ءبىلىم جانە عى­لىم» اتا­لىمى بويىنشا لاۋرەات بول­ىپ ۇلگەرگەن قۋانىشتى حابا­رىن ءسۇ­يىنشىلەپ جەتكىزدى. قورعانبەك امانجول.