قۇرعاق ەسەپ

بۇل كۇندەرى ەلىمىزدە شىلدەنىڭ اپتاپ ىستىعى باستالعان كەزدە ارگەنتينادا ءبىزدىڭ قوڭىر كۇزگە ۇقساس قىس مەزگىلىندە جىلىنا ءبىر كەلەتىن تاۋەلسىزدىك كۇنى, جىلدار بويى قۇر­لىقتى ارالاپ, ءاربىر ەلگە سوعا­تىن فۋت­بولدان امەريكا كۋبوگى جولىن­دا­عى جارىستار وتۋدە. وسىنداي وقي­عالاردىڭ ىشىندە 7 شىلدە كۇنى بۋەنوس-ايرەستە جەرگىلىكتى جان­كۇ­يەر­لەر ءۇشىن ماڭىزى جاعىنان كەم ءتۇس­پەيتىن تەننيستەن دەۆيس كۋبوگى­نىڭ شيرەك فينالى باستالىپ, ارگەنتينا تاۋەلسىز مەملەكەت بولىپ جاريا­لان­عان 9 شىلدە كۇنى اياقتالدى. وسى كۇنى تەننيستەن ارگەنتينا قۇراماسى دەۆيس كۋبوگىنىڭ شيرەك فينالىندا قازاقستان كومانداسىن جەڭىپ, جارتىلاي فينالعا جولداما الدى. بۇل باسەكەدە حۋان مارتين دەل پوترو, حۋان يگناسيو چەلا, ەدۋاردو شۆانك پەن حۋان موناكو ءوز ەلىنە ءبىرىنشى كۇنگى جەڭىستەن كەيىن قالعان ەكى كۇندەگى جۇپتىق جانە جەكەلەگەن كەزدەسۋدە قازاقستان كومان­داسىن تاعى دا ويسىراتا جەڭدى. جارىستىڭ ەكىنشى كۇنى يۋري ششۋكين مەن ەۆگەني كورولەۆ جۇپ­تىق ويىندا ەدۋاردو شۆانك پەن حۋان يگناسيو چەلامەن كەزدەسكەن ەدى. ءبىرىنشى سەت 6:3, ەكىنشىسى – 6:2, ءۇشىن­شىسى – 7:5 بولىپ اياقتالعان ويىندا ارگەنتينا ويىنشىلارى وتانداس­تا­رى­­مىزدىڭ الدىن وراپ, ءبىر ۇپاي الۋ­دىڭ وزىنە ەشقانداي مۇمكىندىك بەرمەدى. وسى ەكى كۇندە بىزگە جەرەبە جولداس بولماعانىن ايتۋ كەرەك. ءبىرىنشى كۇنى ميحايل كۋكۋشكين دەل پوترومەن ەمەس, ماسەلەن, اندرەي گولۋبەۆ ويناعان حۋان موناكومەن كورتقا شىققاندا ونى جەڭىپ, كومانداعا ءبىر ۇپاي اكەلەتىنى ەدى دەپ ويلايمىز. ويتكەنى, كۋكۋشكين قازىر گولۋبەۆ سياقتى بابىندا بولماي جۇرگەن جوق. ونىڭ ۇستىنە تەننيسشىنىڭ جارىستا موتيۆاتسياسى, جەڭىسكە دەگەن جىگەرلىگى كوزگە ۇرىپ تۇردى. جارىستىڭ ءۇشىنشى كۇنى كومان­دا­مىزدىڭ ەكى ۇپاي الامىز دەگەن ءۇمىتى بولعانى جاسىرىن ەمەس. ەۆگەني كورولەۆ پەن ميحايل كۋكۋشكين حۋان يگناسيو چەلا مەن حۋان موناكونى ۇتسا, قورجىنىمىز ەكى ۇپاي­عا تولىپ, ەلگە بوس قايتپاس ەدىك. الايدا, ءبىزدىڭ تەننيسشىلەردە جەڭىسكە دەگەن ۇمتى­لىس بول­عانىمەن سىرت الاڭدا الەمنىڭ بۇگىنگى ازۋلى سپورتشىلارىن جەڭىپ جۇرگەن ارگەنتينالىقتار ءوز الاڭىندا ءبىزدى اياسىن با. ولار قازاقستان قۇرا­ماسىن ەكى ويىندا دا تازا ۇتتى. وسى كۇنى كورولەۆ چەلانى ءبىرىنشى سەتتە 6:2 ەسەبىمەن جەڭسە دە, ودان كەيىنگى سەتتەردە 6:2, 6:0 ەسەبىمەن جەڭىلىپ قالدى. سول سياقتى كۋكۋشكين دە موناكودان 6:4, 6:1 ەسەبىمەن ۇتىلدى. ءسويتىپ, ءۇش كۇنگە سوزىلعان جارىستىڭ قورىتىن­دى­سى 5:0 بولىپ ارگەنتينانىڭ پايدا­سىنا شەشىلدى. وسى جارىستى «پارك روكە» ستاديونىنىڭ كورتىنا جينال­عان 11 000 ادام تاماشالادى. سونىڭ ىشىندە قازاقستان تەننيس فەدەراتسيا­سىنىڭ پرەزيدەنتى بولات وتەمۇراتوۆ, ۆيتسە-پرەزيدەنتى ءادىل بورلىباەۆ, «كار-تەل» كومپانياسىنىڭ پيار-مەنەدجەرى انار جۇماعۇلوۆا باستاپ استانا مەن الماتىدان كەلگەن ءبىر توپ جانكۇيەرلەردىڭ كومانداعا بەلسەندى قولداۋ كورسەتكەنىن اتاپ وتكەن ءجون. دەۆيس كۋبوگىنىڭ شيرەك فينالى سياقتى وسىنداي جاۋاپتى سىندا ەلىمىز قۇراماسىنا قولداۋ كورسەتۋ ءۇشىن جانكۇيەرلەردى ارگەنتيناعا اپارعان قازاقستان تەننيس فەدەراتسياسى مەن «Beeline» كومپانياسىنا العىستان باسقا ايتارىمىز جوق. ال جارتىلاي فينالعا جولداما العان ارگەنتينا قۇراماسى ەندى شۆەتسيا مەن سەربيا كوماندا­لارى­نىڭ ارا­سىندا ءوتىپ جاتقان ويىننىڭ جە­ڭىم­پازىمەن كەزدەسەدى. داستان كەنجالين, بۋەنوس-ايرەستەن.