بايقاۋعا بەلگىلى كومپوزيتور كەڭەس دۇيسەكەەۆ باسشىلىق جاساپ, وزگە دە ەلدەردىڭ بەلگىلى ونەر ادامدارى ەنگەن بەدەلدى قازىلار القاسى تورەلىك ەتەدى. ونىڭ قاتىسۋشىلارعا تالابى دا جوعارى. قازىلار ونەرگە تالپىنعان بالالاردىڭ ۆوكالدىق قابىلەتىن, ساحنادا ءوزىن ۇستاۋىن, رەپەرتۋار بايلىعىن – ءبارى-ءبارىن سۇزگىدەن وتكىزەدى. ءۇش كۇن بويى انشىلەردى تىڭداعان قازىلار القاسى جيىرماعا جۋىق دارىنداردى ىرىكتەدى. بايقاۋدىڭ سوڭعى كۇنى ولاردى ماراپاتتاپ, جۇلدەگەرلەر گالا-كونتسەرت بەردى.
– قازاقستان ءان ونەرىنىڭ كەلەشەگى ءۇشىن وسى بايقاۋدىڭ ماڭىزى زور دەپ بىلەمىن. ءبىز تالانتتاردى بالاپان كەزىنەن بايقاپ, ولاردى قاناتتاندىرامىز, – دەدى قازىلار القاسىنىڭ توراعاسى كەڭەس دۇيسەكەەۆ.
بۇل جولى بايقاۋدىڭ باس جۇلدەسى قوستاناي وبلىسىنىڭ وزىندە قالدى. قازىلار القاسىنىڭ قاتاڭ سىنىنان وتكەن بەكبولات جازىقباەۆ باس ءجۇلدەگە لايىق دەپ تابىلدى. ول بايقاۋعا اۋليەكول اۋدانىنىڭ قۇسمۇرىن اۋىلىنداعى مەكتەپتەن قاتىستى. وبلىس اكىمى ارحيمەد مۇحامبەتوۆ وعان بايقاۋدىڭ گران-پري جۇلدەسىن جانە 300 مىڭ تەڭگەنىڭ سەرتيفيكاتىن تاپسىردى.
– «التىن ميكروفون» بايقاۋى تالانتتى انشىلەردىڭ ۇستاحاناسى سياقتى. جاس تالانتتاردىڭ بارلىعى بىردەي جۇلدە الماسا دا, وسى بايگەگە قاتىسقانىنىڭ ءوزى ولارعا قانات بىتىرەدى. بايقاۋدىڭ بۇرىنعى جۇلدەگەرلەرى اراسىندا قازىر ەلىمىزگە, ودان سىرت جەرلەرگە دە تانىمال ونەر يەلەرى از ەمەس. ولاردىڭ قاتارىندا قوستانايلىق تالانتتار دا بار ەكەنىن ماقتانىش تۇتامىز, – دەدى ارحيمەد بەگەجان ۇلى.
ون بەس جىلدا «التىن ميكروفون» حالىقارالىق ءان بايقاۋىنا 700-دەن اسا بالاپان ءانشى قاتىسىپتى. ولار تەك قازاقستاننان عانا ەمەس, الىس جانە جاقىن شەت ەلدەردەن كەلدى. گالا-كونتسەرتتە جۇلدەگەر بولعان جاس انشىلەردىڭ ونەرى كورەرمەندەردى قۋانىشقا بولەدى.
ءنازيرا جارىمبەتوۆا,
«ەگەمەن قازاقستان»
قوستاناي
سۋرەتتى تۇسىرگەن
نيكولاي ستادنيچەنكو
