ءومىر كورسەتىپ وتىرعانداي, ىشكى ساياسي رەفورمانى ويداعىداي جۇرگىزۋ ارقىلى كوپ ۇلتتى ەلىمىزدىڭ ءوزارا دوستىق, ىنتىماقتاستىعى, بىرلىگى, تىنىشتىعى قامتاماسىز ەتىلىپ, وزگەلەرگە ۇلگى بولارلىق دارەجەگە جەتىپ وتىرسا, ەلباسىنىڭ سارابدال سىرتقى ساياساتى ارقاسىندا بۇرىن كەڭەس وداعىنىڭ قاتارداعى رەسپۋبليكالارىنىڭ ءبىرى بولعان قازاقستان قولدا بار اتوم قارۋىن كەلمەسكە جىبەرىپ, بەيبىت ءومىر جارشىسى اتانىپ وتىر. قازاقستان رەسپۋبليكاسىنىڭ بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋى دا ءبىزدىڭ مەملەكەتىمىزگە دەگەن ۇلكەن سەنىم دەي الامىز. قازاقستان پرەزيدەنتى الەم ەلدەرى اراسىندا قايسىبىر كەلىسپەۋشىلىك-قاقتىعىس كەزدەرىندە ارا اعايىندىق ء رول اتقارىپ, ۇلكەن بەدەل مەن سەنىمگە يە بولىپ كەلەدى.
ماقالادا ءسوز بولعان قايتا تۇرلەۋدىڭ ەكىنشى پروتسەسى – ەكونوميكالىق جاڭعىرۋ. تاۋەلسىزدىكتىڭ العاشقى جىلدارى ەل باسىنا تۇسكەن قيىندىقتار بىردەن ەسكە ورالادى. نۇرسۇلتان ءابىش ۇلى سول كەزدەن باستاپ «وتكىنشى كەزەڭ» قيىندىقتارىنا شىدامدىلىق كەرەكتىگىن, بۇرىنعى كەڭەس كەزىندەگىدەي «ورتاق مەنشىك بولمايتىنىن, ازاماتتاردىڭ نارىقتىق قوعامدا ءومىر ءسۇرۋ جولدارىن ۇيرەنىپ, بيزنەسپەن اينالىسۋلارى, ەلىمىزدىڭ تەزىرەك ەڭسە كوتەرىپ كەتۋى ءۇشىن كوپتەپ ينۆەستيتسيا تارتۋ قاجەتتىگىن باسا ايتۋدا. وسى باعىتپەن شيرەك عاسىردى ارتتا قالدىرعان حالقىمىز قازىرگى تاڭدا الەمنىڭ ەڭ دامىعان 30 ەلدىڭ قاتارىنا قوسىلۋ جونىندەگى باعدارلامانى ورىنداۋدا قاجىرلى ەڭبەك ەتىپ كەلەدى. بۇل الەۋمەتتىك جاڭعىرۋدىڭ ارقاسىندا وتكەن كەزبەن سالىستىرعاندا, حالىقتىڭ ءال-اۋقاتى ايتارلىقتاي جاقسارا ءتۇستى دەگەن ءسوز.
ەلباسى حالىققا ارناعان ۇستىمىزدەگى جىلعى جولداۋىندا قازاقستاننىڭ كەزەگى كەلگەن ء ۇشىنشى جاڭعىرۋى باستالعانىن ايتقان ەدى. «بۇل ساياسي جانە ەكونوميكالىق جاڭعىرۋلاردى تولىقتىرىپ قانا قويماي, ولاردىڭ وزەگىنە اينالادى», دەپ اتاپ كورسەتىلگەن جولداۋدا ءبىرتۇتاس ۇلت بولۋ ءۇشىن بۇقارالىق سانانى قالاي وزگەرتۋگە بولاتىنى جايلى كوزقاراستار ورتاعا سالىندى.
رۋحاني جاڭعىرۋعا قاتىستى ماقالادا ايتىلعانداي, ء اربىر جاڭعىرعان قوعامنىڭ تەرەڭنەن باستاۋ الاتىن رۋحاني ۇلتتىق كودىن ساقتاي ءبىلۋ باستى مىندەت, ەگەر جاڭعىرۋ ەلدىڭ تاريحي ۇلتتىق تامىرىنان ءنار الا الماسا, ول اداسۋعا اپاراتىنى انىق. ماقالادا ۇلت تابىسىنىڭ كىلتى سول ەلدىڭ تابيعي بايلىعىندا ەمەس, ادامدارىنىڭ باسەكەلىك قابىلەتىنە بايلانىستى ەكەندىگى تايعا تاڭبا باسقانداي ەتىپ ايتىلعان. ال باسەكەگە قابىلەتتى ادامداردىڭ قوعامنىڭ سان الۋان سالالارىندا كەزدەسەتىنى تالاس تۋعىزباسا كەرەك. ماتەريالدىق سالاداعى باسەكەگە لايىقتىلار ەلگە ۇلكەن تابىستار اكەلسە, ادەبيەت, مادەنيەت, ونەر سالاسىنداعىلار حالىقتىڭ ماقتانىشىنا اينالۋدا. دەمەك, باسەكەگە لايىق جوعارى قابىلەتتى, كومپيۋتەردى جەتىك مەڭگەرگەن, عىلىمنىڭ ءار سالالارىنان تەرەڭ ءبىلىمدى, ءۇش, ودان دا كوپ تىلدەردى مەڭگەرگەن جاستار ەرتەڭگى مەملەكەت, ەل باسشىلارى, اسا دارىندى ادەبيەت مايتالماندارى, مادەنيەت پەن ونەر قىزمەتكەرلەرى ەلىمىزدىڭ التىن قازىناسى دەپ بىلەمىن.
«بولاشاققا باعدار: رۋحاني جاڭعىرۋ» ماقالاسى سىندى سالماقتى ماقالالار مەن اۋقىمدى جوبالاردى باسشىلىققا العان تاۋەلسىز قازاقستانىمىز الەمنىڭ وركەنيەتتى ەلدەرىنىڭ ورتاسىنان ويىپ ورىن الىپ, ۇلى دالادا ەركىن وسكەن «ماڭگىلىك ەلىمىز» وركەن جايا تۇسەدى دەپ سەنەمىز.
دۇيسەمبى ءارىپوۆ
ماڭعىستاۋ وبلىسى
