قازىرگى كەزدە كبك ءوندىرىستىك كەشەنىنىڭ قۇرىلىسى قارقىندى جۇرگىزىلىپ جاتىر. ءارتۇرلى قۋاتتىلىقتاعى, جوعارى ءۆولتتى جەلىلەردەن باستاپ, وندىرىستىك عيماراتتارعا دەيىن, ەلۋدەن استام نىساندار سالىنۋدا. كەنتكە جانە وندىرىسكە ارنالعان قازىرگى زامانعا لايىقتالعان ەكى قازاندىقتى ءساۋىر ايىندا, مەردىگەرلەرگە ارنالعان جاتاقحانا عيماراتىن مامىر ايىندا ىسكە قوسۋ جوسپارلانعان.
رەسەيدىڭ التىن ءوندىرۋشى كومپانيالارى اراسىندا ەكىنشى ورىندى يەلەنەتىن «پوليمەتالل» كومپانياسى 2014 جىلى شىعىس قازاقستان وبلىسىنىڭ جارما اۋدانىندا ورنالاسقان ەكى كەن ورنى – باقىرشىق جانە بولشەۆيكتى ساتىپ العاندىعىن جاريالاعان ەدى.
كومپانيا العاشقى كۇننەن باستاپ جۇمىسقا بىلەك سىبانا كىرىستى. ءبىرىنشى جىلدىڭ وزىندە, ءوندىرىستىڭ ءالى تولىق جۇمىس ىستەمەي ءارى كاسىپورىن ەشقانداي پايدا كەلتىرىپ تۇرماعاندىعىنا قاراماستان, بكوك وبلىستىق جانە اۋداندىق اكىمدىكتەرمەن الەۋمەتتىك-ەكونوميكالىق ىنتىماقتاستىق تۋرالى مەموراندۋمدارعا قول قويدى. اتالعان قۇجاتتارعا سايكەس الەۋمەتتىك سالانى بەلسەندى تۇردە دامىتۋدى, سونىڭ ىشىندە 180 ورىنعا ارنالعان بالاباقشانىڭ عيماراتىن قايتا قالپىنا كەلتىرىپ بەرۋدى ءوز موينىنا الدى. قۇرىلىس جۇمىستارى ءبىر جارىم جىلدا اياقتالدى, كومپانيا بۇل ماقساتقا 240 ميلليون تەڭگە جۇمسادى. 2016 جىلدىڭ قاراشا ايىندا تولىقتاي ءجوندەۋدەن وتكىزىلگەن, زامان تالابىنا ساي جابدىقتالعان «اققۋ» بالاباقشاسى مەملەكەت قاراماعىنا بەرىلدى.
2014 جىلدان باستاپ 2016 جىلعا دەيىنگى ارالىقتا شىعىس قازاقستان وبلىستىق جانە جارما اۋداندىق اكىمدىكتەرىمەن جاسالعان مەموراندۋمداردىڭ اياسىندا الەۋمەتتىك سالاعا 1 ملرد 74 ميلليون تەڭگەدەن استام ينۆەستيتسيا سالىندى. بيىلعى جىلدىڭ اقپان ايىنىڭ سوڭىندا جارما اۋدانىنىڭ اكىمدىگىمەن قۇنى 30 ميلليون تەڭگە بولاتىن مەموراندۋمعا قول قويىلدى. بۇدان بولەك, بكوك 2015-2017 جىلدار ارالىعىندا جارما اۋدانىنىڭ ينفراقۇرىلىمىنا 2 ميلليارد تەڭگەدەن استام ينۆەستيتسيا سالعانىن دا اتاپ ءوتۋ كەرەك.
كاسىپورىن كەنتتى دامىتۋعا, جاڭا جۇمىس ورىندارىنىڭ اشىلۋىنا ءاردايىم ەرەكشە نازار اۋدارىپ كەلەدى.
– بۇگىندە باقىرشىق كەن ءوندىرۋ كاسىپورنىندا بەس جۇزدەن استام جۇمىسشىلار مەن ينجەنەرلەر ەڭبەك ەتىپ جاتىر, ولاردىڭ 70 پايىزىنان استامى جەرگىلىكتى تۇرعىندار, – دەيدى «باقىرشىق كەن ءوندىرۋ كاسىپورنى» جشس باس ديرەكتورى يۋري وۆچيننيكوۆ. – كاسىپورىننىڭ تۇراقتى جۇمىس ىستەۋىنىڭ ارقاسىندا اۋەزوۆ كەنتىندە تۇرعىن سانى دا ارتىپ كەلە جاتقاندىعىن اتاپ وتۋگە بولادى. مەردىگەرلەر پايدا بولدى, كەنتتە كاسىپكەرلىك قىزمەت جاندانا باستادى.
كارەردە كەن ءوندىرۋ جۇمىستارى 2017 جىلدىڭ ەكىنشى جارتىجىلدىعىندا باستالادى دەپ جوسپارلانىپ وتىر. جوبا بويىنشا كەن ورنىندا قۇرامىندا التىنى بار كەن ون جىل كولەمىندە اشىق ادىسپەن وندىرىلەتىن بولادى, ال سودان سوڭ جەراستى وڭدەۋگە كوشەدى. كەن جاقىن جىلدارى ىسكە قوسىلاتىن كەن بايىتۋ فابريكاسىندا فلوتاتسيالىق بايىتۋ ادىسىمەن وڭدەلمەك.
كاسىپورىن 2018 جىلعا دەيىن كەن ءوندىرىسىنىڭ كۇردەلى جۇمىستارىنا 69 ميلليون دوللار قاراجات سالۋعا نيەتتى, ال ءبىرىنشى كەزەڭدە جوبانىڭ دامۋىنا 322 ميلليون دوللار ينۆەستيتسيا سالۋ جوسپارلانىپ وتىر. فابريكا تولىق جۇمىس ىستەۋگە 2019 جىلى كوشەدى جانە كارەردى پايدالانۋدىڭ بۇكىل كەزەڭى ىشىندە ورتاشا العاندا – 10 توننادان, ال جەراستى كەنىشىن پايدالانۋ كەزىندە 8 توننادان استام التىندى كونتسەنترات تۇرىندە وندىرەتىن بولادى. وسى ۋاقىتقا قاراي كاسىپورىنداعى قىزمەتكەرلەردىڭ سانى جەتى ءجۇز ادامنان اساتىن بولادى.
ازامات قاسىم,
«ەگەمەن قازاقستان»
