شىمكەنت قالاسى اكىمىنىڭ ورىنباسارى نۇرالحان كوشەروۆتىڭ ايتۋىنشا, مۇندا 316 كوپقاباتتى ءۇي سوعىلادى.
جوبالاۋشىلاردىڭ ويىنشا, «شىمكەنت-سيتي»-دە جانعا جايلى قاجەتتىلىكتىڭ ءبارى قاراستىرىلماق. الەۋمەتتىك نىساندار – مەكتەپتەر مەن بالاباقشالار, ەمحانالار جانە شاھارلىقتاردىڭ ءبىر ءسات تىنىعاتىن ورىندارى بوي كوتەرەدى دەپ كۇتىلۋدە.
«3,5 مىڭ كورەرمەنگە ارنالعان كينو كونتسەرت زالىن سالۋدى ۇيعارىپ وتىرمىز. مۇنان بولەك, ازىرگە, ءبىز «شىمكەنت-ارەنا» دەپ اتاپ وتىرعان سپورت كەشەنى بوي كوتەرەتىن بولادى. مۇندا, ەڭ باستىسى, شاھار تۇرعىندارى ءۇشىن قولايلى جاعداي جاساۋ. جوبامىزدىڭ ىشىندە اۋدانى 24 گا بولاتىن بيزنەس-ورتالىقتىڭ قۇرىلىسىن سالۋ دا كوزدەلگەن», - دەيدى نۇرالحان كوشەروۆ.
اكىم ورىنباسارىنىڭ مالىمەتىنشە, قازىرگى تاڭدا «شىمكەنت-سيتي»-دە كوشە قۇرىلىسى مەن 10 ءۇيدىڭ (ارقايسىسى 54 پاتەردەن تۇرادى) ينجەنەرلىك كوممۋنيكاتسيالىق جۇمىستار جۇرگىزىلۋدە.
«ۇيلەر بەرىكتىگى جاعىنان جوعارى ساناتتى قۇرامالى تەمىربەتوندى كونترۋكتسيالاردان بوي كوتەرەتىن بولادى. بۇل – كوممۋنالدى ۇيلەر. وسى جىلى بەس كوپقاباتتى ءۇيدىڭ قۇرىلىسىن بىتىرەمىز دەپ جوسپارلاعانىمىزبەن, باسپانالاردىڭ پايدالانۋعا بەرۋ ۋاقىتى كوممۋنيكاتسيالىق قاجەتتىلىكتەردىڭ بارلىعى ورنالاستىرىلىپ بولعاننان سوڭ عانا, 2018 جىلعا كەلىسىلگەن», - دەدى اكىم ورىنباسارى.
ن.كوشەروۆ كوممۋنيكاتسيالىق جۇمىستاردىڭ بارىسىنا دا توقتالدى. ايتۋىنشا, بۇل جۇمىستار «نۇرلى جەر» باعدارلاماسى اياسىندا ىسكە اسىرىلۋدا. جۇمىستار بيىل بىتسە, كەلەسى جىلى پايدالانۋعا بەرۋ جوسپاردا تۇر. ال جولداردىڭ باسىم بولىگى وسى جىلى توسەلمەك.
ال قالاشىقتاعى اياقجولدار مەن ۆەلوسيپەدتەرگە ارنالعان كوشەلەردى سالۋ كەزەگى كەلەسى جىلدىڭ ەنشىسىندە. ويتكەنى, اياقجولدار تۇسەتىن نىساندارعا بيىل كوممۋنيكاتسيالىق قاجەتتىلىكتەر جۇرگىزىلەتىن بولادى.
انىقتامالىق: «شىمكەنت-سيتي» قالاشىعى شاھاردىڭ سولتۇستىك ايماعىندا, بايدىبەك بي ەسكەرتكىشىنە تاياۋ ماڭدا ورنالاسقان نىسان. اۋدان زاماناۋي ينفراقۇرىلىمىمەن, تۇرمىستا, بيزنەستى باستاۋدا قولايلى جاعدايىمەن جانە ەڭ جوعارى قالا قۇرىلىسى مەن ساۋلەتى جونىنەن ەرەكشەلەنەدى. اتالعان جوبا شىمكەنتتىڭ 2020 جىلعا دەيىنگى دامۋ تۇجىرىمداماسى اياسىندا ىسكە اسىرىلۋدا.
