قازاقستان قاعيداتى ايقىن

ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ توراعاسى ەرلان نىعماتۋلين بۇل كۇندەرى  نيۋ-يوركتە ءوتىپ جاتقان بۇۇ تۇراقتى دامۋ جونىندەگى كوميسسياسىنىڭ 19-سەسسياسىنىڭ جۇمىسىندا بايانداما جاسادى. ول جوعارى دەڭگەيدەگى سەگمەنتتىڭ اشىلۋىندا قازاقستاننىڭ 1992 جىلى قابىلدانعان يوحاننەسبۋرگ جوسپارى­نىڭ شەشىمدەرىن ىسكە اسىرۋ بويىنشا قابىلداعان شارالارى تۋرالى ايتتى. ول قازاقستاننىڭ ن.ءا.نازارباەۆتىڭ باسشىلىعىمەن  الەمنىڭ يادرولىق قا­رۋ­سىز دامۋ پرينتسيپتەرىن مۇلتىكسىز ۇستاناتىنىن, اتاپ ايتقاندا, سەمەي پوليگونىنىڭ جابىلۋىن جانە تۇراقتى دامۋ  پرينتسيپتەرى مەن باستامالارى­نىڭ ءبىرىزدى جۇزەگە اسىرىلۋىن اتاپ ءوتتى. سونىمەن قاتار, قاتىسۋشىلاردى قازاقستانداعى تۇراقتى دامۋ, ەنەرگيا جانە رەسۋرس ۇنەمدەۋ سالاسىنداعى باعدارلامالىق قۇجاتتارمەن, سونداي-اق ەلىمىزدىڭ ەۋروپالىق جانە  ازيالىق ىنتىماقتاستىق ۇدەرىستەرىن  جاقىن­داستىرۋ  جونىندەگى شارالارىمەن جانە باستامالارىمەن تانىستىردى. ە.ز.نىعماتۋلين سەسسيادا كوتەرىلگەن ماسەلەلەر بويىنشا ەكى جاقتى كەزدەسۋلەر مەن ينتەراكتيۆتى جارىسسوزدەرگە قاتىستى. حالىقارالىق قاتىسۋشىلار تاراپىنان قازاقستان­نىڭ تۇراقتى دامۋ پرينتسيپتەرى مەن مودەلدەرىن قوعامدىق ءومىردىڭ بارلىق سالا­لا­رىنا ەنگىزۋ بويىنشا قابىل­داعان شارا­لارىنا وڭ باعا بەرىلدى. اسىرەسە, 2010 جىلى قابىلدانعان ەكو­لو­گيالىق  تازا, قالدىقسىز جانە رەسۋرس ۇنەمدەيتىن تەحنولوگيالاردى ەنگىزۋگە باعىتتالعان ۇدەمەلى يندۋس­تريالىق-يننوۆاتسيالىق دامۋ ءجونىن­دەگى مەملەكەتتىك باعدارلاما ۇلكەن قى­زىعۋشىلىق تۋعىزدى. ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتى ءتور­اعا­سىنىڭ سەسسيا بارىسىندا ۇسىنعان اقپاراتى حالىقارالىق قوعامداستىققا قازاقستاننىڭ  ۇلتتىق شارالاردى ءجۇ­زە­گە اسىرۋدا, سونداي-اق تۇراقتى دا­مۋدى قامتاماسىز ەتۋدە حالىقارالىق تۇراقتى دامۋ پرينتسيپتەرىن ۇستا­ناتىنىن كورسەتتى. ايباتىر سەيتاق, جۋرناليست.