«قۇرمەتتى باقىتجان ءابدىر ۇلى! مەنىڭ دەپۋتاتتىق ساۋال جولداۋىما ازاماتتىق ءجانە مەملەكەتتىك اۆياتسيا سالاسىنداعى ۇشۋ قاۋىپسىزدىگىن قامتاماسىز ەتۋدىڭ ءتيىمسىز جۇيەسى سەبەپ بولىپ وتىر. قازىرگى ۋاقىتتا ازاماتتىق اۆياتسيا سالاسىن سەرتيفيكاتتاۋ, سونداي-اق ۇشۋ قاۋىپسىزدىگىن قاداعالاۋ مەن باقىلاۋ فۋنكتسيالارى قازاقستاندا ءبىر عانا ورگاننىڭ – قازاقستان رەسپۋبليكاسى ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتىنىڭ قاراۋىنا بەرىلگەن, ياعني سول مەملەكەتتىك ورگان سەرتيفيكاتتايدى جانە قاداعالاۋ مەن باقىلاۋدى جۇزەگە اسىرادى.
بۇل قالىپتاسقان جاعداي, مەنىڭشە, قابىلداناتىن شەشىمدەردىڭ وبەكتيۆتىلىگىن قامتاماسىز ەتپەيدى, سىبايلاس جەمقورلىق پەن قۇقىق بۇزۋشىلىققا جاعداي تۋعىزادى, سونىڭ نەگىزىندە اۆياتسيالىق وقىس وقيعالاردىڭ تۋىنداۋ تاۋەكەلدەرى ارتا تۇسەدى. ەگەر ستاتيستيكاعا ءمان بەرسەك, 2012 جىلدان 2016 جىلعا دەيىنگى ۋاقىت ىشىندە قازاقستاندا 30-دان استام اۆيااپاتتار مەن وقىس وقيعالار ورىن الىپ, 85-تەن اسا ادامنىڭ ءومىرى قيىلدى, بۇل سەرتيفيكاتتاۋ مەن قاداعالاۋ ءراسىمدەرى ساپاسىنىڭ تومەندىگىن كورسەتەدى.
وسىعان بايلانىستى, ءبىرىنشىدەن, ازاماتتىق جانە مەملەكەتتىك اۆياتسياداعى سەرتيفيكاتتاۋ, قاداعالاۋ جانە باقىلاۋ ءجونىندەگى مەملەكەتتىك فۋنكتسيالاردى ءارتۇرلى مەملەكەتتىك ۆەدومستۆولارعا قايتا ءبولۋ قاجەت. ەكىنشىدەن, قازاقستان رەسپۋبليكاسىنىڭ ۇكىمەتى جانىنان ۇشۋدىڭ قاۋىپسىزدىگىن قاداعالاۋدى جۇزەگە اسىراتىن جانە اۆياتسيالىق وقىس وقيعالارعا تەرگەپ-تەكسەرۋ جۇرگىزەتىن دەربەس مەملەكەتتىك ورگان قۇرۋ كەرەك. بۇل ورگاننىڭ قىزمەتى ازاماتتىق اۆياتسيا سالاسىمەن عانا شەكتەلمەۋى ءتيىس. ونىڭ قاداعالاۋى مەن باقىلاۋىنا مەملەكەتتىك ورگاندار اۆياتسياسىنىڭ قىزمەتى دە (قم, ۇقك, ءىىم ءجانە ت.ب.) جاتۋى قاجەت, سەبەبى بۇل مەملەكەتتىك ورگاندارداعى ۇشۋ قاۋىپسىزدىگىن قامتاماسىز ەتۋمەن جانە اۆيااپاتتاردى تەرگەپ-تەكسەرۋمەن بايلانىستى قالىپتاسقان جاعداي, ول دا جاقسارتۋدى قاجەت ەتەدى. ءالى كۇنگە دەيىن مەملەكەتتىك اۆياتسياداعى (قم, ۇقك شەكارا قىزمەتى, ۇلتتىق ۇلان) جانە جەكەمەنشىك اۆياتسياداعى سوڭعى جىلدارى ورىن العان اپاتتاردىڭ, وقيعالاردىڭ رەسمي تۇردە جاريالانعان ناقتى انىقتاماسى جوق. وسى سەبەپتەن اۆياتسيالىق وقيعالارعا پروفيلاكتيكا جۇرگىزۋ ءمۇمكىن بولماي وتىر.
سونداي-اق, ۇشۋ قاۋىپسىزدىگىن قامتاماسىز ەتۋ ماسەلەسىن ءبىرنەشە مەملەكەتتىك قۇرىلىمنىڭ جۇمىسىمەن بايلانىستى كەشەندى مىندەت رەتىندە قاراۋ كەرەك. ونى شەشۋدىڭ جولدارى وسى سالاداعى عىلىمي-زەرتتەۋ جۇمىستارىنىڭ ناتيجەلەرىنە, ولاردى قامتاماسىز ەتۋ پراكتيكاسىنا ەندىرۋگە دە بايلانىستى. سونىمەن بىرگە, ۇشۋ قاۋىپسىزدىگىن ءتيىستى قاداعالاۋ مەن باقىلاۋدى قامتاماسىز ەتۋ, اسىرەسە, سوڭعى ۋاقىتتاردا ورىن الىپ وتىرعان تەررورلىق اكتىلەردىڭ جاندانۋى اياسىندا وتە ماڭىزدى. بۇعان قوسا, بۇگىنگى تاڭدا ۇشاقسىز ۇشاتىن اپپاراتتاردىڭ اۋە كەڭىستىگىن پايدالانۋىنا دا باقىلاۋ جوق.
باياندالعاننىڭ نەگىزىندە, كورسەتىلگەن ماسەلەلەردى قاراۋىڭىزدى جانە قاراۋ ناتيجەسى بويىنشا زاڭدا بەلگىلەنگەن مەرزىمدە جازباشا جاۋاپ بەرۋىڭىزدى سۇرايمىن».
