ءىس-شاراعا مادەنيەت جانە سپورت مينيسترلىگىنىڭ ارحيۆ ءىسى ءجانە قۇجاتتاما دەپارتامەنتىنىڭ, مەملەكەتتىك ارحيۆ مەكەمەلەرىنىڭ وكىلدەرى, «زەردە» ۇح باسشىلارى, «تۇران» ۋنيۆەرسيتەتىنىڭ وقىتۋشىلارى مەن ستۋدەنتتەرى, پرەزيدەنت ءارحيۆىنىڭ ۇجىمى قاتىستى. تانىستىرىلىم بارىسىندا قازاقستانداعى مەملەكەتتىك ارحيۆتەردەگى اقپاراتتىق تەحنولوگيالاردى ءازىرلەۋ مەن ەنگىزۋدىڭ كەلەلى ماسەلەلەرى تالقىلاندى.
تانىستىرىلىمدى كىرىسپە ءسوزبەن اشقان پرەزيدەنت ارحيۆىنىڭ ديرەكتورى بوريس جاپاروۆ جاھاندانۋ داۋىرىندە تسيفرلى تەحنولوگيالارعا كوشۋ, بۇل ءۇردىستىڭ ماڭىزدى قىرىنا جاتاتىندىعىن اتاپ ءوتتى. «ەل تاريحىنىڭ دەرەكتەرى ساقتالاتىن قازاقستان ارحيۆتەرى بۇل ۇردىسكە بەلسەندى تۇردە جۇمىلدىرىلىپ وتىر. تسيفرلى تەحنولوگيالار قاعازدى قۇجاتقا تسيفرلى كوشىرمە جاساۋ ارقىلى ءتۇپنۇسقالىعىن ساقتاۋ مۇمكىندىگىن بەرەدى. بۇل ءبىر جاعىنان, ساقتاۋدىڭ ءمىندەتتەرىن شەشىپ بەرسە, ال ەكىنشى جاعىنان, ارحيۆتىك مۇرانىڭ جاپپاي تسيفر-
لاۋ دەرەكتەرىمەن جۇمىس جاسايتىن زەرتتەۋشىلەر سانىنىڭ ۇلعايۋىنا ءمۇمكىندىك بەرەدى. اقپاراتتىق تەحنولوگيالاردىڭ ارقاسىندا قۇجات اشىق ءارى قولجەتىمدى كۇيگە ەنەدى», دەدى ول.
تسيفرلى فورماتتاعى اقپاراتتىڭ جاڭا ءتۇرى قازىرگى تاڭدا قارقىندى ءتۇردە دامىپ كەلەدى, سوندىقتان ارحيۆتەر ەلەكتروندى ارحيۆتەردىڭ ساقتالۋىن قامتاماسىز ەتۋى ءتيىس. بيىلعى جىلدىڭ باسىندا قازاقستاندىق ارحيۆشىلەر امەريكا قۇراما شتاتتارىندا بولىپ, وندا شەتەلدىك ارىپتەستەرمەن تسيفرلى تەحنولوگيالارعا كوشۋ ءۇردىسى بويىنشا تاجىريبە الماسىپ قايتتى.
«ارحيۆتىك قۇجاتتاردى تسيفرلاۋ امەريكالىق ارحيۆشىلەردىڭ ەڭ باستى مىندەتتەرىنىڭ ءبىرى بولىپ تابىلادى. قازاقستاندىق جانە امەريكالىق ارحيۆتەردەگى قولدانىلاتىن جۇمىس تەحنولوگيالارى ءبىر سيپاتتا. سونىمەن قاتار, پرەزيدەنت ءارحيۆى قۇجاتتاردى تسيفرلاۋ مەن «ەلەكتروندى ارحيۆتى» قۇرۋ ىرعاعى بويىنشا امەريكالىق ارحيۆتەردەن وزىق ەكەندىگىن» ب.جاپاروۆ اتاپ كورسەتتى.
نۇرسۇلتان نازارباەۆ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىندا تسيفرلى تەحنولوگيالارعا كوشۋ تۋرالى ناقتى تاپسىرما بەردى. سونىمەن قاتار, مەملەكەت باسشىسى قازاقستان زاڭناماسىن جاڭا جاعدايعا بەيىمدەۋ كەرەكتىگىن اتاپ ءوتىپ, «كوممۋنيكاتسيانىڭ دامۋى مەن وپتيكالىق-تالشىقتى ينفراقۇرىلىمعا جاپپاي قولجەتىمدىلىكتى دە قامتاماسىز ەتۋ كەرەك. تسيفرلى يندۋستريانى دامىتۋ باسقا بارلىق سالالارعا سەرپىن بەرەدى. سوندىقتان, ۇكىمەت ءىت سالاسىن دامىتۋ ماسەلەسىن ەرەكشە باقىلاۋدا ۇستاۋعا ءتيىس» ەكەندىگىن ناقتى باعدار ەتىپ قويدى.
2014 جىلى پرەزيدەنت ارحيۆىندە «2015-2018 جىلدارعا ارنالعان اقپاراتتاندىرۋ تۇجىرىمداماسى مەن باعدارلاماسى قابىلدانىپ, سوعان ءسايكەس قۇجاتتاردى جاپپاي تسيفرلاۋ باستالدى. قازىرگى تاڭدا پرەزيدەنت ءارحيۆىنىڭ «ەلەكتروندى ارحيۆ» بازاسىنا 62 مىڭنان استام ءىس ەنگىزىلدى. بۇل زەرتتەۋشىلەردىڭ «ارحيۆتىك قور» دەرەكتەر بازاسىنا قوسىلۋىنا جانە قور, ءتىزىمدەمە, قۇجات دەڭگەيىندەگى اقپاراتتار الۋىنا مۇمكىندىك بەرەدى.
بيىلعى جىلى ءارحيۆتىڭ وقۋ زالىنا ونلاين قولجەتىمدىلىك ۇسىنۋ ارقىلى زەرتتەۋشىلەردىڭ ەڭ تۇكپىردەگى جۇمىستارعا ارالاسۋ ءمۇمكىندىگى قولدانىسقا ەنگىزىلەتىن بولادى. 2021 جىلى ارحيۆ تاعى دا 160 مىڭ ءىستى تسيفرلى فورماتقا كوشىرۋدى جوسپارلاپ وتىر.
ءىس-شارا سوڭىندا قاتىسۋشىلار پرەزيدەنت ارحيۆىندەگى تسيفرلاۋ ۇدەرىسىنىڭ بارىسىمەن تانىستى.
ايگۇل احانبايقىزى,
«ەگەمەن قازاقستان»
الماتى
