داريانىڭ ايتۋىنشا, بۇل بايقاۋعا ەلىمىزدەگى تەلەارنالاردا جانە گازەتتەر مەن سايتتاردا جۇمىس ىستەيتىن جۋرناليستەر قاتىسىپ, وزدەرىنىڭ 300-دەن اسا جۇمىستارىن ۇسىنىپتى.
− ءبىزدىڭ شاھاردا «قايىرىمدىلىق» قورى, «ەكىباستۇز» بالالار قوعامدىق قورى ءجانە «ەكىباستۇزدىڭ بولاشاعى ءۇشىن» سەكىلدى بىرقاتار قوعامدىق بىرلەستىكتەر جۇمىس ىستەيدى. مەن وسى ۇيىمدار تاراپىنان اتقارىلىپ جاتقان قايىرىمدىلىق شارالار, ولاردىڭ تاعدىر تالكەگىنە ۇشىراعان جاندارعا جاساعان كومەگى جانە اۋىر ناۋقاسقا تاپ بولعان بالالارعا كورسەتكەن قولداۋلارى تۋرالى جازدىم. سونداي-اق, قاتەرلى دەرتكە ۇشىراعان ەكى بالاعا قامقورلىق شاراسى رەتىندە قايىرىمدىلىق كونتسەرتى ۇيىمداستىرىلىپ, جينالعان قارجىعا ولاردىڭ شەتەلدە ەمدەلىپ جاتقانىن ماقالاعا ارقاۋ ەتتىم, − دەيدى ارىپتەسىمىز.
ال, بايقاۋ قورىتىندىسىندا باس جۇلدەنى (پاريجگە ساپار) استانالىق جۋرناليست رەنات تاشقىنباەۆ جەڭىپ الىپتى. دارياعا ەكى ادامعا ارنالعان گونكونگكە ساياحات جاساۋعا 7 كۇندىك تەگىن جولداما بەرىلدى.
جۇلدەگەر جۋرناليست بۇل كۇندەرى قالالىق «وتارقا» گازەتى رەداكتورىنىڭ ورىنباسارى بولىپ قىزمەت ەتەدى. اتالمىش باسىلىم جاقىندا عانا 25 جىلدىق مەرەيتويىن اتاپ ءوتتى. ءبىز ارىپتەسىمىزگە ءسات-ساپار تىلەپ, ادامگەرشىلىك, جىلىلىق پەن جاقسىلىق تاقىرىبىن ارقاۋ ەتكەن ماقالالارى كوبەيە بەرسىن دەگىمىز كەلەدى.
فاريدا بىقاي,
«ەگەمەن قازاقستان»
پاۆلودار
