«بالا كەزىمدە فۋتبولعا قاتتى قىزىقتىم, ۇنەمى جاتتىعىپ ءجۇردىم. بىراق فۋتبولعا بارۋعا مۇمكىندىك بولمادى. مەكتەپ بىتىرگەن سوڭ, گومەلدەگى ورمان شارۋاشىلىعى ينستيتۋتىنا سىرتتاي وقۋعا ءتۇستىم. ول مەن تۋىپ-وسكەن رەچيتساعا جاقىن جەردە. ۇيدە بوس وتىرا بەرۋگە بولمايدى, سوندىقتان بازاردا جۇك تيەۋشى بولىپ جۇمىس ىستەي باستادىم. دەمالىس كۇندەرى اعالارىممەن, دوستارىممەن فۋتبول ويناپ تۇرۋشى ەدىك.
ويلاماعان جەردەن كاسىبي تۇردە اينالىسىپ كەتتىم. وعان جاقىن دوسىم كومەكتەستى. ونىڭ اكەسى مەنىڭ ءبىرىنشى باپكەرىممەن جاقىن تانىس ەكەن. ولار مەنىڭ فۋتبولمەن اينالىسۋىم كەرەكتىگىن ءجيى ايتىپ وتىراتىن. كەيىننەن سول ءبىرىنشى باپكەرىم بەلارۋستىڭ ەكىنشى ليگاسىندا وينايتىن كالەنينكوۆيچتىڭ «ۆەرتيكالي» كلۋبىندا مەنى تەكسەرۋدەن وتكىزۋگە كەلىسىپ بەردى. ويلانباستان فۋتبولعا كەتتىم», – دەپ ەسكە الدى يۆان ماەۆسكي.
يۆان ماەۆسكي بەلارۋس چەمپيوناتىنداعى كەزىن كارەراسىنداعى ەڭ ماڭىزدى كەزەڭ دەپ ەسەپتەيتىنىن جاسىرىپ قالمادى.
«بەلارۋس چەمپيوناتى كاسىبي تۇردە دامۋىما سەپتىگىن تيگىزدى. ماعان ۇلكەن فۋتبولعا جول اشقان العاشقى كوماندا مينسكىنىڭ متز-ريپو كلۋبى بولاتىن. ول جەردە مەنى جوعارى ليگاسىندا سىناپ كوردى, سۇرىنبەي ءوتتىم. ءدال وسى كوماندادا وزىمە دەگەن سەنىمىم ارتا ءتۇستى. كوپ تاجىريبە جينادىم. بىراق وسى كۇنگە دەيىن بەلارۋس كۋبوگىنا عانا قول جەتكىزدىم. كوپتەگەن ماماندارمەن, فۋتبولشىلارمەن دايىندالدىم», – دەدى «استانا» ويىنشىسى.
ال بەلارۋس چەمپيوناتىنان كەيىن پولشاعا قالاي اۋىسقان ەكەن؟ يۆاننىڭ ايتۋىنشا, كۇتپەگەن جەردەن ۇسىنىس كەلگەن ەكەن.
«بۇل قىزىق بولدى. «مينسك» ساپىنداعى كەزەكتى ماۋسىم اياقتالعان كەز بولاتىن. ءبىر اگەنت ماعان شابۋىلشى دوسىم الەكساندر ماكاستىڭ ءنومىرىن سۇراپ تەلەفون سوقتى. اڭگىمە اراسىندا وعان شەتەلدىك كلۋبتاردا باق سىناپ كورگىم كەلەتىنىن ايتىپ قالدىم. ءبىراز سويلەستىك, سونىمەن ءبىتتى. كۇندەردىڭ بىرىندە ەگيپەتتە دەمالىپ جۇرگەنىمدە, پولشادا مۇمكىندىك بارىن ايتىپ, حابارلاستى. ويلانباستان بىردەن كەلىستىم. وسىلايشا جاڭا جىلدان كەيىن پولشاعا «زاۆيشا» كومانداسىنا كوشتىم», – دەدى ماەۆسكي.
يۆان ماەۆسكي پولشادا جاقسى قىرىنان كوزگە تۇسكەنمەن, كومانداسى ءساتتى ويناي المادى. ماۋسىم سوڭىندا «زاۆيشا» پرەمەر-ليگادان شىعىپ قالدى.
«راس, ول جەردە مەن ءۇشىن ءبارى جاقسى بولدى. وكىنىشكە قاراي, كوماندامىز قيىن جاعدايعا تاپ بولدى. و باستان مۇمكىندىگىمىز از بولدى, كەستەنىڭ سوڭىندا ءبىراز ۋاقىت تۇرىپ قالدىق. بىراق ماۋسىمنىڭ ەكىنشى جارتىسىن ويداعىداي باستادىق, سەگىز ويىن قاتارىنان ەشكىمگە ەسە جىبەرمەدىك. ليگاداعى ورنىمىزدى ساقتاپ قالۋ مۇمكىندىگى دە پايدا بولا باستادى. بىراق سوڭىندا از عانا ۇپاي جەتپەي قالدى.
جاڭا كومانداعا كەلىپ, بىردەن ءسىڭىپ كەتۋ وڭاي ەمەس. مۇنى نەمەن بايلانىستىرۋعا بولاتىنىن دا بىلمەيمىن. بىراق ءبىر ايتارىم, ارىپتەستەرىممەن, باپكەرىممەن, كلۋب باسشىلىعىمەن قارىم-قاتىناسىم جاقسى بولدى. ءوزىمدى ۇلكەن وتباسىنىڭ ءبىر مۇشەسىندەي سەزىندىم. بالكىم وسى جاعى ماعان وڭ اسەرىن تيگىزگەن بولار», – دەدى فۋتبولشى.
ماەۆسكيدىڭ كارەراسىنا ۇڭىلسەك, ترانسفەر كەزىندە رەسەيدىڭ «ءانجيى» سەكىلدى ەشقانداي كوماندا قوماقتى قارجى ۇسىنباپتى.
«ەڭ كوپ جالاقىنى دا سوندا ءجۇرىپ العان ەدىم. جۇرت وسى جايلى كوپ تالقىلادى. قالاي بولعاندا دا, ول كارەرامدى جالعاستىرۋ ءۇشىن جاقسى جول بولدى دەپ سەنىمدى تۇردە ايتا الامىن. رەسەي چەمپيوناتى الەمدەگى مىقتى چەمپيوناتتاردىڭ ءبىرى. سوندىقتان «انجي» ساپىنا اۋىسقانىما تەك قۋانىشتىمىن», – دەدى ماەۆسكي.
يۆان ماەۆسكي «استاناعا» اۋىسقاننان كەيىن كوپشىلىك ونى روحەر كانياسپەن سالىستىرعانى بەلگىلى.
«شىنىمدى ايتسام, بۇعان مۇلدەم ءمان بەرمەيمىن. مەن وزىمە, ءوز ويىنىما سەنىمدىمىن. جۇرتتىڭ روحەرمەن سالىستىرۋىنان قورىقپايمىن. ونىڭ ۇستىنە, ەكەۋىمىز ەكى ءتۇرلى فۋتبولشىمىز», – دەدى ول.
«استانانىڭ» جاڭا ويىنشىسى وسىعان دەيىنگى جولىققان قارسىلاستارى جايلى دا وي ءبولىستى.
«بەلارۋس قۇراماسىمەن يسپانياعا قارسى وينادىق. ولاردا بىلىكتى فۋتبولشىلار جەتەرلىك. ماسەلەن, داۆيد سيلۆانى الايىق. ودان دوپتى الۋ مۇمكىن ەمەس. شاماسى, ماعان ەڭ قيىن قارسىلاس بولعان ويىنشىلاردىڭ ءبىرى سول شىعار», – دەدى «استانانىڭ» 18-ءنومىرلى ويىنشىسى.
ءبىر قىزىعى. يۆان ماەۆسكي ءالى كۇنگە دەيىن چەمپيوندار ليگاسىندا ويناماپتى. ايتۋىنشا, ەلوردالىق كلۋبپەن وسى تۋرنيرگە جولداما الۋ ءۇشىن بارىن سالماق.
«ءيا, بۇل مەن ءۇشىن ازىرگە باعىنباي تۇر, بىراق جاقىندا ونىڭ ورنىن تولتىرامىن دەپ ويلايمىن. «استانانىڭ» چەمپيوندار ليگاسىنىڭ توپتىق كەزەڭىنە شىعۋى ءۇشىن بارىمدى سالۋعا دايىنمىن, قاجەت بولسا, ءتىپتى جانىمدى بەرۋگە دايىنمىن.
قازاقستاننىڭ ءۇش دۇركىن چەمپيونى اتانعان كومانداعا قوسىلعانىما قۋانامىن. كوپشىلىك ارتقان سەنىمدى اقتاۋعا تىرىسامىن», – دەپ ءسوزىن اياقتادى 28 جاستاعى ويىنشى.
دايىنداعان ايان ءابدۋالي «ەگەمەن قازاقستان»
