قازاق تىلىندەگى ونلاين كۋرس اشۋ يدەياسى بۇرىننان بار. بۇل زاڭدى دا, سەبەبى, ەڭ ساپالى ونلاين كۋرستاردىڭ 75 پايىزى اعىلشىن تىلىندە. ودان كەيىنگى ورىندا, ارينە, ورىس ءتىلدى پورتالدار. ال, قازاق تىلىندە مۇلدە جەتكىلىكسىز, بارىنىڭ ساپاسى ءتومەن, كوپشىلىك بىلە بەرمەيدى. ءبىلمەگەن سوڭ ارينە, تۇتىنۋشىلار دا اسا كوپ بولا قويمايدى. وسى جاعىنان العاندا ينتەرنەت ارقىلى العاشقى ءدارىسىن وقىعالى جاتقان «قازاقستاننىڭ اشىق ۋنيۆەرسيتەتى» جوباسىنىڭ ماڭىزى زور. راس, بۇرىن ينتەرنەت ارقىلى وقۋ تەك شەت ءتىلىن جەتىك مەڭگەرگەن, ارعى-بەرگى شەت ەل ۋنيۆەرسيتەتتەرىندە وقىپ كەلگەن جاستار ءۇشىن عانا قولجەتىمدى دۇنيە كورىنەتىن-ءدى. ال, اتالعان جوبانىڭ ارتىقشىلىعى – نەگىزگى اۋديتورياسى قازاقتىلدى ورتا بولماق. جانە جاس تالعامايدى. مەكتەپ وقۋشىلارىنان باستاپ زەينەتكەرلەرگە دەيىن ونلاين كۋرستى تەگىن قولدانا الادى.
كونفەرەنتسيانىڭ مودەراتورى, «WikiBilim» قوعامدىق قورىنىڭ پرەزيدەنتى نۇربەك ماتجانيدىڭ سوزىنە قاراعاندا, قازاقستاننىڭ بارلىق سالاداعى عىلىمي جەتىستىگى ەشقانداي شەت ەلدەن كەم ەمەس. سوندىقتان, قازاقشا ءدارىس تىڭداۋ تۇتىنۋشىلارعا عانا ەمەس, ەلىمىزدىڭ جوعارى وقۋ ورىندارى لەكتورلارى مەن عالىمدارىنىڭ ويىن ىسكە اسىرۋىنا مۇمكىندىك بەرەدى.
وpenU جوباسى تالاپكەرلەر مەن ستۋدەنتتەرگە عانا ەمەس, بەلگىلى ءبىر سالادا جۇمىس ىستەپ ءجۇرگەن, سونىڭ ىشىندە IT جانە تەلەكوممۋنيكاتسيالار ماماندارىنا دا پايدالى. مۇمكىندىگى شەكتەۋلى جاندار مەن ورتالىقتان شالعايدا ورنالاسقان اۋدان جانە اۋىل تۇرعىندارى دا ءوز قىزىعۋشىلىعى بويىنشا ءدارىس تىڭداي الادى.
بۇل پلاتفورما گارۆارد ۋنيۆەرسيتەتى مەن ماسساچۋسەتس تەحنولوگيا ينستيتۋتى ماماندارى جاساعان Open edX نەگىزىندە قۇرىلعان. سايتتا تۇيسىكتى ينتەرفەيس, ىڭعايلى بەينەپلەەر,
كۋرس تىڭداۋشىلارىنىڭ جەكە كابينەتى, تەست تاپسىرمالارى مەن كونسپەكتىلەر ورنالاستىرىلعان. جوبانىڭ ءبىرىنشى كەزەڭىندە IT, تەلەكوممۋنيكاتسيا جانە بيزنەس سالالارىنا قاتىستى 10 كۋرس ءازىرلەنگەن. اشىق ۋنيۆەرسيتەتتىڭ العاشقى لەكتورى بەلگىلى قازاقستاندىق عالىم, فيزيكا-ماتەماتيكا عىلىمدارىنىڭ دوكتورى, پروفەسسور, قر ۇعا اكادەميگى اسقار جۇمادىلداەۆ بولدى.
«بۇل – زامان تالابى. وسىنى جاساپ جۇرگەندەردىڭ ءبارى جاستار – ءبىلىمدى, جان-جاقتى, زامانىن تانىعان قىز-جىگىتتەر. اعىلشىنشا, ورىسشا, ەڭ باستىسى, قازاقشا بىلەدى. قازاقشا اۋىزەكى تىلدە سويلەۋگە بولادى, بىراق, عىلىمي دارەجەدە ءتىل ءبىلۋ وڭاي شارۋا ەمەس. قازاق ءتىلىن عىلىمي اينالىمعا ەنگىزەتىن وسىنداي جاستار. قازاق ەموتسيامەن, وبرازبەن ۇعادى. ماتەماتيكانى وبرازبەن ءتۇسىندىرۋ كەرەك, سوندا ەستە قالادى. بۇل العاشقى كەزەڭدە وتە ماڭىزدى. وسى كەزەڭدى ءساتتى ءتامامداعان تالاپكەر ءارى قاراي ەشكىمگە دەس بەرمەيدى. سول جاعىنان العاندا, بۇل ونلاين كۋرس-
تاردىڭ ماڭىزى وتە جوعارى», دەدى اكادەميك ءوز كەزەگىندە. سونداي-اق, ماتەماتيكا وسى ءبىر
كۋرسپەن توقتاپ قالماۋعا ءتيىس ەكەنىن, كەم دەگەندە ءدال وسىنداي جيىرما باعىتتا كۋرس وتكىزۋ كەرەك بولاتىنىن ايتتى.
الماس ءنۇسىپ,
«ەگەمەن قازاقستان»
سۋرەتتى تۇسىرگەن
نۇرمانبەت قيزات ۇلى
الماتى
