قاردىڭ مول ءتۇسۋى, ەكى كۇن قاتارىنان جاڭبىردىڭ جاۋى جانە كۇننىڭ كۇرت جىلۋى – وبلىستا توتەنشە جاعدايدىڭ ورىن الۋىنا اكەپ سوقتى. توڭ ءالى جىبىمەگەندىكتەن ەرىگەن قار سۋى مەن وزەن-كولدەردىڭ ارناسىنان اسقان تاسقىن سۋ جەرگە سىڭبەي, ساي-سالانى ساعالاپ, جىرا-جىلعانى جاعالاپ ورال قالاسى مەن تاسقالا, تەرەكتى, ءبورلى, شىڭعىرلاۋ, زەلەنوۆ, قازتالوۆ اۋداندارىنا قاراستى كوپتەگەن ەلدى مەكەندەرگە قاۋىپ توندىرۋدە. ابىروي بولعاندا, ادام شىعىنى جوق. بىراق مال باسىندا ءولىم-ءجىتىم بار. 2580 ادام قاۋىپسىز ايماققا كوشىرىلدى. ولار ۋاقىتشا باسپانامەن جانە ىستىق تاماقپەن قامتاماسىز ەتىلدى. وبلىستىق اۋىل شارۋاشىلىعى باسقارماسىنىڭ باستىعى مارات وڭعاربەكوۆتىڭ ءمالىمدەۋىنشە, 20 مىڭ گەكتار كۇزدىك بيداي سۋ استىندا قالعان. ەلەكتر قۋاتىن تاراتۋشى قوسالقى ستانسالار مەن گيدرومەتەورولوگيالىق ستانسالاردىڭ دا كەيبىرى ىستەن شىققان. وبلىستىق ماڭىزى بار 27 جولدى تاسقىن شايىپ كەتكەن.
12 ءساۋىر كۇنى كەشكىسىن وبلىستىق اكىمدىكتە وتكەن توتەنشە جاعدايلار جونىندەگى وبلىستىق كوميسسيانىڭ ەكىنشى وتىرىسىندا توتەنشە جاعدايلار ءمينيسترى ۆلاديمير بوجكو, ءاسىرەسە, كۇننىڭ ەكىنشى جارتىسىندا جاعدايدىڭ بۇرىنعىدان بەتەر كۇردەلەنە ءتۇسكەنىن جەتكىزدى.
توتەنشە جاعدايلاردىڭ الدىن الۋ بويىنشا وبلىستىق كوميسسيانىڭ توراعاسى تيمۋرجان ءشاكىموۆتىڭ مالىمدەۋىنشە, ءبۇگىنگى تاڭدا قۇتقارۋشىلاردىڭ نەگىزگى كۇشى سامال شاعىن اۋدانىنا باعىتتالعان. زەلەنوۆ اۋدانىنداعى احۋال دا كۇردەلى. تاسقالا اۋدانىندا سۋ قايتا باستادى. كارديوورتالىقتى, «جاس ءداۋرەن» بالالار ءۇيىن, «يۆۋشكا» ساۋىقتىرۋ ورتالىعىن, «ەۋرازيا» تۋريستىك كەشەنى مەن «دارىن» ورتالىعىن, قارتتار مەن مۇگەدەكتەر ءۇيىن تاسقىن قۇرساۋلاپ الدى.
ورال قالاسىنىڭ اكىمى ساميعوللا ورازوۆ العاشقى كۇندەرى م ۇلىكتەرىن تاستاپ قاۋىپسىز ايماققا كوشۋدە اسا بەلسەندىلىك تانىتا قويماعان جانداردىڭ 12 ءساۋىر كۇنى قارقىندى كوشە باستاعانىن ايتتى. قالا اۋماعىنداعى 167 تۇرعىن ءۇي سۋ استىندا قالعان. قالالىق جەدەل شتاب پەن قۇتقارۋ قىزمەتتەرىنە تولاسسىز ءتۇسىپ جاتقان حابارلامالار سانى تۇستەن كەيىن كۇرت ارتقان. يەسىز قالعان ساياجايلار مەن ەلدى مەكەندەردى قۇقىق قورعاۋ ورگاندارىنىڭ قىزمەتكەرلەرى كۇزەتپەك.
– تاسقىن تولاستار ەمەس. كەرىسىنشە, سۋ مولشەرى ۇلعايعان ۇستىنە ۇلعايا تۇسۋدە. وبلىستا وتە قيىن جاعداي قالىپتاسىپ وتىر. جارىلىس جۇمىستارى كەش جۇرگىزىلدى دەگەن جورامالدار ايتىلۋدا. مەن مۇنىمەن كەلىسپەيمىن. وبلىس باسشىلىعى مەن ءتوتەنشە جاعدايلار دەپارتامەنتى تاسقىن سۋدىڭ قاۋپى ءالى تولىق انىقتالماي تۇرىپ, ياعني 5 ءساۋىر كۇنى وڭىردە توتەنشە جاعدايدىڭ ورناعانىن حابارلاماعاندا جاعداي قازىرگىدەن دە كۇردەلى بولار ەدى. «قازگيدرومەت» ماماندارى بيىلعى كوكتەمدە تاسقىننىڭ دەڭگەيى ورتاشا بولادى دەگەنىمەن, قاردىڭ قالىڭ بولۋى, كۇننىڭ كۇرت جىلىنۋى مەن جاۋىن-شاشىننىڭ مول ءتۇسۋى سياقتى تابيعي فاكتورلاردى الدىن الا انىقتاۋ مۇمكىن بولمادى. ەكى-ءۇش كۇننىڭ ىشىندە ءبىر ايلىق جاۋىن-شاشىن جاۋدى, – دەدى ۆ.بوجكو.
– تاسقىن سۋدان زارداپ شەككەندەرگە ماتەريالدىق كومەك ءالى كورسەتىلگەن جوق, – دەدى وبلىس اكىمى باقتىقوجا ىزمۇحامبەتوۆ. – جەرگىلىكتى بيۋدجەتتەن قارجى ءبولىنەتىن بولادى. توتەنشە جاعدايلار مينيسترىمەن بىرگە رەسپۋبليكالىق بيۋدجەتتەن قارجى ءبولۋ تۋرالى پرەزيدەنت اكىمشىلىگىنە, ۇكىمەت باسشىسىنىڭ اتىنا حات جىبەرىلدى. (ەسكەرتە كەتەيىك, بەت قاتتالىپ جاتقاندا رەداكتسياعا ۇكىمەت رەزەرۆىنەن قارجى ءبولىنگەنى تۋرالى حابار كەلىپ ءتۇستى. ول گازەتتىڭ ءبىرىنشى بەتىندە جاريالانىپ وتىر. – رەد.)
باقتىقوجا سالاحاتدين ۇلى سونداي-اق شىعىندى وتەۋ بارىسىندا مالىمەتتىڭ ناقتى بولۋى قاجەتتىگىن قاداپ ايتتى. جاڭا باسپانالاردىڭ اۋدانى تاسقىننان قيراعان باسپانانىڭ اۋدانىمەن ءسايكەس كەلۋى ءتيىس. ال ءىشىنارا بۇزىلعان ۇيلەر ءجوندەۋدەن وتەدى.
«باتىسسۋشار» كاسىپورنىنىڭ ديرەكتورى قازبەك كەنجەعاليەۆ جايىق وزەنىندەگى سۋ دەڭگەيىنىڭ 6 مەترگە جەتكەنىن جانە تاعى دا كوتەرىلەتىنىن, سونداي-اق دەركول, شاعان وزەندەرىندە ءالى دە كۇردەلى جاعدايدىڭ ساقتالىپ وتىرعاندىعىن جەتكىزدى. وبلىس اۋماعىندا 13-14 ءساۋىردە جاڭبىر جاۋىنا بايلانىستى مۇنداعى وزەندەردەگى سۋ دەڭگەيى تاعى كوتەرىلۋى مۇمكىن ەكەندىگىن ەسكەرتكەن مينيستر ۆ.بوجكو تابيعي اپاتپەن كۇرەسكە جۇمىلدىرىلعان بارلىق جاۋاپتى قىزمەتكەرلەرگە جۇمىستى بارىنشا شيراتۋدى, ەڭ باستىسى, ادام شىعىنىنا جول بەرمەۋدى تاپسىردى.
تەمىر قۇسايىن.
باتىس قازاقستان وبلىسى.
