رايان بارنەتت جانات جاقيانوۆتى جەكپە-جەككە شاقىردى

سولتۇستىك يرلانديانىڭ جەڭىل سالماقتاعى بوكسشىسى رايان بارنەتت (15-0, 9 كو) WBA (Super) جانە IBO تۇجىرىمدارى بويىنشا الەم چەمپيونى قازاقستاندىق جانات جاقيانوۆقا (27-1, 18 كو) قارسى ايقاسقىسى كەلەتىنىن مالىمدەدى. بۇل تۋرالى vringe.com حابارلادى. «ءبىر كەزدەرى جاقيانوۆپەن حەتتوننىڭ زالىندا جاتتىققانمىن. شارشى الاڭدا وعان قارسى تۇرۋ وڭاي ەمەستىگىن بايقادىم. سول سەبەپتى جاناتپەن كەزدەسكىسى كەلمەيتىندەردىڭ قاتارى از ەمەس. بىراق مەن ونىمەن جاتتىعۋدا ەمەس جۇرت الدىندا كۇش سىناسسام دەيمىن. ونى جەڭۋگە قابىلەتىم جەتكىلىكتى دەپ ويلايمىن», – دەدى 24 جاستاعى بوكسشى. «ادام بۋتتىڭ قول استىندا ءجۇرىپ ءبىراز نارسەنى ۇيرەندىم. ۋاقىت سوزباي جانات ەكەۋىمىز جۇدىرىقتاسساق دەيمىن», – دەدى ول. جاقيانوۆ بىرەر اپتا بۇرىن امەريكالىق روۋشي ۋوررەندى تورەشىلەردىڭ شەشىمىمەن جەڭىپ, WBA (Super) جانە IBO بەلبەۋلەرىن يەلەنگەن. «رايان ەكەۋىمىز بۇل جونىندە سويلەستىك. ول راسىمەن دە قازاقستاندىق بوكسشىمەن جۇدىرىقتاسقىسى كەلەدى. رينگتە قانداي قيىندىقتارعا تاپ بولاتىنىن دا جاقسى بىلەدى. بىراق ءوز كۇشىنە سەنىمدى بولعاننان كەيىن جاناتتى اشىق تۇردە جەكپە-جەككە شاقىرىپ وتىر», – دەدى بارنەتتىڭ جاتتىقتىرۋشىسى ادام بۋت.