بىرىككەن ۇلتتار ۇيىمىنىڭ قاۋىپسىزدىك كەڭەسى شۇعىل جيىن وتكىزەدى

بىرىككەن ۇلتتار ۇيىمىنىڭ قاۋىپسىزدىك كەڭەسى شۇعىل جيىن وتكىزەدى. باسقوسۋعا بىرەر كۇن بۇرىن يراننىڭ ورتاشا قاشىقتىققا ارنالعان بالليستيكالىق زىمىران ۇشىرۋى سەبەپ. ديپلوماتتار «يراننىڭ بۇل ارەكەتى بۇكىل تاياۋ شىعىسقا قاۋىپ ءتوندىرۋ» دەپ دابىل قاققان يزرايل پرەمەر-ءمينيسترىنىڭ سۇراۋى بويىنشا جيىلماق. بۇعان دەيىن امەريكالىق باسىلىمدار بارلاۋ قىزمەتىنە سىلتەمە جاساپ, جەكسەنبىدە يراننىڭ بالليستيكالىق زىمىران ۇشىرعانىن حابارلاعان ەدى. ول شامامەن مىڭ شاقىرىم قاشىقتىققا ۇشقان. قاۋىپسىزدىك كەڭەسىنىڭ تۇجىرىمداماسى بويىنشا يراننىڭ مۇنداي سىناقتاردى جۇرگىزۋىنە تىيىم سالىنعان. وسىعان بايلانىستى يزرايل پرەمەرى بەنيامين نەتانياحۋ اقش پرەزيدەنتى دونالد ترامپپەن كەزدەسىپ, يرانعا جاڭا سانكتسيالار سالۋ جايىن تالقىلاۋدى جوسپارلاعان. "وسى جەكسەنبىدە يران تاعى دا بالليستيكالىق زىمىران ۇشىردى. بۇل - قاۋىپسىزدىك كەڭەسىنىڭ تۇجىرىمداماسىن مويىنداماي ونى ورەسكەل بۇزۋ. وسىعان بايلانىستى اقش پرەزيدەنتىمەن كەزدەسىپ, يرانعا باعىتتالعان سانكتسيالاردى كۇشەيتۋ جايىن تالقىلاماقپىن. بالليستيكالىق سىناق يزرايل مەن اقش ءۇشىن ەمەس, تاياۋ شىعىستاعى تالاي ەلگە قاۋىپ توندىرەدى. يراننىڭ بۇل ارەكەتى جاۋاپسىز قالماۋى ءتيىس", - يزرايل پرەمەر-ءمينيسترى بەنيامين نەتانياحۋ.