قىلقالامنان تامعان سۇلۋلىق

الماتىدا قازاقستان رەس­پۋبليكاسى تۇڭعىش پرەزي­دەنتى – ەلباسى قورىندا الماتى قالاسى اكىمدىگىنىڭ جانە سۋرەتشىلەر وداعىنىڭ قولداۋىمەن 18-31 قاڭتار ارالىعىندا وتەتىن «مەن وسى ءساتتىڭ كۋاگەرىمىن» اتتى زاماناۋي ونەر كورمەسى اشىلدى. كورمەگە «100ح100» بايقاۋىنا قاتىسقان اۆتورلاردىڭ ەڭبەك­تەرى ۇسىنىلعان. تۇڭ­عىش پرەزيدەنت-ەلباسى قورى ۇيىمداستىرىپ وتىر­عان كورمەنىڭ شارتى – ءار سۋرەت­شىگە شەبەرلىگىن, كاسىبي قارىم-قابىلەتىن, شىندىق پەن سۇلۋلىقتى كورسەتۋ ءمىن­دەتتەلگەن. قازىردىڭ وزىندە كور­مەگە استانادان, الماتىدان, اتىراۋدان, قوستانايدان, قارا­عاندىدان, شىمكەنتتەن 50-دەن استام جۇمىس كەلىپ ءتۇستى. «مەن وسى ءساتتىڭ كۋاگەرىمىن» دەگەن اتاۋ – «مەن ءوز زامانىمنىڭ قۇرداسىمىن» دەگەن ويمەن وزەكتەس, ءوزارا تەرەڭ استاسىپ جاتقان ءبىرتۇتاس ۇعىم. بۇل تۇسىنىك سۋرەتشىنىڭ ماڭايىن­داعى ومىرلىك سيۋجەت­تەردى: وتباسىن, دوستارىن, قورشاعان ورتانى زەيىن قويىپ قاراۋعا مۇمكىندىك بەرەدى. ال كەيبىر قىلقالام شەبەرىنىڭ كارتينالارى جاراتىلىستىڭ مانىنە, ادامنىڭ ومىردەگى جانە تاريح كەڭىستىگىندەگى ورنى تۋرالى ويلارعا جەتەلەيدى. كورمەنىڭ ەرەكشەلىگى, بارلىق سۋرەتشىلەردىڭ كومپوزيتسياسى ءۇشىن ورتاق فورمات بەلگىلەنگەن. بۇل تالاپتىڭ ولاردىڭ مىندە­تىن كۇردەلەندىرە تۇسكەنى باي­قالادى. سۋرەتشى قالامىنان تۋعان بەينەلەر ءومىردىڭ سۇلۋ­لىعىن, قۇندىلىعىن كورسەتۋگە ارنالعاندىقتان, ءارتۇرلى بوياۋ­لار گامماسىمەن ورىلگەن تۋىندىلار تاقىرىپقا اسا باي. جۇرت نازارىنا ۇسىنىلعان ەڭبەكتەردىڭ كولەمى 100ح100 سم جانە تاۋەلسىزدىكتىڭ 25 جىل­دىعىنا وراي ورىندال­عاندىعى – كورمەنىڭ تاعى ءبىر ەرەكشەلىگى. كورمەگە كىرۋ تەگىن. ايگۇل احانبايقىزى, «ەگەمەن قازاقستان»