ەلۋ ەلدى مەكەن اۋىز سۋمەن قامتىلماق

پارلامەنت ءماجىلىسىنىڭ دەپۋتاتى سەرگەي سيمونوۆ ورال قالاسىنداعى «كۆانت»,  «سترويكومبينات» جانە «گيدروپريبور» جشس وندىرىستىك كاسىپورىندارىنىڭ جۇمىسشى قىزمەتكەرلەرىمەن كەزدەسىپ, «نۇر وتان» پارتياسىنىڭ سايلاۋالدى باعدارلاماسىندا العا قويىلعان ماسەلەلەردىڭ  ورىندالۋ بارىسى جونىندە اڭگىمەلەپ بەردى.  سونىمەن بىرگە, ول بۇگىنگى كۇنى پارلامەنت ماجىلىسىندە 83 زاڭ جوباسى بويىنشا جۇمىس جۇرگىزىلىپ جاتقانىنا, ونىڭ 51-ءى ءبىراۋىزدان ماقۇلدانىپ, سەناتقا تاپسىرىلعانىنا, سونىڭ ىشىندە 34 زاڭ جوباسىنا ەل پرەزيدەنتىنىڭ قول قويعانىنا توقتالىپ ءوتتى. بۇ­دان سوڭ سەرگەي اناتولەۆيچ پار­لا­مەنت ماجىلىسىندە ناقتى وسى باتىس قازاقستانعا قاتىستى قانداي شەشىم­دەر بەلگىلەنگەنىنە ەكپىن ءتۇسىردى. ونىڭ ايتۋىنشا, بيىلعى جىلى اقجايىق ايماعىنداعى 50 ەلدى مەكەن اۋىز سۋمەن قامتىلماق. بۇعان قوسا, رەسپۋبليكالىق بيۋدجەتتەن 4 ورتا مەكتەپ سالۋعا قاجەتتى قاراجات بولىنگەن. مۇنىڭ ءوزى وب­لىستاعى مەكتەپتەردىڭ ءبارىن ءبىر اۋى­سىمدىق وقىتۋ جۇيەسىنە كو­شى­رۋ ماقساتىنان تۋىنداپ وتىر, دەپ اتاپ كورسەتتى ءماجىلىس دەپۋتاتى. سەرگەي سيمونوۆ سايلاۋ­شى­لاردىڭ بىرقاتار سۇراقتارىنا جاۋاپتار قايتارا كەلىپ, تاعى دا ويعا تۇسكەن ماسەلەلەردى جەتكىزگىسى كەلسە, ەل ازاماتتارى ءۇشىن پارلامەنت سايتى قاشاندا اشىق ەكەنىن ايتتى. ياعني, تۇرعىندار وسى سايتتى اشىپ كىرىپ, وزدەرىن تولعاندىرعان ماسەلەلەر بويىنشا كەز كەلگەن پارلامەنت دەپۋتاتىنىڭ اتىنا ساۋال قويا الادى. تەمىر قۇسايىن, «ەگەمەن قازاقستان» باتىس قازاقستان وبلىسى