2016 جىلى كاسىپكەرلىككە قاتىستى قانداي وزگەرىستەر بولدى؟

2016 جىلى ەلدەگى زاڭنامالىق وزگەرىستەردىڭ ىشىندەگى مىندەتتى الەۋمەتتىك مەديتسينالىق ساقتاندىرۋ, سالىق جانە كەدەندىك زاڭنامالارداعى وزگەرىستەر, ەلەكتروندى شوت-فاكتۋرالار تۋرالى زاڭنامالىق جاڭالىقتار 2017 جىلدان باستاپ كاسىپكەرلەردىڭ جۇمىسىنا تىكەلەي اسەر ەتپەك. ايتا كەتەيىك, مەملەكەتتىڭ الەۋمەتتىك مەديتسينالىق ساقتاندىرۋ قورىنا جارنا تولەۋ مەرزىمى 2017 جىلدىڭ 1 شىلدەسىنەن 2018 جىلدىڭ 1 قاڭتارىنا اۋىستىرىلعان ەدى. ياعني, مىندەتتى الەۋمەتتىك مەديتسينالىق ساقتاندىرۋ اۋدارىمدارى جەكە تابىس سالىعى مەن ۇجىمدىق تابىس سالىعى شەگەرىمدەرىنە جاتقىزىلاتىن بولادى. زەينەتاقى اۋدارىمدارىنان بولەك, دەنساۋلىق ساقتاۋعا اۋدارىمدار جاسالادى. سونداي-اق, بيىلدان باستاپ الكوگولدىك ونىمدەر مەن تەمەكى ونىمدەرىنە اكتسيز مولشەرلەمەلەرى كەزەڭ-كەزەڭىمەن وسەتىن بولادى. بۇدان بولەك, بيىلدان باستاپ شيپاجاي ۇيىمدارىنىڭ جەر استى قويناۋلارىن پايدالانۋشىلارى وندىرگەن جەراستى سۋلارىنا بەكتىلگەن مولشەرلەمەلەر ارزانداتىلدى. ەگەر بۇرىن مولشەرلەمە 1 اەك شاماسىندا بولسا, قازىر بۇل كورسەتكىش 0,003 اەك-كە تەڭ. ەستەرىڭىزگە سالا كەتەيىك, ءتاريفتى ارزانداتۋ تۋرالى العاش بولىپ ءبىزدىڭ ءوڭىردىڭ كاسىپكەرلەرى ماسەلە كوتەرگەن ەدى. ۇكپ ۇسىنىستارى مەن تالقىلاۋلاردان سوڭ, ءماجىلىس بۇل تۇزەتۋدى ماقۇلدادى. ال سالىق كودەكسىنىڭ 427-بابىنا 2-1 تارماقشاسىن ەنگىزۋ كەلەسى جىلعا قالدىرىلدى. وعان سايكەس, ارنايى سالىق رەجيمىن قولداناتىن سالىق تولەۋشىلەر تولەم كوزىنەن ۇستالاتىن جەكە تابىس سالىعى بويىنشا, سالىقتى ەسەپتەۋ جانە ۇستاپ قالۋ (اي سايىن), كوپشىلىك ماقۇلداعان تارتىپتە سالىق ەسەبىن بەرۋ (توقسان سايىن) جانە ونى تولەۋ (اي سايىن) بويىنشا سالىق اگەنتىنىڭ مىندەتتەمەلەرىن ورىنداۋلارى ءتيىس. 438-باپ 2018 جىلعا قالدىرىلدى. ول بويىنشا ارنايى سالىق رەجيمىن قولداناتىن شاعىن بيزنەس كوپشىلىك ماقۇلداعان تارتىپتە اي سايىن الەۋمەتتىك تولەمدەر تولەۋ بويىنشا اگەنتتىڭ مىندەتتەمەلەرىن ورىنداۋى ءتيىس. بۋحگالتەرلەرگە سالىق تولەۋشىلەردى سالىق ورگاندارىنا تىركەۋ, اۋديت, تەكسەرىس ناتيجەلەرى تۋرالى ەسكەرتۋلەر مەن (نەمەسە) زاڭ بۇزۋشىلىقتاردى جويۋ تۋرالى ەسكەرتپەلەرگە بايلانىستى شاعىمداردى قاراۋ ماسەلەلەرىنە قاتىستى وزگەرىستەردىڭ بولعانى بەلگىلى. جانە دە بۇدان بىلاي, تاۋارلاردى جەتكىزۋدى جەدەلدەتۋ جانە سىرتقى ەكونوميكالىق ارەكەتتەرگە قاتىسۋشىلاردى شىعىنعا ۇشىراتپاۋ ماقساتىندا كودەكستىڭ 319-بابى بويىنشا قانداي دا ءبىر ەلدى-مەكەننىڭ اكىمشىلىك-اۋماقتىق شەكاراسى شەگىندە ورنالاسقان كەلۋ ورنىنان ۋاقىتشا ساقتاۋ ورنىنا دەيىن, (مىسالى, اۋەجايدان ۋاقىتشا ساقتاۋ قويماسىنا دەيىن) تاسىمالداناتىن شەتەلدىك تاۋارلارعا قاتىستى كەدەندىك ترانزيت قولدانىلمايتىن بولادى.