ماسكەۋدى تاڭقالدىرعان ەركەش

ەگەر «قازاقستان» ۇلتتىق ارنا­سىن­داعى «ايگولەك» بايقاۋىنىڭ كۇندەلىگىن كورىپ جۇرگەن بولساڭىز, سونداعى ەركەش ەسىمدى ءسۇپ-سۇيكىمدى بالاقايعا بىردەن نازارىڭىز تۇسەرى داۋسىز. بويىنداعى ارتىستىك قابى­لەتى مەن بالالىق شىنايى پەيىلى ارقىلى كورەرمەندەردىڭ ىقى­لاسىن جاۋلاپ العان ەركەش وسى بايقاۋ­دىڭ جۇرگىزۋشىسى. «ايگولەكتىڭ» بۇ­دان الدىڭعى جوبالارىنىڭ ءبىرىنىڭ جەڭىمپازى. تۇپ-تۇنىق داۋىسى مەن مۋزىكالىق تالعامى بار ونەرلى بالا. جۋىردا ءبىز ەركەشتىڭ رەسەيدىڭ 1-ءشى ارناسى ۇيىمداستىرعان ەڭ تاڭداۋلى جوبالارىنىڭ ءبىرى «مينۋتا سلاۆى» باعدارلاماسىندا سۋ­پەر­فينالعا وتكەنىنەن حاباردار بول­دىق. رەداكتسيامىزعا ادەيى ات باسىن بۇرعان قر ەڭبەك سىڭىرگەن ءارتىسى, ءانشى ءارى سازگەر مارات وماروۆ ءوز ءشا­كىرتىنىڭ ونەردەگى جەتىستىگى تۋرا­لى تولعانا باياندادى: «ەركەشتى وسىدان ءۇش جىل بۇرىن «بالبوبەك» بايقاۋىنا قاتىسىپ, باس جۇلدە العان كەزىنەن باستاپ بىلەمىن. سودان الدىمەن سىرتتاي باقىلادىم. العاشقى اسەر الدامشى بولا ما دە­گەن دە وي عوي. سويتسەم, ولاي ەمەس. نەشە ءتۇرلى كونتسەرتتەرگە قا­تى­سىپ جۇرگەن بالانىڭ داۋىسى شىنىندا دا تابيعي, دياپازونى كەڭ. قازاق «بۇلاق كورسەڭ كوزىن اش» دەمەي مە؟ سوناۋ اقتوبەنىڭ حرومتاۋ اۋدانىنان شىققان جەتكىنشەكتى شاكىرتىم رەتىندە تاربيەلەۋگە بەل بۋدىم. ءارى اناسىنان جاستاي ايى­رى­­لىپ, اپكەسىنىڭ قولىندا تاربيە­لە­نىپ جاتقان بالاعا ەرەكشە ىقى­لا­سىم اۋدى. مىنە, جەتىستىگىمىز جامان ەمەس. ەركەش سۋپەرفينالعا ءوتۋ ار­قىلى رەسەي مەن شەتەلدىكتەر بىرىگىپ تۇسىرگەلى جاتقان كوپ سەريالى فيلمدە بالانىڭ ءرولىن سومداۋعا ۇسىنىس الدى. «مينۋتا سلاۆى» باع­دار­لاماسى ءجاسوسپىرىم مەن جاسا­مىس تا قاتىسا الاتىن شوۋ. بىراق, وعان قاتىسۋ وڭاي شارۋا ەمەس. قا­تى­سۋ­شىلار دا, قازىلار دا الەمدىك دەڭ­گەي­دە سارالانادى. سونىڭ ىشىنەن سۋ­پەرفينالعا جولداما الۋ ءۇشىن شىن مانىندە تالانتتى بولۋ كەرەك. ءويت­كەنى ول اقشا بەرىپ ات جا­سايتىن جەر ەمەس. ءبارى كورەر­مەننىڭ كوز الدىنان ءوتىپ جاتادى. كورەر­مەن ءوزى دە SMS ارقىلى داۋىس بەرەدى». قازاق قوعامى مارات وماروۆ­تىڭ بالالار ءۇشىن نەشە ءتۇرلى باي­قاۋلار ۇيىمداستىرىپ, ودان قالسا تالانتتى بالالاردى تاۋىپ, ولار­دىڭ ونەردەگى جولىن اشىپ ءجۇر­گەنى­نەن حاباردار. «ءانشى بالاپان», «بالبوبەك» ارقى­لى تانىمال بول­عان بالالار وسى كۇن­دەرى تالانتتى جاستاردىڭ قاتارىندا ءجۇر. جۋىر­دا عانا «ايگولەك» باي­قاۋىندا باس جۇلدە العان مەيىرلان ءشا­كەنوۆ پەن جۇلدەلى ورىننان كو­رىنگەن ءما­دي­نا ەراليەۆا ەسىمدى 8 جاسار قىز بالا دا سازگەردىڭ شاكىرتتەرى. ول ءوزىنىڭ ار­مانى شاكىرت تاربيەلەۋ ەكەنىن, ولار تەك قازاقستاندىق ساحنادا ەمەس, الەم­دىك ساحنالاردا ءان شىر­قاسا دەپ تىلەيتىنىن جاسىر­مادى. سول ءۇشىن دە ەلور­دا­مىزدان حالىق­ارالىق «تالانت» ونەر ورتالىعىن اشىپتى. بۇل ورتا­لىق­­قا ناعىز تا­بيعي دارىنى بار تا­لانت­تى بالا­لار­دى توپتاستىر­عىسى كەلەتىن سازگەر اعامىز ولاردى ەلىمىزدىڭ شالعاي اۋىلدارىنان ىزدەۋگە دە بەيىل. ايتا كەتەيىك, بۇل ور­تالىق رەسمي تۇردە 23-ءشى ناۋرىزدا اشى­لاتىن بول­عانىمەن, ەركەش حاسەندى ورتالىقتىڭ العاشقى قارلى­عا­شى دەۋگە بولادى. ويتكەنى, ۇس­تازى شەت ەلدەرمەن باي­لا­نىس جاساۋدى باس­تاپ تا كەتكەن. ارينە, «مينۋتا سلا­ۆى» ج­و­با­سىنا قاتىسۋ­دىڭ مۇمكىندىگى وپ-وڭاي بولا قويمايدى عوي. ايگۇل سەيىلوۆا.