سايلاۋ مەن تاڭداۋ

اقمەشىتتىڭ اسپانى قانشا كۇننەن بەرى تۇنەرىپ تۇرعان. جاۋايىن دەپ تۇرعان جاڭبىردى جىندى جەل كەلىپ, قۋىپ كەتەدى. كەشە تاڭەرتەڭنەن باستاپ كەبەرسىپ جاتقان جەرگە جاڭبىر ءتيدى. اينالا جادىراپ سالا بەردى. كوكتەمنىڭ قۇدىرەتى دەگەن وسى شىعار. ۇزدىكسىز جاۋعان جاڭبىرعا قاراماستان, ورتالىق الاڭ حالىققا لىق تولدى. جالىندى ۇراندار جاڭبىرمەن بىرگە اسپاندا قالىقتاپ تۇر. بۇل – الداعى بولاتىن سايلاۋدا پرەزيدەنتتىككە كانديدات نۇرسۇلتان نازارباەۆتىڭ كانديداتۋراسىن قولداۋعا كەلگەن ادامدار ەدى. ميتينگ تورىنە «نۇر وتان» حالىقتىق-دەموكراتيالىق پارتياسى توراعاسىنىڭ ءبىرىنشى ورىنباسارى, پرەزيدەنتتىككە كانديدات ن.نازارباەۆتىڭ رەسپۋبليكالىق قوعامدىق شتابىنىڭ جەتەكشىسى نۇرلان نىعماتۋلين باستاعان ءبىر توپ ازامات كوتەرىلدى. ولاردىڭ قاتارىندا قۋانىش سۇلتانوۆ, بەكبولات تىلەۋ­حان سەكىلدى پارلامەنت دەپۋتاتتارى, قا­زاق­ستان جازۋشىلار وداعىنىڭ توراعاسى نۇرلان ورازالين, سيدنەي وليمپياداسىنىڭ چەمپيونى ەرماحان ىبىرايىموۆ, اۋعان سوعىسى ارداگەرلەرىنىڭ رەسپۋبليكالىق اسسو­تسيا­تسياسى توراعاسىنىڭ ورىنباسارى باقىت­بەك سماعۇل سەكىلدى ەلگە تانىمال ازاماتتار بار-تىن. سونداي-اق جيىنعا «قازاق­ستان-2020» جالپىۇلتتىق دەموكراتيالىق كۇشتەر كواليتسياسىنىڭ وكىلدەرى دە قاتىستى. ميتينگىدەن كەيىنگى جيىن وبلىستىق نارتاي بەكەجانوۆ اتىنداعى دراما تەاترىندا جالعاستى. وعان وبلىس جۇرتشىلىعى, ۇكى­مەتتىك ەمەس ۇيىمداردىڭ وكىلدەرى, اقساقال-ارداگەرلەر مەن جاستار كەلدى. العاشقى ءسوزدى «نۇر وتان» حدپ توراعاسىنىڭ ءبىرىنشى ورىنباسارى نۇرلان نىعماتۋلين الدى. – الاشتىڭ اناسى اتانعان قاسيەتتى دە كيەلى سىر وڭىرىندە باس قوسىپ وتىرمىز. دالاسى دارحان, حالقى جايساڭ جۇرتتىڭ قۇشاق جايىپ قارسى العانىنا قۋانىشتىمىز. 90-جىلدار­دىڭ باس كەزى بارلىعىمىزدىڭ ەسىمىزدە شى­عار. جۇمىس جوق, دۇكەن سورەلەرى بوس بولىپ تۇرعان ۋاقىتتى ەشكىم ۇمىتا قويماس. بىراق كوپ ۇزاماي ەلىمىز الەمدەگى الەۋەتتى مەملە­كەتتەردىڭ بىرىنە اينالدى. جاڭا قۇرىلىستار سالىندى. جۇمىس ورىندارى اشىلدى. مۇنىڭ ءبارى ەل ءۇشىن, مەملەكەتتىڭ بولاشاعى ءۇشىن جاسالعان جۇمىستار بولاتىن. ەل تاۋەل­سىزدىگىنىڭ 20 جىلدىعى قارساڭىندا سايلاۋ وتكەلى وتىر. وسى ورايدا ەلىن, جەرىن قادىر­لەيتىن ءاربىر ازامات پرەزيدەنتتىكتەن ۇمىتكەر نۇرسۇلتان نازارباەۆقا داۋىس بەرەدى دەپ ويلايمىن, – دەدى نۇرلان زايروللا ۇلى. جالپى, سىر ءوڭىرى – ءسوز قۇدىرەتىن تۇسىنە­تىن, ءتۇسىنىپ قانا قويماي, ونىڭ تەرەڭىنە بوي­لايتىن ءوڭىر. نۇرسۇلتان ءابىش ۇلىنىڭ كانديدا­تۋرا­سىن قولداپ كەلگەن ازاماتتاردىڭ قاي-قايسىسى بولماسىن تىلگە شەشەن, وت اۋىزدى, وراق ءتىلدى ازاماتتار ەدى. ءبىرىن-بىرىنەن ءبولىپ قاراۋ مۇمكىن ەمەس. پارتيا توراعاسى­نىڭ ءبىرىنشى ورىنباسارىنان كەيىن ءسوز العان سەناتور قۋانىش سۇلتانوۆ, نۇرلان ورازالين, با­قىت­بەك سماعۇل مەن بەكبولات تىلەۋحان كوپ­شىلىكتى سەرپىلتىپ, ساناعا سالماق سالار ويلى ءاڭ­گى­مە­لەر ءوربىتتى. قازاقستان كورەيلەرى اسسو­تسيا­­تسيا­سىنىڭ پرەزيدەنتى رومان كيمنىڭ بايان­داماسى دا حالىققا مايداي جاقتى. ءسوزىن قازاق تىلىندە باستاعان ول مەملەكەتتىك ءتىلدى ۇيرەنىپ جۇرگەنىن ايتتى. سونداي-اق الداعى ۋاقىتتا قازاقستاندا قازاق ءتىلى دەگەن پروبلەمانىڭ بولمايتىنىنا سەنەتىنىن جەتكىزدى. قىزىلوردا توپىراعىنا كەلگەن قوناقتار بۇدان كەيىن بىرنەشە توپقا ءبولىنىپ, وبلىس جۇرتشىلىعىمەن كەزدەسۋگە اتتاندى. ونداي كەزدەسۋلەر اسقار توقماعامبەتوۆ اتىنداعى مادەنيەت سارايىندا جانە سىرداريا اۋدانىندا ءوتتى. ەرجان بايتىلەس. قىزىلوردا وبلىسى.