استانادا ءىرى مۇزايدىنىنىڭ قۇرىلىسى باستالدى

ەلوردادا ەڭ ءىرى مۇز ايدىنىنىڭ قۇرىلىسى مەن جاڭاجىلدىق مەرەكەلەرگە كوشەلەردى بەزەندىرۋ جۇمىستارى باستالدى, دەپ حابارلادى قازاقپارات. «قىسقى ەرتەگىنىڭ» نەگىزگى تۇجىرىمداماسى رەتىندە كەلەر جىلدىڭ باستى نىشانى – تاۋىق قانا ەمەس, ەلىمىزدىڭ باستى وقيعاسى – ەكسپو كورمەسى دە بولماق. «قازىرگى تاڭدا «اراي» ساياباعىنىڭ اۋماعىندا كولەمى 5 مىڭ شارشى مەتردى قۇرايتىن 250 ادامعا ارنالعان مۇز ايدىنىنىڭ قۇرىلىسى باستالدى. بۇل جەردە كونكيدى جالعا بەرۋ ورنى, مەديتسينالىق پۋنكت, ءدامحانا, راديوحابارلاعىش جانە LED-ەكراندار ورنالاستىرىلادى. بۇدان بولەك, بالالارعا ارنالعان سىرعانايتىن توبەشىكتەر دە ورناتىلادى», – دەدى ەسىل اۋدانى اكىمدىگىنىڭ ءباسپاسوز حاتشىسى جامال ابىكەنوۆا. مۇز ايدىندارى قالانىڭ وزگە ەكى اۋدانىندا دا سالىنادى. ولار شامامەن 16 جەلتوقساننان باستاپ جۇمىس ىستەي باستايدى. استانا قالالىق مادەنيەت باسقارماسىنان حابارلاعانداي, ەلوردادا جاڭا جىل مەرەكەسىنە وراي بارلىعى 17 شىرشا ورناتىلىپ, ءتورت مۇز قالاشىعى بوي كوتەرەدى. ءبىر عانا ەسىل اۋدانى مەن ۇركەر, قالاماڭى تۇرعىن القاپتارىندا 10 جاڭاجىلدىق شىرشا ورناتۋ جوسپارلانعان. ايتا كەتەيىك, بيىل ەلىمىزدىڭ باستى شىرشاسى «حان شاتىر» سوسو ماڭىنا ورناتىلاتىن بولادى. وسىندا سونداي-اق, ءتورت مۇز قالاشىقتارىنىڭ ءبىرى سالىنادى.