الدىمەن بالالارىنىڭ جاعدايىن قامداسىن

ا.شارحانوۆا. «ەگەمەن قازاقستان» گازەتىنىڭ 2011 جىلدىڭ 26 اقپانى كۇنگى نومىرىندەگى «پارلامەنت» ارناۋلى بەتىندە جاراسباي سۇلەيمەنوۆتىڭ «بە­سىكتەن بەلى شىقپاي جاتىپ, ومىردەن نەگە تۇڭىلەدى» دەگەن ماقا­لا­سى جاريالاندى. سول جاريالانىم بويىنشا مەنىڭ دەپۋتاتقا ناقتى ءوز مىسالىم نەگىزىندە ساۋالىم بار. مەن 10 جىل نەكەدە تۇردىم. بۇ­رىنعى جۇبايىممەن ارامىزدا 3 جاس بالامىز بار, ءبىز اجىراسقان سوڭ ولار مەنىڭ اسىراۋىمدا قالدى. مەن مەملەكەتتىك قىزمەتتە جۇمىس ىستەيمىن. قازىرگى تاڭدا جۇبايىم 3 پەرزەنتىنە 10 مىڭ تەڭگە اليمەنتتى ارەڭ تولەيدى, ورتاق سالىنعان ءۇيدى الاياقتىقپەن قايىن اتاما اۋىستىرىپ جىبەرگەن. 3 پەرزەنتىمنىڭ تۋعان اجەسى اسەمكۇل ەرنيشەۆا نەمەرەلەرىن ماجبۇرلەپ ۇيدەن شىعارۋعا سوتقا ارىز­دانعان. اجىراسقانىنا 6 اي وتپەي 2-ءشى رەت ۇيلەنگەن ارسىز, يمانسىز اكەلەرىنىڭ سالدارىنان 2 ۇلىم دا ومىردەن تۇڭىلگەندەي, قىزىم نەعىپ مەنىڭ اكەم وسىنداي بولدى دەپ سۇراق قويادى. ءبىرىنشى وتباسىن قامتاماسىز ەتىپ, بالالا­رىنا جاعداي جاساپ بەرىپ, ۇلكەندەر ءارى قاراي وزدەرىنىڭ اراسىنداعى كيكىلجىڭدى شەشسە, ەكىنشى قۇرعان وتباسى دا بەرەكەلى بولار ەدى عوي. قازىر يمانسىز ەنەلەر, ولاردىڭ ارسىز بالالارى قانشاما كەلىندەردىڭ ءومىرىن قيىنداتىپ ءجۇر دەسەڭىزشى. ىشەرگە تاماعى, كيەرگە كيىمى جەتپەي, شارشاپ-شالدىعىپ, ومىردەن باز كەشىپ كەتكىسى كەلىپ جۇرگەن, ودان قالسا باسپاناسى جوق, كوڭىلدەرى جارىم ءتىرى جەتىمدەر قانشاما. سوندىقتان, ەڭ الدىمەن جالعىزىلىكتى ايەلدەردىڭ جاعدايىن ويلاستى­رۋ كەرەك. ەركەكتەرگە اجىراساسىڭ با, ەڭ الدىمەن بالالارىڭدى باسپانامەن قامتاماسىز ەت دەپ زاڭمەن بەلگىلەپ, قازىقتاي قاعۋ قاجەت. بالالارىنا پانا بولا المايتىن ەركەكتەرگە جاۋاپكەرشىلىك سەزىمى داريتىن شىعار سوندا. ماسەلەنىڭ ءتۇبى وسى. اجىراسىپ, ىردۋ-دىردۋ بولىپ جۇرگەن اتا-انا بالالارىنا قانداي جاعداي جاساماق؟! مىنە, بالالار ءسۋيتسيدىنىڭ ءبىر پاراسى وسى ماسەلەدە جاتىر ما دەيمىن. باسقا جاعدايلاردىڭ بار ەكەنىن دە جوققا شىعارمايمىن. تۇركىستان قالاسى.