بيىل برازيليانىڭ ريو-دە-جانەيرو قالاسىندا وتكەن جازعى وليمپيالىق ويىنداردا بوكسشى دانيار ەلەۋسىنوۆ ەل نامىسىن ابىرويمەن قورعاپ, 69 كيلو سالماق دارەجەسىندە چەمپيون اتاندى. دانياردىڭ اعاسى داۋرەن دە شارشى الاڭنىڭ تالاي رەت شاڭىن قاعىپ جۇرگەن سايىپقىران بوكسشى. ول ستۋدەنتتەر اراسىندا الەم چەمپيونى (2006), ازيا چەمپيوناتىنىڭ جۇلدەگەرى.
وسى ەكى ۇلىنىڭ سپورتتاعى ۇلكەن جەتىستىگى ەلەۋسىنوۆتەر وتباسىنىڭ استاناعا قونىس اۋدارۋىنا سەبەپشى بولدى.
اعايىندى ەلەۋسىنوۆتەر باتىس قازاقستان وبلىسى كازتالوۆكا اۋدانىنىڭ قايىڭدى اۋىلىندا دۇنيەگە كەلدى. اكەلەرى مارات ەلەۋسىنوۆ جوعارى ءبىلىمدى سپورت مامانى. ول قازاقستان رەسپۋبليكاسىنا ەڭبەك سىڭىرگەن جاتتىقتىرۋشى, 20 جىلدان استام ۋاقىت بوكس ونەرىن وسكەلەڭ ۇرپاققا ۇيرەتىپ كەلەدى. يسى قازاققا تانىلعان دانيار مەن داۋرەننىڭ جاتتىقتىرۋشىسى بولۋىمەن بىرگە ونىڭ بىرنەشە شاكىرتتەرى رەسپۋبليكالىق جانە حالىقارالىق دودالاردا جەڭىمپاز اتانىپ, «ەرەن ەڭبەگى ءۇشىن» توسبەلگىسىنە يە بولدى.
– اكەم ءتالىپ جارتى عاسىرعا جۋىق ۋاقىت مۇعالىم بولدى. ول جاسىندا قازاقشا كۇرەسپەن اينالىسىپتى. مەنىڭ سپورت ماماندىعىن تاڭداعانىما ەش قارسىلىق بىلدىرگەن جوق. ءبىر جاعىنان مەن اكەمنىڭ ۇستازدىق ءىزىن جالعاستىردىم, – دەيدى مارات ءتالىپ ۇلى.
اۋىلدا ماراتتىڭ ەڭبەگى باعالانىپ, ءوزى ءبىلىم العان جوعارى وقۋ ورنىنىڭ دەنە شىنىقتىرۋ مەن سپورت فاكۋلتەتىنە قىزمەتكە شاقىرىلىپ, ورال قالاسىنا كوشەدى. سول جىلدارى بولاشاق قازاق سپورتىنىڭ ەكى جۇلدىزى اكەسىنەن قالماي سپورت زالىنا ەرىپ كەلەتىن. باستاپقىدا قىزىعۋشىلىق تانىتقان بالالار بويىنان اكەسى ۇلكەن قابىلەتتىڭ جاتقانىن بايقايدى.
– ۇلدارىمدى سپورتقا كاسىبي تۇرعىدا دايىندادىم. كوپ ادام بوكستى توبەلەس دەپ تۇسىنەدى. بوكس – توبەلەس ەمەس, ول – ونەر,
- دەيدى مارات ءتالىپ ۇلى.
سپورتقا ءبىرجولا بەتبۇرىسپەن كەلگەن دۇرىس. جاتتىقتىرۋشى ءوز تاجىريبەسىندە نەبىر تالانتتى بالالاردىڭ اراسىندا كوشەدەگى ۋاقىتشا الدانىشقا ەلىتىپ, جاتتىعۋعا كەلمەي, اقىرى سپورتتان الىستاپ كەتكەنىن بايقاماي قالعاندارى بولعاندىعىن ايتتى. جاسوسپىرىمدەرگە بۇل كوشەدەگى توبەلەس ەمەس, كاسىبي ماماندىق ەكەنىن ايتىپ, بىردەن سالماقتى كوزقاراس قالىپتاستىرۋدىڭ ماڭىزدى ەكەنىن العا تارتتى.
– ەگەر ۇلدارىم سپورتقا قىزىقپاسا, بويلارىندا وسى ونەرگە دەگەن بەيىمدىلىك پەن قابىلەت بولماسا, ولاردى بوكسقا تاربيەلەمەس ەدىم,
- دەيدى مارات ەلەۋسىنوۆ.
ەلەۋسىنوۆتەر وتباسىنىڭ ءۇشىنشى پەرزەنتى – دينارانىڭ تاڭداۋى – حورەوگرافيا بولدى. اعالارى سەكىلدى الدىنا قويعان ايقىن ماقساتىنا جەتپەي تىنبايتىن دينارا شارا جيەنقۇلوۆا اتىنداعى رەسپۋبليكالىق قازاق بي بايقاۋىنىڭ جۇلدەگەرى. ول بۇگىندە ۇلتتىق گۆارديا ءان-بي ءانسامبلىنىڭ باس ءسوليسى. مىڭ بۇرالعان ءبيشىنىڭ الدىندا كوپتەگەن جوسپارلارى مەن شىعارماشىلىق جوبالارى بار.
وتباسىنىڭ اناسى عاليا حانىم بالالارىنىڭ بولاشاعى ءۇشىن, ولاردىڭ بابى مەن جاعدايىن جاساۋ ماقساتىندا ۇستازدىق قىزمەتىنەن باس تارتتى. انا ءۇشىن بالالاردىڭ ارمانىنا جەتىپ, بيىك اسۋلاردى باعىندىرعانى ماڭىزدىراق بولدى. عاليا نۇرمۇحانقىزى بۇگىندە سول شەشىمىنىڭ تەككە كەتپەگەنىنە كوزى جەتتى. ول بۇگىندە ءتورت نەمەرەسى بار باقىتتى اجە.
باقىت تۇرماعامبەتوۆا
