270 كاسىپكەر سالىق كودەكسىنىڭ تالاپتارىمەن كەلىسپەيدى

اقمولا وبلىسىنداعى 270 كاسىپكەر بيىل قولدانىسقا ەنگەن سالىق كودەكسىنىڭ تالاپتارىمەن كەلىسپەي وتىر. ولاردىڭ كوپشىلىگى - جەراستى سۋلارىن پايدالاناتىن شيپاجاي يەلەرى. تابيعي رەسۋرستى تۇتىنۋ ءۇشىن تولەنەتىن سالىقتىڭ, شامامەن, 500 ەسە ارتۋى ولاردى تىعىرىققا تىرەگەنگە ۇقسايدى, - دەپ حابارلايدى "قازاقستان"تەلەارناسى. تىلشىلەردىڭ مالىمەتىنشە, جەڭىلدىككە يە كاسىپورىندار قاتارىنان الىپ تاستالعان ەمدەۋ-ساۋىقتىرۋ نىساندارى ەندىگى جەردە 1 تەكشە مەتر سۋعا 1 ايلىق ەسەپتىك كورسەتكىش كولەمىندە سالىق تولەۋگە مىندەتتى. ال كاسىپكەرلەر بولسا, ونى تولەۋگە كوپشىلىگىمىزدىڭ قاۋقارىمىز جەتە بەرمەيدى, دەيدى. بۋرابايداعى شيپاجايلار شارۋاشىلىق قاجەتتىلىكتەرگە جەر استى سۋىن پايدالانادى ەكەن. سەبەبى ۇلتتىق پارك اۋماعىندا ورتالىقتاندىرىلعان سۋ جۇيەسى جوق. سوندىقتان بارلىق نىساننىڭ جەكە قۇدىعى بار. "جۇمباقتاس" شيپاجايى جىلىنا 5 مىڭ تەكشە مەتر سۋ تۇتىنادى. ونىڭ ءاربىر تەكشە مەترى ءۇشىن سالىق تولەيدى. "بۇرىن ءبىز ايلىق ەسەپتىك كورسەتكىشتىڭ 0,3 پايىزىن تولەيتىنبىز. ءبىر جىلدا شامامەن 32 مىڭ تەڭگە شىعاتىن. قازىرگى تالاپ بويىنشا ءبىز جەر استىنان الىپ جاتقان 1 تەكشە مەتر سۋعا 1 ايلىق ەسەپتىك كورسەتكىش كولەمىندە سالىق تولەۋىمىز كەرەك. بىزدە بۇل جىلىنا 11 ميلليون تەڭگە بولىپ شىعادى. ونى ءبىز كوتەرە المايمىز", - دەيدى شيپاجاي ديرەكتورى ۆاسيلي چەرۆەنكو. ايتا كەتەيىك, جەراستى سۋلارىن پايدالانۋشى مەكەمەلەرگە 1 ايلىق ەسەپتىك كورسەتكىش كولەمىندە مىندەتتى تولەم بەكىتىلگەن. جانە 0,1, 0,3 جانە 25 پايىز قوسىمشا كوەفيتسيەنت ەسەپتەلىپ, جەڭىلدىك بەرىلەتىن مەكەمەلەر ءتىزىمى بار. الايدا شيپاجايلار بۇل تىزىمنەن الىپ تاستالعان. ال ءوز كەزەگىندە مەملەكەتتىك كىرىستەر دەپارتامەنتىنىڭ ءبولىم باسشىسى ەرلان قاپاروۆ بۋراباي كۋرورتتىق ايماعىنداعى شيپاجايلار, دەمالىس نىساندارىنا قاتىستى قوسىمشا كوەففيتسيەنت قولدانىلمايتىنىن ايتتى. "سەبەبى ولار الىپ جاتقان جەر استى سۋى تىكەلەي كاسىپكەرلىك قىزمەتكە پايدالانىلادى. وسىعان وراي, ولار سالىقتى 1 ايلىق ەسەپتىك كورسەتكىش كولەمىندە تولەۋگە مىندەتتى", - دەدى ول. سالىقتى ميلليونداپ تولەۋگە قاۋقارسىزبىز دەگەن شيپاجاي باسشىلارى جەرگىلىكتى كاسىپكەرلەر پالاتاسىنا ارىز-وتىنىشتەرىن جولدادى. سوعان وراي ارنايى ساراپتاما دا جۇرگىزىلدى. اقمولا وبلىستىق كاسىپكەرلەر پالاتاسى ديرەكتورىنىڭ ورىنباسارى ۆالەنتينا گەراششەنكونىڭ ايتۋىنشا, بۇل ماسەلە زەرتتەلدى. ء"بىز "اتامەكەن" كاسىپكەرلەر پالاتاسىنىڭ ورتالىق اپپاراتىنا سالىق كودەكسىنىڭ رەداكتسياسىنا وزگەرىستەر ەنگىزۋ, ياعني جەر استى سۋلارىن پايدالانعان ءۇشىن اۋدارىلاتىن مىندەتتى تولەمنىڭ مولشەرىن ازايتۋ تۋرالى حات جولدادىق", - دەدى ول. بۇگىندە ۇلتتىق ەكونوميكا مينيسترلىگىندە ارنايى جۇمىس توبى قۇرىلىپ, سالىق كودەكسىنە وزگەرىستەر ەنگىزۋ ماسەلەسى تالقىلانىپ جاتىر. شيپاجاي يەلەرى ەندى سوعان ءۇمىت ارتىپ وتىر. بۇدان قايىر بولماسا, كاسىپكەرلەر بيزنەسىن توقتاتامىز دەگەندى ايتادى.